މާލޭގައި ދެމުންގެންދާ އާރްޓީއެލް ބަހުގެ ހިދުމަތުގައި ހިމެނޭ އޯކިޑް ރޫޓުގެ ބަސް ދަތުރުތަކަށް ވަގުތީގޮތުން ބަދަލު ގެނެސްފިއެވެ.

އެމްޓީސީސީ އިން ބުނީ ބަދަލު ގެނައީ މިއަދުން ފެށިގެން ހޮނިހިރު ދުވަހުގެ ނިޔަލަށް ކަމަށެވެ. މިގެނައި ބަދަލާ އެކު ހޮނިހިރު ދުވަހުގެ ނިޔަލަށް އޯކިޑު ރޫޓުގެ ބަސް ދަތުރުކުރާނީ އަމީރު އަހުމަދު މަގާއި ސޯސަން މަގުންނެވެ. އެމްޓީސީސީ އިން ބުނި ގޮތުގައި ވަގުތީ ގޮތުން މިބަދަލު ގެނައީ ހެންވޭރު ދަނޑުގައި ކުރިއަށްދާ ނެސްލޭ ކިޑްސް ފުޓްބޯލް ފިއެސްޓާ މުބާރާތާ އެކު އެ ސަރަހައްދުގެ ޓްރެފިކަށް ވަގުތީ ބަދަލެއް ގެނައުމަށް ފުލުހުން ނިންމުމާ ގުޅިގެންނެވެ.

ވަގުތީ މިބަދަލާ ގުޅިގެން މިމުއްދަތުގައި އޯކިޑް ރޫޓުގެ ބަސްތައް ފަސް ނަންބަރު ޖެޓީ، އެމްޓީސީސީ ޓަވަރު، އާޓިފިޝަލް ބީޗު ސަރަހައްދު، ކާނިވާ ސަރަހައްދު އަދި މުނި އުފާ ބަސްހުއްޓިއަށް މަޑެއްނުކުރާނެއެވެ.

Advertisement

މާލޭގައި މިނީ ބަސް ދަތުރުގެ ޚިދުމަތް ދޭންފެށީ 2022 ވަނަ އަހަރުގެ ސެޕްޓެމްބަރ މަހުގެ 5 ވަނަ ދުވަހުއެވެ. މާލެ ސަރަހައްދުގައި މިނީ ބަހުގެ ޚިދުމަތް ދިނުމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރިޔާސީ ވައުދެކެވެ.