ދެވަނަ ދައުރެއް ލިބޭގޮތަށް ވެރިކަންކުރަން އެއްވެސް މީހަަކަށް ނޭނގެނީ ކީއްވެތޯ އަލީ ރަމީޒު ސުވާލުކުރައްވައިފިއެވެ.

އޭނާގެ ފޭސްބުކްގައި މި ސުވާލު، ކުރައްވާފައި މިވަނީ ރާއްޖޭގައި މަލްޓި ޕާޓީ ސިސްޓަމަށް ވެރިކަން ކުރަން ފެށިފަހުން އެއްވެސް ޕާޓީއަކަށް ނުވަތަ މީހަކަށް ޖެހިޖެހިގެން ދެ ދައުރު ރާއްޖޭގެ ވެރިކަން ކުރަން ލިބިފައިނުވާތީއެވެ.

އަލީ ރަމީޒު ފޭސްބުކް ގައި ކޮށްފައިވާ ޕޯސްޓްގެ ސްކްރީންޝޮޓެއް

އެގޮތުން ގިނަ ޕާޓީތައް އެކުލެވޭ ނިޒާމު ރާއްޖެއަށް ތައާރަފްވެ، އެންމެފުރަތަމަ ވެރިކަން ލިބުނީ ސިޔާސީގޮތުން ރާއްޖޭގައި އެންމެވަރުގަދަ ޕާޓީ، އެމްޑީޕީއަށެވެ. ރައީސްގެ މަގާމުގެ ހުވާ ކުރައްވާ، ވެރިކަމަށް ވަޑައިގަތީ މުހައްމަދު ނަޝީދުއެވެ. އެހެންނަމަވެސް މާގިނަދުވަހެއް ނުވެ، ރައީސް ނަޝީދު އިސްތިއުފާ ދެއްވުމުން ދެން ވެރިކަމާއި ހަވާލުވެވަޑައިގެންނެވީ ނައިބު ރައީސް ޑރ. މުހައްމަދު ވަހީދު ހަސަން އެވެ. ފަސްއަހަރުގެ ދައުރުގެ ބާކީ އޮތް ބައި ފުރިހަމަކުރައްވައި، ދެވަނަ ދައުރަކަށް ކުރިމަތިލެއްވިނަމަވެސް، ކާމިޔާބެއް ނުކުރެއްވުނެވެ. އެމްޑީޕީގެ ފަސްއަހަރުގެ ރިޔާސީ ދައުރު ނިމި، ރިޔާސީ އިންތިހާބުގެ ވޯޓުލުމުގައި ރައްޔިތުން ބޭނުންވީ ބަދަލަކަށެވެ. އެހެންވެ، ޕީޕީއެމް އަށް ވެރިކަން ހަވާލުކުރިއެވެ. ރައީސް އަކީ އަބްދުﷲ ޔާމީން އަބްދުލްގައްޔޫމެވެ. އެމަނިކުފާނުގެ ފަސްއަހަރުގެ ރިޔާސީ ދައުރަށްފަހު، ދެވަނަ ދައުރަކަށް ކުރިމަތިލެއްވުމުން ރައީސް ޔާމީނަށް ވެސް ކުރިމަތިލެއްވީ ނާކާމިޔާބީ އެވެ. ރައްޔިތުން ނޫނެކޭ ބުނެ، އަނެއްކާ ވެސް ބަދަލަަކަށް އެދި އެމްޑީޕީ އާ ވެރިކަން ހަވާލުކުރިއެވެރިޔާސީ އިންތިހާބުގައި ބޮޑު ތަފާތަކުން، ޕީޕީއެމްގެ މައްޗަށް ކުރި ހޯދައި އިބްރާހިމް މުހައްމަދު ސާލިހު ވެރިކަމުގެ ހުވާ ކުރެއްވިއެވެ. ނަމަވެސް ރައްޔިތުންނަށް ހިދުމަތް ކުރައްވަން ލިބިވަޑައިގަތީ ފަސްއަހަރެވެ. އިތުރު ދައުރެއް ދިނުމަށް ރައްޔިތުން ބޭނުމެއް ނުވިއެވެ.

މި ހުރިހާ ރައީސުން ވެސް ރައްޔިތުންނަށް، ގައުމަށް ކަންތައްތަކެއް ވަނީ ކޮށްދެއްވާފައެވެ. ނަމަވެސް ރައްޔިތުން އަނެއްކާ ވެސް ބޭނުންވީ ބަދަލެކެވެ. މިފަހަރު، ރައްޔިތުން ބޭނުންވީ އެމްޑީޕީ އަދި ޕީޕީއެމްގެ ވެރިކަމެއް ވެސް ނޫނެވެ. ރައްޔިތުން ވެރިކަން ދިނީ ނިސްބަތުން ކުޑަ ޕާޓީއަކަށެވެ. ޕީއެންސީއެވެ. ރައީސްކަމުގެ ހުވާ ކުރައްވައި، ވެރިކަމަށް ވަޑައިގެންނެވީ ޑރ. މުހައްމަދު މުއިއްޒުއެވެ. އެމަނިކުފާނުގެ ވެރިކަމަށް އަދިވަނީ އަހަރެއް ވެސް ނުވެއެވެ. އެންމެ 9 މަހެވެ. ނަމަވެސް ސިޔާސީގޮތުން ފާޑުކިޔުންތައް އަންނަނީ އަމާޒުވަމުންނެވެ. ޑރ. މުއިއްޒު ރައްޔިތުންނަށާއި ގައުމަށް ގިނަ ކަންތައްތަކެއް ކޮށްދިނުމަށް ބޮޑު މެނިފެސްޓޯއެއް އެކުލަވާލިއެވެ. ބައެއް ކަންކަން ދަނީ ކުރައްވަމުންނެވެ.

ބަލަންވީ ރިޔާސީ ފަސް އަހަރުގެ ތެރޭގައި ރައްޔިތުންނަށް، ގައުމަށް ކޮށްދެވޭ ކަންކަމުން ރައްޔިތުންގެ ހިތް ފުރުނުތޯއެވެ. ނޫންނަމަ ރިޔާސީ ދެވަނަ ދައުރަކަށް ރައީސް ޑރ. މުއިއްޒު ކުފޫ ހަމަވޭތޯއެވެ. ގޮތް ނިންމާނީ ރައްޔިތުންނެވެ. މިއީ ޑިމޮކްރަސީގައި އޮންނަ ރިވެތި އުސޫލެވެ.