ރާއްޖޭގެ ތިން ފިލްމީތަރިން އެއް ސައިކަލެއްގައި ދުއްވާ މަންޒަރު ފެންނަ ވީޑިއޯ އެއް ސޯޝަލް މީޑިއާގައި އާންމުވެއްޖެއެވެ.

އައްޑޫ އެކްސް ފައިލްގެ ނަމުގައި 'އެކްސް' ގައިވާ އެކައުންޓަކުން އާންމުކޮށްފައިވާ މި ވީޑިއޯގައި ފެންނަނީ ރާއްޖޭގެ މަޝްހޫރު ތިން ބަތަލާއިން އެއް ސައިކަލެއްގައި ދުއްވާފައިތާތަނެވެ. އެ ސައިކަލުގައި ތިބީ ފިލްމީ ދާއިރާގައި އެންމެގަދައަށް ފިޔަޖަހަމުން އަންނަ ތިން ތަރިން ކަމަށްވާ މަރިޔަމް އައްޒައާއި ނަތާޝާ އަދި އާޝާއެވެ. ފެންނަފެނުމަށް މިއީ އަތޮޅުތެރޭގެ ރަށެއްގައި ހިނގާފައިވާ ކަމެކެވެ.

އެ ވީޑިއޯ ހިއްސާ ކުރަމުން ބުނެފައިވަނީ މައްސަލައަކީ ގަވާއިދު ނޫން ކަމަށާއި ޓްރެފިކް ގަވާއިދަށް އަހުލުވެރިވުމަކީ އާންމުންގެ ކަމެއް ކަމަށެވެ. އަދި އަޚުލާގަކީ އޮންނަ އެއްޗެއް ކަމަށެވެ. މި ވީޑިއޯ އަށް ބައެއް މީހުން ކޮށްފައިވާ ކޮމެންޓަށް ބަލާލާއިރު، ފިލްމީ ތަރިންނާ ނުބެހުމަށާއި މި ގައުމު ސަޅިވާނެ ކަމަށް ބުނެފައި ވެއެވެ. އަދި ރަނގަޅުވާނީ އަދަބު ދީގެން ކަމަށް ވެސް ބުނެފައި ވެއެވެ. މީގެ އިތުރުން ބޮޑު ތިން މީހުންނާއި ކުޑަ ދެ ކުދިން އެއް ސައިކަލުގައި ދިޔަތަން ވެސް މީހަކަށް ފެނުނުކަމަށް ކޮމެންޓެއްކޮށްފައިވާއިރު، ދެމީހުންނަށްވުރެ ގިނަ މީހުން އަރައިގެން ސައިކަލު ދުއްވުމަކީ ހާއްސަކޮށް ކުދި ރަށްރަށުގައި ހުއްދަދޭން ޖެހޭ ކަމެއް ކަމުގައި ވެސް މީހަކުވަނީ ބުނެފައެވެ.

ކޮންމެގޮތެއްވިޔަސް، ރާއްޖޭގައި އެއްގަމު އުޅަނދު ދުއްވުމުގެ ގަވާއިދުގައި ސައިކަލެއްގައި އެންމެގިނަވެގެން ދުއްވޭނީ ދެ މީހުންނަށެވެ.