ސިނގިރެޓް ރޯކޮށްގެން ދެމިދެމިހެން ކުރުވަނީ ސިނގިރެޓް އެކަންޏެއްނޫނެވެ. އުމުރުވެސް ކުރުވެއެވެ. ލިބޭ އާމްދަނީން ބޮޑުބައެއް އުނިވެ އަޅިއަށްވެއެވެ. ބަލި މަޑުކަން ބޮޑުވެ ބޭސްފަރުވާއަށް ކުރަންޖެހޭ ހޭދަ ބޮޑުވެއެވެ. އެހެނެއް ކަމަކު ދުންފަތުގެ އިސްތިއުމާލު ކުރާ ނިސްބަތް ދަށެއްނުވެއެވެ.

ދުންފަތުގެ އިސްތިއުމާލާ ދުރުކުރުމުގެ ނަމުގައި ދުންފަތުގެ ބާވަތްތަކުން ނަގާ އިންޕޯޓް ޑިއުޓީ އިންތިހާއަށް ބޮޑެވެ. ކިތަންމެ ޑިއުޓީ ބޮޑަސް އިންޕޯޓް ޑިއުޓީގެ ގޮތުގައި ދައުލަތަށް އެންމެ ގިނައިން ފައިސާ ލިބެނީ ސިނގިރެޓާއި ދުންފަތާ ގުޅުން ހުރި ބާވަތްތަކުންނެވެ. ސިނގިރެޓް ފަދަ ދުންފަތުގެ ބާވަތްތަކުން ބޮޑު ޑިއުޓީއެއް ނަގަނީ ދުންފަތާ މީހުން ދުރުކުރުމަށްވުރެ ދައުލަތަށް ފައިސާ ހޯދުމުގެ ބޭނުމުގައޭ ބުނުމަކީ ދޮގަކަށް ނުވާނެއެވެ. ކަސްޓަމްގެ ހިސާބުތަކުން އެކަން ސާފުކޮށް އެހުރީ ފެންނާށެވެ.

ތެދެކެވެ. ސިދާކޮށް ސިނގިރެޓް އިސްތިހާރެއް ނުކުރެއެވެ. އިސްތިހާރު ކުރާކަށް ނުވެސްޖެހެއެވެ. ސިނގިރެޓަށްވުރެ ގެއްލުން ކުޑަ ސިނގިރެޓާއި ވާދަކޮށްފާނެ އެއްޗަކަށް ބާޒާރު ލިބުނަ ނުދިނުމަކީ ކުޑަ އިސްތިހާރެއް ނޫނެވެ. ސިނގިރެޓްގެ ވިޔަފާރިކުރާ މަހުޖަނުން ސަރުކާރަށް ނުފޫޒު ފޯރުވައިގެން ސިނގިރެޓްގެ މާރކެޓް ހިފެހެއްޓުމަށް ސިނގިރެޓް ނޫން އެހެން ގޮތެއް ހޯދުމަށް ޖާގައެއް ނުދެއެވެ. ފަހަކަށް އައިސް ތައާރަފްވި އިލެކްޓްރޯނިކް ސިނގިރެޓް ނުވަތަ ވޭޕަކީ ސިނގިރެޓަށްވުރެ ސިއްހީ ގޮތުންނާއި މާލީގޮތުން ގެއްލުން ކުޑައެއްޗެކެވެ. އެހެނަސް ސަރުކާރުން އެތިބީ ސިނގިރެޓް އެތެރެކުރުން ނުހުއްޓުވާ އިލެކްޓްރޯނިކް ސިނގިރެޓް އެތެރެވުން މަނާކުރުމަށެވެ. ބޭނުމަކީ ސިނގިރެޓްގެ މާކެޓް ފުޅާކޮށް ބޮޑުކުރުމެވެ. އިންޕޯޓް ޑިއުޓީގެ ގޮތުގައި ލިބޭ ފައިސާ ގުނަކުރުމެވެ.

Advertisement

އިލެކްޓްރޯނިކް ސިނގިރެޓް (އީސީ) ގަނެވިއްކާ ބާޒާރުގައި އުޅޭތާ ދިހަ އަހަރަށްވުރެ ގިނަ ދުވަސް ވެއްޖެއެވެ. އެހެން ކަމުން އިލެކްޓްރޯނިކް ސިނގިރެޓާއި ބެހޭގޮތުން ސިއްހަތާ ގުޅުންހުރި ސައިންޓިފިކް ޕަބްލިކޭޝަންތައްވެސް ވަރަށް ގިނައެވެ. އިލެކްޓްރޯނިކް ސިނގިރެޓްގެ ރައްކާތެރިކަމާމެދު ސައިންޓިފިކް މުޖުތަމައު މުޅިން އިއްތިފާގު ނުވިޔަސް އެންމެންވެސް ފާހަގަ ކުރާކަމެއް އޮވެއެވެ. ދުންފަތުގެ ދުންގަނޑާއި އިލެކްޓްރޯނިކް ސިނގިރެޓުން އުފައްދާ ދުންގަނޑާ އަޅާކިޔާލުމުން ދުންފަތުގެ ދުންގަނޑަށްވުރެ އިލެކްޓްރޯނިކް ސިނގިރެޓްގެ ދުމުގައި އެކުލެވޭ ވިހަ ކޮމްޕައުންޑްތަކުގެ މިންވަރު ވަރަށް ބޮޑަށް ދަށެވެ.

މަގުމައްޗަށް އުކާލާފައި ހުރި ސިނގިރެޓް ފިލްޓަރާއި ފޮށިފަދަ ތަކެތި / މީގެ ސަބަބުން މަގުތަކުގެ ސާފުތާހިރުކަން ގެއްލޭ! | ފޮޓޯ: ފްލިކަރ

ދުންފަތުގެ އިސްތިއުމާލު ހުއްޓާލަން ބޭނުން ނުވާ ސިނގިރެޓް ބޯ މީހުންނަށް ލިބޭ ސިއްހީ ގެއްލުން ކުޑަކުރެވޭނެ ގޮތެއް ކަމުގައި އިލެކްޓްރޯނިކް ސިނގިރެޓްވެއެވެ. އިލެކްޓްރޯނިކް ސިނގިރެޓާއި މެދު އޮންނަ އެންމެ ބޮޑު ކަންބޮޑުވުމަކީ ފުރާވަރުގެ ކުދިންގެ ތެރޭގައި ގިނައިން ބޭނުންކުރާ އެއްޗަކަށްވުމެވެ. ޒުވާން އާބާދީ ނިކޮޓީން އަށް ބަރޯސާވުމާއި ސިއްހީ މައްސަލަތައް ކުރިމަތިވުމުގެ ބޮޑު ނުރައްކަލެއް ކުރިމަތިވެދާނެ ކަމުގެ ބިރެވެ.

ހަގީގަތަކީ ދުންފަތުގެ އަޅުންނަށް އާބާދީ ވެގެން ގޮސްފައިވަނީ އިލެކްޓްރޯނިކް ސިނގިރެޓް ވުޖޫދުގައިވެސް ވުމުގެ ކުރިންނެވެ. އިލެކްޓްރޯނިކް ސިނގިރެޓުން ކޮށްދޭ ކަމަކީ ސިނގިރެޓުން ހަށިގަނޑަށް ލިބޭ ތާރު އެއްގޮތަކަށްވެސް ނުލިބޭ ގޮތް ހެދުމެވެ. ސިނގިރެޓަށް ވުރެ ހަށިގަނޑަށް ކުރާ ވިހައިގެ އަސަރު ކުޑަކުރުމެވެ. ސިނގިރެޓަށްކުރާ ހޭދަ އެތައް ގުނައެއް ދަށްކުރުމުވެ.