ރައީސް އޮފީހުގެ ކުރީގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރުގެ މައްޗަށް އުފުލާފައިވާ ރަސްމީ އިދާރާތަކަށް ދޮގު މައުލޫމާތު ދިނުމާއި، މަނީ ލޯންޑަރ ކުރުމަށް މަގުފަހިކޮށްދިނުމުގެ ދައުވާގެ އަޑުއެހުމެއް އާދިއްތަ ދުވަހަށް ކްރިމިނަލް ކޯޓުގައި ތާވަަލުކޮށްފިއެވެ.

މި އަޑުއެހުން ތާވަލުކޮށްފައިވަނީ އާދިއްތަ ދުވަހުގެ ހެނދުނު 09:00 އަށެވެ.

މި މައްސަލައިގައި އަޑުއެހުމެއް ނުބާއްވާތާ ގިނަ ދުވަސްތަކެއް ވަނީ ވެފައެވެ.

Advertisement

މި މައްސަލައިގައި އެންމެ ފަހުން އަޑުއެހުމެއް ބާއްވާފައިވަނީ 22 މެއި 2023 ގައެވެ. 4 ގަޑިއިރެއްހާއިރަށް ދިގު ދެމިގެންދިޔަ އެ އަޑުއެހުމުގައި ޝަރީއަތުގެ ކުރީގެ ހުށައެޅުންތައް ހުށައެޅުމުގެ ބައި އެއްކޮށް ނިންމައެއް ނުލެވުނެވެ.

އޭގެ ބަދަލުގައި އާޒިމާއާއި ޝަރީއަތުންވެސް ހޫނު ބަހުސެއް ކުރިއަށް ދިޔަ މަންޒަރު އެ ދުވަހުގެ އަޑުއެހުމުގައި ފެނިގެންދިޔައެވެ.

އެއީ ހެއްކާބެހޭ ޤާނޫނާ ޙަވާލާދީ އަލުން ޝަރީއަތުގެ ކުރީގެ ހުށައެޅުންތައް އިސްލާޙު ކުރުމަށްފަހު ހުށައެޅުން ނުވަތަ ހެއްކާބެހޭ ޤާނޫނާ ޙަވާލާދީ ހުށައެޅުންތައް ކުރިއަށް ގެންދިއުމަށް އާޒިމާ ފުރުސަތަކަށް އެދިލެއްވުމުންނެވެ.

އެ ދުވަހު ދެފަރާތުން ދެއްކެވި ވާހަކަތަކަށް ރިއާޔަތް ކުރައްވައި ގާޒީވެސް ނިންމެވީ ހެއްކާބެހޭ ޤާނޫނު ރަޖުއީކޮށް ތަތުބީޤު ނުކުރެވޭނެ ކަމަށާއި، ޝަރީއަތުގެ މަރުޙަލާގައި ހެއްކާބެހޭ ޤާނޫނަށް ޙަވާލާ ދެވިދާނެ ކަމަށެވެ. ނަމަވެސް ޝަރީއަތުގެ ކުރީގެ ހުށައެޅުންތައް ހަމަ ލިއުމުން ހުށައަޅާފައިވާ ގޮތަށް ކުރިއަށް ގެންދިއުމަށް ގާޒީ އެ ދުވަހު ދެންނެވިއެވެ.