އަންނަ މަހުގެ ނުވަ ވަނަ ދުވަހު ބާއްވާ ރިޔާސީ އިންތިހާބުގައި މޮނިޓަރުންނާއި އޮބްޒާވަރުންނާއި މަންދޫބުންގެ ގޮތުގައި ހަރަކާތްތެރިވުމަށް އެދި 9،887 ފޯމު އިލެކްޝަންސް ކޮމިޝަނަށް ހުށަހަޅައިފި އެވެ.

އިލެކްޝަންސް ކޮމިޝަނުގެ ނައިބް ރައީސް އިސްމާއިލް ހަބީބް ކުރެއްވި ޓްވީޓެއްގައި ވިދާޅުވީ ވޯޓުލާ މަރުކަޒުތަކުގައި ކޮންމެ ޕާޓީއަކުން މަންދޫބުން ބެހެއްޓުމަށް ހުޅުވާލި ފުރުސަތު ބުރާސްފަތި ދުވަހު ހަމަވިއިރު 1،735 މަންދޫބުންގެ އެޕްލިކޭޝަން އެ ކޮމިޝަނަށް ހުށަހަޅާފައިވާ ކަމަށެވެ.

އޭގެ ތެރޭގައި ހިމެނެނީ؛

● ޕީއެންސީގެ 548 ފޯމް

● އެމްޑީޕީގެ 458 ފޯމް

● އެމްއެންޕީގެ 271 ފޯމް

● ދަ ޑިމޮކްރެޓްސްގެ 241 ފޯމް

● ޖޭޕީގެ 217 ފޯމް

ހަބީބް ވިދާޅުވި ގޮތުގައި އިންތިހާބު އޮބްޒާވްކުރުމަށް މޮނިޓަރުންނަށް ވުމަށް އީސީއަށް ލިބިފައި ވަނީ 4،545 ފޯމެވެ. އަދި އޮބްޒާވަރުންނަށް ވުމަށް ހުށަހެޅި ފޯމުގެ އަދަދަކީ 3،609 އެކެވެ. މިއީ ހަމައެކަނި ރާއްޖެއިން ވޯޓުލާ މަރުކަޒުތަކުގައި ހަރަކާތްތެރިވުމަށް ހުށަހެޅި ފޯމުގެ އަދަދެވެ.

ރާއްޖެއިން ބޭރުގެ އެކި ގައުމުތަކުގައި ވޯޓު ފޮށި ބެހެއްޓިޔަސް އެތަންތަނުގައި އޮބްޒާވަރުންނާއި މޮނިޓަރުންގެ ގޮތުގައި ހަރަކާތްތެރިވާނެ އަދަދެއް އަދި ހާމައެއް ނުކުރެ އެވެ.

ހަބީބް ވިދާޅުވީ މި އެޕްލިކޭޝަންތަކުގެ ސައްހަކަން ކަށަވަރުކޮށް އެކްރެޑިޓްކުރުމުގެ މަަސައްކަތް ވަރަށް ބާރަށް ކުރަމުން އަންނަ ކަމަށެވެ. މަންދޫބުންގެ ގޮތުގައި ހުއްދަ ދޭނީ ގާނޫނާއި ގަވައިދުގައި އެކަމަށް ކަނޑައަޅާފައިވާ ޝަރުތު ހަމަވާ މީހުންނަށް އެކަންޏެވެ.

މިފަހަރުގެ ރިޔާސީ އިންތިހާބުގައި އަށް ކެންޑިޑޭޓަކު ވާދަކުރައްވަ އެވެ. މިއީ މިހާތަނަށް ރާއްޖޭގައި ރިޔާސީ އިންތިހާބެއްގައި އެންމެ ގިނަ ކެންޑިޑޭޓުން ވާދަކުރާ ފަހަރެވެ.