އަންނަ ރިޔާސީ އިންތިޙާބުގައި ވާދަކުރެއްވުމަށް އިދިކޮޅު ޕީޕީއެމްގެ ރިޔާސީ ކެނޑިޑޭޓް އަބްދުﷲ ޔާމީން އަބްދުލްޤައްޔޫމް އިލެކްޝަންސް ކޮމިޝަނަށް ފޯމު ހުށައަޅުއްވައިފިއެވެ.ޕީޕީއެމްގެ ފަރާތުން އިލްކެޝަންސް ކޮމިޝަނަށް ފޯމު ހުށައެޅުއްވީ ރައީސް ޔާމީންގެ ރަސްމީ އިންތިޚާބީ އެޖެންޓް އަދި ޕީޕީއެމްގެ ސެކެރަޓަރީ ޖެނެރަލް މުހައްމަދު ތޮލާލްއެވެ. ފޯމާއި ހަވާލުވެޑައިގަތީ އިލެކްޝަންސް ކޮމިޝަންގެ ރައީސް ފުއާދު ތައުފީގެވެ. ފޯމް ހަވާލުކުރުމުގައި ޕީޕީއެމްގެ ލީޑަރ ޝިޕުން އެންމެ އިސްކޮށް ހުންނެވީ ރައީސް ޔާމީންގެ ރަނިން މޭޓެއްގެ ގޮތުގައި ކަނޑައަޅުއްވާފައިވާ ޑރ މުހައްމަދު ޖަމީލް އަހްމަދުއެވެ.ފޯމާއި ހަވާލުވެވަޑައިގަތުމަށްފަހު ވާހަކަ ދައްކަމުން އިލެކްޝަންސް ކޮމިޝަންގެ ނާއިބު ރައީސް އިސްމާއިލް ހަބީބް ވިދާޅުވީ ކެނޑިޑޭޓުންގެ ފޯމާއި މެދު ގޮތެއް ނިންމުމަށް އިލެކްޝަންސް ކޮމިޝަނަށް 48 ގަޑިއިރު ގާނޫން ދީފައިވާކަމަށެވެ. އެހެންނަމަވެސް މީ އިދިކޮޅު އެންމެ ބޮޑު ޕާޓީގެ ކެނޑިޑޭޓްގެ ފޯމަށް ވުމުން މިއަދު އިރު އޮއްސުމުގެ ކުރިން ރައީސް ޔާމީންގެ ކެނޑިޑަސީ އާ ގުޅޭގޮތުން އެކޮމިޝަނުން ނިންމަންޖެހޭ ނިންމުމެއް ނިންމަވާނެކަމަށެވެ. އަދި ކޮމިޝަނުން ނިންމާ ނިންމުމަކާއި ގުޅިގެން ޗެލެންޖެކުރާނަމަ އެފުރުސަތު އެ ޕާޓީއަކަށް ލިބިގެންވާކަންވެސް ހަބީބް ފާހަގަކުރެއްވިއެވެ.އެމްއެމްޕީއާރުސީގެ ބޮޑު ހިޔާނާތުގައި ވ. އާރަށް ކުއްޔަށް ދޫކުރުމުގައި ރިޝްވަތު ނެގުމާއި މަނީ ލޯންޑަރކުރުމުގެ ކުށް ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.ޤާނޫނު އަސާސީ ބުނާގޮތުން ރައީސުލްޖުމްހޫރިއްޔާއަށް ވުމުގެ ޝަރުތުތަކުގެ ތެރޭގައި ޖިނާއި ކުށެއް ސާބިތުވެގެން އެއް އަހަރަށްވުރެ ދިގު މުއްދަތެއްގެ ހުކުމެއް އޮތްނަމަ އެ ހުކުމެއް ތަންފީޒުކޮށް ނިމުމުނުތާ ނުވަތަ ކަނޑައެޅުނު އަދަބު މައާފުކުރިތާ 3 އަހަރުވެފައިވާ މީހަކަށް ވާންޖެހެއެވެ.އިންތިޚާބަށް ކުރިމަތިލާ ކެނޑިޑޭޓެއްގެ ޝަރުތު ހަމަނުވާކަމަށް އިލެކްޝަންސް ކޮމިޝަނުން ނިންމަވާ ނިންމާއި މެދު ހިތްހަމަ ނުޖެހޭނަމަ އެކަމެއް ސުޕްރީމްކޯޓަށް ހުށައެޅުމުގެ ފުރުސަތު ޤާނޫނުން ލިބެއެވެ. އިންތިޚާބުތަކާއި ބެހޭ އާއްމު ޤާނޫނު ބުނާގޮތުން މި ފަދަ މައްސަލަ ސުޕްރީމްކޯޓަށް ހުށައެޅޭނީ އެފޯމް ހުށައެޅިތާ 48 ގަޑިއިރު ހަމަވާ ވަގުތުން ފެށިގެން 5 ދުވަހުގެ ތެރޭގައެވެ. މިގޮތަށް ސުޕްރީމްކޯޓަށް ހުށައަޅާ މައްސަލައެއް އެ ކޯޓަށް ހުށައަޅާތާ ގިނަވަގެން 7 ދުވަހުގެ ތެރޭގއި ނިންމަވަންޖެހެއެވެ. އަދި މި ފަދަ މައްސަލަތަކުގައި ސުޕްރީމްކޯޓުން ނިންމަވާ ނިންމެވުމަކީ އެންމެ ފަހުގެ ނިންމެވުންކަމަށްވެސް ޤާނުނު އަސާސީގައިވަނީ ބަޔާންކޮށްފައެވެ.