ފުވައްމުލަކު ޑްރަގް ނެޓްވޯކްގެ މައްސަލާގައި ދެ މީހަކަށް ދައުވާކޮށްފި
ފުވައްމުލަކު ސިޓީގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ ކަމަށް ތުހުމަތުކޮށް ފުލުހުން އަތުލައިގަތް ނެޓްވޯކުގެ އިސް ދެ މީހުންގެ މައްޗަށް ޕްރޮސެކިއުޓާ ޖެނެރަލްގެ އޮފީސް (ޕީޖީ)އިން މަނީ ލޯންޑަރިންގެ ދައުވާ އިއްޔެ ކޮށްފި އެވެ.
މި މައްސަލައިގައި ދައުވާކޮށްފައިވަނީ ޏ. ފުވައްމުލަކު ދޫޑިގަން، ކަރަންކާވިލާ އުމުރުން 34 އަހަރުގެ އަހުމަދު ނިއުޝާދާއި ޏ. ފުވައްމުލަކު ދޫޑިގަން، ޒަމާނީގެ އުމުރުން 29 އަހަރުގެ ހަސަން އާޒިމްގެ މައްޗަށެވެ.
މި ދެ މީހުން ހައްޔަރުކުރީ މިދިޔަ އަހަރުގެ ޑިސެމްބަރު މަހު ފުލުހުން ހިންގި ހާއްސަ އޮޕަރޭޝަނެއްގައި އެވެ.
ޕީޖީ އޮފީހުން މިއަދު ނެރުނު ބަޔާނެއްގައި ބުނީ، އެ ދެ މީހުންގެ މައްޗަށް ދައުވާ ކުރުމަށް އިއްޔެ ކްރިމިނަލް ކޯޓަށް ހުށަހަޅާފައިވާ ކަަމަށެވެ.
އާޒިމްގެ މައްޗަށް މަނީލޯންޑަރިންގެ ދައުވާ އުފުލީ މަސްތުވާތަކެއްޗާ ގުޅުންހުރި އެކި މީސްމީހުންގެ އެކައުންޓުތަކުން ޖުލައި، 2019 އިން ފެށިގެން އޮގަސްޓް، 2024 އާ ދެމެދު އޭނާގެ އެކައުންޓުތަކަށް ޖަމާކުރި 5 މިލިއަނަށް ވުރެ ގިނަ ރުފިޔާއަކީ ކުށް ކޮށްގެން ހޯދާފައިވާ ފައިސާ ކަމަށް ޝައްކު ކުރެވޭއިރު އެ ފައިސާ އާޒިމްގެ އަތުގައި ބަހައްޓައި، ބޭނުންކޮށްފައިވާތީ ކަމަށް ޕީޖީ އޮފީހުން ނެރުނު ބަޔާނުގައިވެ އެވެ.
ނިއުޝާދުގެ މައްޗަށް މަނީ ލޯންޑަރިންގެ ދައުވާކުރީ މަސްތުވާތަކެއްޗާ ގުޅުންހުރި އެކި މީސްމީހުންގެ އެކައުންޓުތަކުން ޖުލައި، 2019 އިން ފެށިގެން އޮގަސްޓް، 2024 އާ ދެމެދު އޭނާގެ އެކައުންޓުތަކަށް ޖަމާކުރި 21 މިލިއަނަށް ވުރެ ގިނަ ރުފިޔާ އަކީ ކުށް ކޮށްގެން ހޯދާފައިވާ ފައިސާ ކަމަށް ޝައްކު ކުރެވޭއިރު އެ ފައިސާ އާޒިމްގެ އަތުގައި ބަހައްޓައި ބޭނުންކޮށްފައިވާތީ ކަމަށް ޕީޖީ އޮފީހުން ނެރުނު ބަޔާނުގައިވެ އެވެ.
އެ ދެ މީހުންގެ މައްޗަށް ދައުވާ ކުރިއިރު، މަސްތުވާތަކެއްޗަށް ޚާއްސަކޮށް ހިންގި އޮޕަރޭޝަންތަކުން ފުވައްމުލައް ސިޓީގައި އޮންނަ މަސްތުވާތަކެތީގެ ނެޓްވޯކުތައް މިދިޔަ އަހަރު ތެރޭގައި އެއްކޮށްހެން ނައްތާލެވިފައިވާ ކަމަށް ހޯމް މިނިސްޓަރު އަލީ އިހުސާން ކުރިން ވަނީ ވިދާޅުވެފައެވެ.