ބިއްލޫރިއަކީ ދުނިޔެއިން ފެންނަން ހުންނަ މާއްދާތަކުގެ ތެރެއިން އެންމެ ގިނަ ގޮތްގޮތަށް އަދި އެކި ބޭނުންތަކަށް ބޭނުން ކުރެވޭ އެއް މާއްދާއެވެ. ބިއްލޫރިއަކީ އެޔަށް ނުހަނު ހޫނު ކުރުމުން ލިކުއިޑެއްގެ ސިފައިގައި ފެތުރިގެން އަންނަ އެއްޗެކެވެ. ހަމައެއާއެކު މިއީ ޓްރާންސްޕޭރަންޓް، ބޭނުން ބައްޓަމަކަށް ފަސޭހަކަމާއެކު ފަރުމާކޮށްލެވޭ، އަދި މޫސުމީ އަސަރުތަކާއި ދެކޮޅަށް މަސައްކަތްކުރާ ވަރުގަދަ މާއްދާއެކެވެ. މި ހާއްސަ ސިފަތަކުގެ ސަބަބުން އެންމެ އިހު ޒަމާނުން ފެށިގެން މިއަދުގެ ޒަމާނީ ބިނާ ތަކާއި އިމާރާތްތަކުގައިވެސް ބިއްލޫރި ބޭނުން ކުރެވެމުން ދެއެވެ.

ބިއްލޫރި މައިގަނޑު ގޮތެއްގައި އުފެދިގެންވަނީ އާދައިގެ ވެލިންނާއި (ސިލިކާ)، ސޯޑާ އޭޝް (ސޯޑިއަމް ކާބޮނޭޓް)، އަދި ލައިމްސްޓޯން (ކެލްސިއަމް ކާބޮނޭޓް) އިންނެވެ. އާންމުގޮތެއްގައި މި ހުރިހާ މާއްދާއެއް އެކުވެގެން ބިއްލޫރި އުފެދުނެއް ކަމަކު ހަމައެކަނި އާދައިގެ ވެލި ނުވަތަ ސިލިކާއިންވެސް ބިއްލޫރި އުފެއްދޭނެއެވެ. ނަމަވެސް މިގޮތަށް ހަމައެކަނި ސިލިކާ ބޭނުން ކޮށްގެން ބިއްލޫރި ނުއުފައްދަނީ ސިލިކާ އަކީ ވަރަށް މަތީ މެލްޓިންގ ޕޮއިންޓެއް ލިބިގެންވާ މާއްދާއެއް ކަމަށް ވާތީއެވެ. ސިލިކާގެ މެލްޓިންގ ޕޮއިންޓަކީ 1700 ޑިގްރީ ސެލްސިއަސްއެވެ. މި ސަބަބާ ހުރެ މިގޮތަށް އުފައްދާ ބިއްލޫރީގެ މެލްޓިންގ ޕޮއިންޓް ދަށްކުރުމުގެ މަގުސަދުގައި ބިއްލޫރި އުފައްދާއިރު ސިލިކާ އާއެކު ސޯޑާ އޭޝް އެއްކުރެވެއެވެ. މިގޮތަށް މި އުފެއްދުމުގައި އެއްކުރެވޭ ސޯޑާ އޭޝް އަކީވެސް މާ ގިނައިން މި މާއްދާ ބޭނުން ކޮށްފިނަމަ ބިއްލޫރީގެ ބާރު ދަށް ކުރާ އެއްޗެކެވެ. ސޯޑާ އޭޝްގެ ސަބަބުން ބިއްލޫރި ފެނުގެ ތެރެއަށް ގިރިގެން ދެއެވެ. ބިއްލޫރި އުފައްދާއިރު ދެން ބޭނުން ކުރެވޭ މާއްދާ ކަމުގައިވާ ލައިމްސްޓޯން ބޭނުން ކުރެވެނީ މި ސަބަބަށްޓަކައެވެ. ލައިމްސްޓޯން އިން ފެނުގެ ސޮލިއުބިލިޓީ ދަށް ކޮށްދެއެވެ.

ބިއްލޫރި ޝީޓުތަށް އުފެއްދުމުގައި މާއްދާތަށް އެއްކުރާއިރު މި މިކްސްޗަރގެ ތެރެއަށް ލައިމްގެ 6 ޕަސެންޓް އަދި މެގްނީސިއާ ނުވަތަ މެގްނީސިއަމް އޮކްސައިޑްގެ 4 ޕަސެންޓް އެއް ކުރެވެއެވެ. މިއީ ބިއްލޫރި އުފައްދާއިރު މައިގަނޑު ގޮތެއްގައި ބޭނުން ކުރެވޭ މާއްދާތަކުގެ އިތުރުން އެއްކުރެވޭ މާއްދާތަކެކެވެ. މިގޮތުން ބިއްލޫރި ފުޅި ފަދަ ތަކެތި އުފެއްދުމުގައި އެލުމިނިއާ ނުވަތަ އެލުމިނިއަމް އޮކްސައިޑް ގެ 2 ޕަސެންޓް މި މާއްދާތަކާއި އެއްކުރެވެއެވެ.

Advertisement

ވަރަށް އަގުހެޔޮ ބިއްލޫރީގެ ބާވަތްތަށް ފެހި ކުލައަށް އާންމުކޮށް ހުންނަނީ އެ އެއްޗެހި ދަގަނޑު މާއްދާގެ މިންވަރުތަކުން ތަގައްޔަރު ވެފައި ހުންނާތީއެވެ. ނަމަވެސް ބަޔެއް ހާލަތްތަކުގައި ބިއްލޫރި އުފައްދާއިރު އެޔަށް ކުލަ ގެނައުމަށް ތަފާތު ބާވަތް ބާވަތުގެ އޮކްސައިޑްސް އެއްކުރެވެއެވެ. މިގޮތަށް އެކި ކުލަތަށް ގެނައުމަށް ބޭނުން ކުރެވޭ އޮކްސައިޑް ތަކުގެ ތެރޭގައި ގަދަ ނޫ ކުލައެއް ގެނައުމަށް ކޮބަލްޓް އޮކްސައިޑް ބޭނުން ކުރެވެއެވެ. ރީނދުލާއި ދަނބު ކުލަތަށް ގެނައުމުގައި ނިކެލް އޮކްސައިޑް ބޭނުން ކުރެވެއެވެ. ރަތް ބިއްލޫރި އުފެއްދުމުގައި ބޭނުން ކުރެވެނީ ރަން، ކޮޕަރ، ނުވަތަ ސެލީނިއަމް އޮކްސައިޑްސްއެވެ.

އާންމުކޮށް ހުންނަ ސޮލީޑުގެ މާއްދާތަކާއި ހިލާފަށް ބިއްލޫރިއަކީ ކްރިސްޓަލްސްއިން އުފެދިފައި ހުންނަ އެއްޗެއް ނޫނެވެ. އަދި ބިއްލޫރިއަކަށް އެހެން ސޮލިޑްތަކަށް ލިބިގެންވާ ފަދަ ވަރުގަދަ ސްޓްރަކްޗަރ އެއްވެސް ލިބިގެންނެއް ނުވެއެވެ. އެހެންކަމަށް ވުމާއެކު ބިއްލޫރިއަށް ކިޔެނީ އެމޯފަސް ސޮލިޑްއެވެ.

ބިއްލޫރިން ތަފާތު ތަކެތި ފަރުމާކޮށް މިކަމުގައި ބޭނުން ކުރާ އަލިފާންގަނޑު ކޮންޓްރޯލް ކުރާ މީހާއަށް ކިޔަނީ "ޓީޒަރ" އެވެ.