ބޭއަދަބީކޮށް ކަސްޓަމަރަކާ ވާހަކަދެއްކި ޓެކްސީ ޑްރައިވަރެއްގެ މައްސަލަ ބަލައި، ޓެކްސީގެ ހިދުމަތް ފޯރުކޮށްދޭ ''އަވަސް'' އެޕު ބޭނުން ނުކުރެވޭ ގޮތް ހަދައި އޭނާ އާމެދު އަވަސް އެންޓަޕްރައިޒެސް އިން މިއަދު ފިޔަވަޅު އަޅައިފި އެވެ.

އެ މައްސަލައާ ގުޅިގެން އަވަސް އެންޓަޕްރައިޒެސްއިން މިއަދު ނެރުނު ބަޔާނުގައި ބުނީ އެކަން ހިނގީ އަވަސް އެޕްގެ ޑްރައިވަރު މުހައްމަދު ވާފިރު މިދިޔަ ހޮނިހިރު ދުވަހު ހުޅުމާލެއިން މާލެއަށް ދާން މީހަކު ނަގައިގެން ކުރި ދަތުރެއްގެ ތެރެއިން ކަމަށެވެ.

އަވަސް އެންޓަޕްރައިޒެސްއިން ނެރުނު ނޫސް ބަޔާން / ފޮޓޯ: އެކްސް، އަވަސް އެޕް

"މި މައްސަލައާ ގުޅިގެން ދެ ފަރާތާއި ވާހަކަ ދައްކަައި ތަހުގީގު ކުރުމަށް ފަހު މާޗު 2، 2025 އިން ފެށިގެން މި ކުންފުނިން އެ ޑްރައިވަރަށް ދީފައިވާ ހުރިހާ ހިދުމަތެއް އަވަސް އެޕް އިން ވަނީ ދާއިމީ ގޮތެއްގައި ކަނޑައިލެވިފަ އެވެ." އަވަސް އެންޓަޕްރައިޒެސްއިން ނެރުނު ނޫސް ބަޔާނުގައި ބުނެފައިވެއެވެ.

މީގެ އިތުރުން އަވަސް އެންޓަޕްރައިޒެސްއިން ބުނީ އެ ޑްރައިވަރުގެ މައްސަލަ ފުލުހުންނަށާއި ޓްރާންސްޕޯޓް މިނިސްޓްރީއަށް ވެސް ހުށަހަޅާފައިވާ ކަމަށެވެ. 

އަވަސް އެންޓަޕްރައިޒެސްއިން ވަނީ ބޭއަދަބީކޮށް ވާހަކަދެއްކި ޑްރައިވަރުގެ އަމަލުތަކަށް މައާފަށް އެދި އެފަދަ ކަންކަން ތަކުރާރުވިޔަ ނުދިނުމަށްޓަކައި ކުރިއަށް އޮތް ތަނުގައި ވެސް އެފަދަ އަމަލުތައް ހިންގާ ޑްރައިވަރުންނަށް ފިޔަވަޅު އަޅާނެ ކަމުގެ ޔަގީންކަން ދީފަ އެވެ.