AK47ގެ ބައްޕައަކީ ރަޝިޔާގެ ރައްޔިތެއްކަމަށްވާ މިހައިލް ކަލަސްނިކޯވް އެވެ. މިހައިލް ކަލަސްނިކޯވް AK47 ގެ ބައްޕަގެ ނަމުން މަޝްހޫރުވެފައިވަނީ، މިބަޑިއަކީ އޭނާގެ އުފެއްދުމަކަށް ވާތީއެވެ. AK47 ގެ ބައްޕަގެ ނަމުން ދުނިޔޭގެ މަޝްހޫރުކަން ހޯދާފައިވާ މިހެއިލް ކަލަސްނިކޯވް އުފަންވެފައިވަނީ 1919 ވަނަ އަހަރުގެ ނޮވެމްބަރު މަހުގެ 10 ވަނަ ދުވަހު ރަޝިޔާގެ އާދައިގެ އަވަށަކަށެވެ. ކަލަސްނިކޯވް ސެކެންޑްރީ ސްކޫލް ނިންމުމަށްފަހު ޓެކްނިކަލް މުވައްޒަފެއްގެ ގޮތުގައި ރަޝިޔާގެ ޓާރކިސްތާން ރެއިލްވޭ ޑިޕާރޓްމަންޓްގައި މަސައްކަތްކޮށްފައި ވެއެވެ. އަދި 1938 ވަނަ އަހަރު ރަޝިޔާގެ އަސްކަރިއްޔާގެ ޚިދުމަތާ ގުޅިފައިވާއިރު، އޭނާ ތަޢުލީމް ހާޞިލްކޮށްފައިވަނީ ރަޝިޔާ އާރމީގެ ސްކޫލް އޮފް ޓޭންކް ޑްރައިވަރސް އިންނެވެ. ތަޢުލީމް ހާޞިލްކުރުމަށްފަހު، އަސްކަރިއްޔާގައި ޓޭންކް ކޮމާންޑަރެއްގެ ގޮތުގައި މަސައްކަތް ކޮށްފައި ވެއެވެ.

1941 ގައި އައު އީޖާދުތައް ކުރާ މީހެއްގެ ގޮތުގައި މިލިޓްރީ ޑިސްޓްރިކްޓްގެ ކޮމާންޑަރ ޖެނެރަލް އޮފް ދަ އާރމީ ޖޭކޭ ޖުކޯވް ކައިރީގައި އޭނާގެ އުފެއްދުންތައް ހަޤީޤަތަށް ހެދުމުގެ މަސައްކަތުގައިވެސް ކަލަސްނިކޯވް ވަނީ މަސައްކަތް ކޮށްފައެވެ. އެއަށްފަހު 1941 ވަނަ އަހަރުގެ އޮކްޓޯބަރ މަހު ހަނގުރާމައެއްގައި އޭނާ ވަރަށް ބޮޑަށް ޒަޚަމްވުމާ ގުޅިގެން ހޮސްޕިޓަލްގައި ވަނީ ދުވަސްތަކެއް ހޭދަކޮށްފައެވެ. މި ދުވަސްވަރު ވެގެންދިޔައީ، އެތައް ޒަމާނަކަށް ދުނިޔޭގައި ބޭނުންކުރެވޭނެ ބަޑިއެއް ދުނިޔެއަށް އުފަން ކުރުވަން މެދުވެރިވި ސަބަބަކަށެވެ.

ނަތީޖާއެއްގެ ގޮތުން 1944 ވަނަ އަހަރު ކަލަސްނިކޯވް އެސޯލްޓް ރައިފަލެއް އުފެއްދިއެވެ. އަދި 1947 ވަނަ އަހަރު މިބަޑިއަށް އިތުރު ބަދަލުތައްގެނެސް، މިހާރު އެންމެން ދަންނަ AK47  ބަޑި ވުޖޫދަށް ގެނައެވެ. މިހާހިސާބުން ކުރެވުނު އެކި ޓެސްޓްތަކަށްފަހު، ކަލަސްނިކޯވްގެ ދަރިފުޅުކަމަށްވާ AK47 ހަނގުރާމައިގެ މައިދާންތަކުގައި ބޭނުން ކުރަން ފެށިގެން ދިޔައެވެ. މިއީ، AK47 އަދި އޭނާގެ ބައްޕައާބެހޭ ގޮތުން ލިބެންހުރި މަޢުލޫމާތުގެ ކުޑަކުޑަ މިންވަރެކެވެ.

Advertisement

މިހާހިސާބުން ދެން އުފެދޭ ސުވާލަކީ، AK47 ޔަތީމުވެ ހަނގުރާމަވެރިންގެ އަތްދަށުވި ސަބަބެވެ. AK47 ނުވަތަ ހަނގުރާމައިގެ މައިދާނުގެ ރަސްގެފާނު ޔަތީމު ހަނގުރާމަވެރިންގެ އަތްދަށުވެފައިވަނީ، މިހައިލް ކަލަސްނިކޯވް މިދުނިޔެ ދޫކުރުމުންނެވެ. ކަލަސްނިކޯވް މިދުނިޔޭގައި ނެތަސް، އޭނާގެ ދަރިފުޅު AK47 އަކީ ހަނގުރާމަވެރިންނާއި ޤައުމުތަކުގެ އަސްކަރިއްޔާތަކުން އެންމެ ބޮޑަށް ބަރޯސާވާ އެއް ހަތިޔާރަށް މިއަދު މިވަނީ ވެފައެވެ. ދުނިޔޭގެ އެންމެ ގިނަ މީހުން ބޭނުންކުރާ މިބަޑި ދުނިޔޭގެ އެކި ކަންކޮޅުތަކުގައި 100 މިލިއަނަށްވުރެ ގިނައިން ވިކިފައިވާއިރު، މިބަޑި އެންމެ ގިނައިން ބޭނުކުރަމުންދަނީ ޓެރަރިސްޓް ޖަމާޢަތްތަކުން ކަމަށް ދިރާސާތަކުން ހާމަވެއެވެ.

މިހައިލް ކަލަސްނިކޯވްގެ 90 ވަނަ އުފަންދުވަސް ފާހަގަކުރުމުގެ ގޮތުން ކްރެމްލިންގައި ބޭއްވި ޙަފުލާއެއްގައި ވާހަކަ ދައްކަމުން، އޭނާ ބުނެފައިވަނީ، AK47 އުފެއްދީ "އޭނާގެ ޤައުމު ދިފާޢު" ކުރުމަށް ކަމުގައެވެ. އެހެން ނަމަވެސް، މިއަދު ދުނިޔޭގެ އެކި ހިސާބުތަކުގައި، މިބަޑި ބޭނުންކުރަންނުޖެހޭ މީހުން، ބޭނުންކުރަމުންދާކަން އޭނާ ފާހަގަކޮށްފައިވާއިރު، މިއީ އޭނާގެ މައްސަލައެއް ނޫންކަމަށް ވަނީ ބުނެފައެވެ. އަދި އެއީ ސިޔާސީ ބޭނުމަކަށްޓަކައި ބަޔަކު ކުރަމުންދާކަމެއްކަމަށްވެސް އޭނާ ވަނީ ބުނެފައެވެ. މިއީ، އޭނާގެ ދަރިފުޅު ގޯސްމަގަކުން ނުދާނެކަމުގެ ޔަޤީންކަން އޭނާ މުޅި ދުނިޔެއަށް ހާމަކުރި ދުވަހެވެ.

ދުނިޔޭގައި މިހާތަނަށް 100 މިލިއަނަށްވުރެ ގިނަ AK47 ގެ ރައިފަލްތައް ވިއްކާފައިވާއިރު، މިބަޑި އުފެއްދި މިހައިލް ކަލަސްނިކޯވަށް މާބޮޑު ފައިދާއެއް މިވިޔަފާރިން ކޮށްފައިނުވާކަމީވެސް ފާހަގަކޮށްލަންޖެހޭ ކަމެކެވެ. AK47 ގެ ބައްޕަ މަރުވެ އޭނާ ޔަތީމު ހަނގުރާމަވެރިންގެ އަތްދަށު ވެފައިވީނަމަވެސް، AK47 ގެ ކުރިމަގު ފެންނަނީ އުޖާލާކޮށެވެ. މީގެ ހެއްކަކަށް ދުނިޔޭގެ އެކިކަންކޮޅުތަކުގައި ހަރަކާތްތެރިވާ ޓެރަރިސްޓު ޖަމާޢަތްތަކާއި، ވަކިވެގަތުމަށް މަސައްކަތްކުރާ ހަނގުރާމަވެރިން މިބަޑި އެމީހުންގެ ހަނގުރާމަތަކުގައި ބޭނުން ކުރަމުންދާ ދިއުން ފުދެއެވެ. ދިރާސާތަކުން ދައްކާގޮތުން މިއީ "ޗައިލްޑް ސޯލްޖަރސް" ނުވަތަ ހަނގުރާމައިގެ މައިދާނުގައި ހަރަކާތްތެރިވާ ކުޑަކުދިން ވަރަށް ގަޔާވާ ބަޑިއެކެވެ.

އަސާސީ ތަމްރީނުގެ ދުވަސްވަރު، AK47 ގެ ސަބަބުން އަހަރެމެންގެ ޤާބިލްކަމާއި ކެރުމާއި ހިތްވަރު އިހުނަށްވުރެ އިތުރުވެފައިވާއިރު، އަހަރަމެންގެ ގާތް ރަޙުމަތްތެރިޔާ މިއަދު މިވަނީ ޓެރަރިސްޓް ހަނގުރާމަވެރިންގެ އަތްދަށުވެ، ހަނގުރާމައިގެ އަސީރަކަށް ވެފައެވެ. އެހެން ނަމަވެސް، ޔަތީމުވިޔަސް އަދި އަތްދަށުވިޔަސް، AK47 އަށް މިކަމުން ކުރާނެ އެއްވެސް އަސަރެއް އޮތްކަމަކަށް ނުފެނެއެވެ. ސަބަބަކީ ދުނިޔޭގެ އެކިކަންކޮޅުތަކުގައި AK47 ހަނގުރާމަވެރިންގެ އަތްދަށުވެފައިވީނަމަވެސް، އޭނާ ދުވަސްތައް ވޭތުކުރަމުންދަނީ ފުރިހަމަ ލޯތްބާއި އަޅާލުން ލިބިގެންކަމުގައިވާތީއެވެ. އެއީ ފަހަރުގައި ޓެރަރިސްޓުންގެ ލޯބިކަމަށްވެސް ވެދާނެއެވެ.