ސައިކަލަކުން ޖެހި ކުޑަކުއްޖަކަށް އަނިޔާވެއްޖެ
ހުޅުމާލޭ ގައި މަގު ހުރަސްކުރަން ހުރި އުމުރުން 6 އަހަރުގެ ކުޑަކުއްޖެއްގެ ގައިގައި ސައިކަލަކުން ޖެހި އެ ކުއްޖާއަށް ބޮޑެތި އަނިޔާތަކެއް ވެއްޖެ އެވެ.
ފުލުހުން ބުނީ މި އެކްސިޑެންޓް ހިނގީ ހުޅުމާލެ ނިރުޅުމަގުގައި ހުންނަ އެލް މޯބައިލް 3 ފިހާރަ ކައިރިންނެވެ. އެއީ މިދިޔަ ހުކުރު ދުވަހު ހަވީރު ހިނގި އެކްސިޑެންޓެއް ކަމަށް ފުލުހުން ވަނީ ބުނެފައެވެ. މީގެ އިތުރުން ފުލުހުން ބުނީ މި އެކްސިޑެންޓުގެ ސަބަބުން ކުޑަކުއްޖާގެ ކަކޫ މަށައިގެން ގޮސް ތުންފަތުން ބައި އިންޗިއެއްހާ ތަން ފަޅައިގެން ގޮސް، އިތުރު ކުދި އަނިޔާވެފައިވާ ކަމަށެވެ.
މި އެކްސިޑެންޓުގައި ހިމެނޭ ސައިކަލު ދުއްވާފައިވަނީ އެ ކެޓެގަރީގެ އުޅަނދު ދުއްވުމުގެ ލައިސެންސް އޮންނަ މީހެއް ކަމަށް ފުލުހުން ވަނީ ބުނެފައެވެ.
މި މައްސަލަ ފުލުހުން ދަނީ ތަހްޤީޤް ކުރަމުންނެވެ.