ރިޔާސީ އިންތިޚާބު ބޮއިކޮޓްކުރުމަށް ފެނޭތޯ ބެލުމަށް ޕީޕީއެމް ޕީއެންސީގެ ސެނެޓުގައި ނެގި ވޯޓު ރައީސް ޢަބްދުﷲ ޔާމީނަށް ނާކާމިޔާބުވެ، އިންތިޚާބު ބޮއިކޮޓު ނުކުރަން ފާސްކޮށްފިއެވެ.އަންނަ މަހު އޮންނަ ރިޔާސީ އިންތިޚާބުގައި، ކުރީގެ ރައީސް ޢަބްދުﷲ ޔާމީނަށް ވާދަނުކުރެވޭނެކަމަށް ސުޕްރީމް ކޯޓުން ނިންމެވި ނިންމެވުމާއި ގުޅިގެން، އެމަނިކުފާނު ވަނީ އިންތިޚާބު ބޮއިކޮޓްކުރެއްވުމަށް ޕީޕީއެމް ލީޑަރޝިޕްގައި އެދިވަޑައިގެންފައެވެ. އެގޮތުން ރައީސް ޔާމީން އެދިވަޑައިގަތީ އެމަނިކުފާނުގެ އިންތިޚާބީ ހައްޤު ނިގުޅައިގަނެފައިވާކަމަށް ސެނެޓަށް ޤަބޫލުކުރެވޭނަމަ އިންތިޚާބު ބޮއިކޮޓްކުރުމަށެވެ.ޕީޕީއެމް ޕީއެންސީގެ ސެނެޓުން ބޭއްވި ކުއްލި ބައްދަލުވުމުގައި ވަނީ އިންތިޚާބު ބޮއިކޮޓް ކުރުމަށް ފެންނަ ނުފެންނަ ވޯޓެއް ނަގާފައެވެ. އެ ބައްދަލުވުމުގައި 126 ސެންޓަރުން ބައިވެރިވެވަޑައިގެންނެވިއެވެ. އިންތިޚާބު ބޮއިކޯޓްކުރަން ނުފެންނަކަމަށް 67 މެންބަރަކު ވޯޓު ދިނެވެ. ބޮއިކޮޓްކުރަން ފެންނަކަމަށް ވޯޓު ދެއްވީ 46 މެންބަރުންނެވެ. އިންތިޚާބު ބޮއިކޮޓް ނުކުރުމަށް ގޮވާލާ ވޯޓު ދެއްވި ބޭފުޅުންގެ ތެރޭގައި ރައީސް ޔާމީންގެ ވަރަށް އަރިސް ބޭފުޅުންވެސް ހިމެނިވަޑައިގަންނަވައެވެ.އިންތިޚާބު ބޮއިކޮޓްކުރުމަށް ރައީސް ޔާމީން އެދިވަޑައިގަތުމާއި ގުޅިގެން، ބޭއްވި ސެނެޓުގެ ބައްދަލުވުމުގައި ޚިޔާލުތަފާތުވެ އެ ބައްދަލުވުން ހޫނުވެގެންދިޔައެވެ. އެ ބައްދަލުވުމުގައި ސެނެޓަރުންގެ މެދުގައި ހޫނު ޒުވާބެއްވެސް ހިނގާފައިވެއެވެ. އެ ބައްދަލުވުން ޚިޔާތަފާތުވެ ހޫނުވީ، އިންތިޚާބުގައި ވާދަކުރުމަށް "ބެކަޕް" ކެނޑިޑޭޓެއްގެ ގޮތުގައި މާލޭގެ މޭޔަރު ޑރ.މުޙައްމަދު މުޢިއްޒު ކަނޑައަޅާފައިވަނީ ރައީސް ޔާމީންގެ އެދިވަޑައިގަތުމަށްކަމަށް ކަނޑައަޅުއްވާފައިވާކަމަށް ވިދާޅުވެއެވެ.މުޢިއްޒުގެ ރަނިންމޭޓަކަށް ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފް ވަނީ ހަމަޖައްސަވާފައެވެ. ނަމަވެސް އިންތިޚާބުގައި ވާދަކުރުމަށް ބޭނުންވާ ފޯމު މިހާތަނަށް އިލެކްޝަންސް ކޮމިޝަނަށް ހުށައަޅުއްވާފައެއް ނުވެއެވެ.އަންނަ ރިޔާސީ އިންތިޚާބުގައި ވާދަކުރެއްވުމަށް ރައީސް އަބްދުﷲ ޔާމީން ޝަރުތު ފުރިހަމަނުވާކަމަށް ސުޕްރީމްކޯޓުން ނިންމަވާފައިވަނީ، ރައީސް ޔާމީންގެ ކެންޑިޑަސީ ފޯމް އިލެކްޝަންސް ކޮމިޝަނުން ބަލައި ނުގަތުމުން އެމަނިކުފާނު ހުށައެޅި މައްސަލާގައި މިއަދު އިއްވެވި ޙުކުމުގައެވެ. އެ މައްސަލަ ބެއްލެވި ހަތް ފަނޑިޔާރުންގެ އިއްތިފާގުން ނިންމެވި، ރައީސް ޔާމީންގެ ކެންޑިޑެސީ ބަލައިނުގަންނަން އީސީން ނިންމީ ރަނގަޅަށް ކަމަށެވެ.ރިޔާސީ އިންތިޚަބުގައި ވާދަކުރެއްވުމަށް ކެންޑިޑެސީ ފޯމް ހުށައެޅުމުގެ ސުންގަޑި މާދަމާ މެންދުރުފަހު 14:00އަށް ހަމަވާނެއެވެ.