ޢުންމީދަކީ ކުރިއަށް އޮތްނަ މަޖިލިސް އިންތިޚާބުގައި ޕީޕީއެމް/ޕީއެންސީއަށް ސުޕަރ މެޖޯރިޓީ ހޯދުންކަމަށް އިންތިޚާބީ ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، އަމިއްލަ ޓީވީ ޗެނަލަށް ދެއްވި އިންޓަވިއުއެއްގައެވެ.

އިންތިހާބީ ރައީސް ޑރ. މުޙައްމަދު މުއިއްޒު ވިދާޅުވީ، ނިމުނު ރިޔާސީ އިންތިހާބުގައި ރައްޔިތުންގެ ފަރާތުން ފެނިގެންދިޔައީ ޕީޕީއެމް ޕީއެންސީއާއިއެކު ޤައުމުގައި ހުރި މައްސަލަތައް ހައްލު ކުރުމުގައި ރައްޔިތުން ކުރިއަށްދިއުމަށް ބޭނުންވެފައި ތިބި މަންޒަރުކަމަށެވެ. އެހެންކަމުން މަޖިލިސް އިންތިހާބުގައިވެސް މި މަންޒަރު ފެންނާނެކަމަށް އުންމީދުކުރައްވާކަމަށް އިންތިޚާބީ ރައީސް ވިދާޅުވިއެވެ.

ރާއްޖޭގެ އިޤްތިސާދު ރަނގަޅުކުރުމާއި، ޚާރިޖީ ސިޔާސަތު ހަމަމަގަށް އެޅުވުން ފަދަ މުހިންމު ކަންކަން ކުރުމަށް ރައްޔިތުންގެ މަޖިލީހުގެ ދައުރަކީ ވަރަށް މުހިންމު ދައުރެއްކަން ފާހަގަކުރައްވައި ޑރ.މުއިއްޒު ވިދާޅުވީ، އުންމީދުކުރައްވަނީ މަޖިލީހުގެ ސުޕަރ މެޖޯރިޓީ އެ ކޯލިޝަނުން ހޯއްދެވުންކަމަށެވެ. އައު ސަރުކާރަށް ކަންކަން ބާރު ސްޕީޑްގައި ކުރިއަށްގެންދެވޭނީ މެޖޯރިޓީ ލިބިގެންކަން ފާހަގަކުރައްވާ އިންތިޚާބީ ރައީސް ވިދާޅުވީ އަލަށް އިންތިޚާބުވާ މަޖިލީހުން 60އަށްވުރެ ގިނަ ގޮނޑި ކާމިޔާބުކުރުމަށް ޢަމާޒުކުރައްވާފައިވާކަމަށެވެ.

Advertisement

އަންނަ އަހަރު އޮންނަ މަޖިލިސް އިންތިޚާބުގައި 93 ދާއިރާއަކަށް މެންބަރުން އިންތިޚާބުކުރާނެއެވެ.

"އަޅުގަނޑުގެ އަމާޒަކީ ވީހާވެސް ގިނަ މެންބަރުން ހޮވުން. އެންމެ ބޮޑަށް މި ބޭނުންވަނީ ޓޫ-ތާރޑް މެޖޯރިޓީއެއް ހާސިލްކުރެވޭވަރަށް މެންބަރުން ހޮވުން. މާނައަކީ 60 އަށްވުރެ ގިނަ މެންބަރުން ޕީޕީއެމް ޕީއެންސީގެ ފަރާތުން މަޖިލީހުގައި އަދި އަޅުގަނޑުމެންނާއި ގުޅިފައި ތިބި މެންބަރުންނާއި އެކީގައި އަޅުގަނޑުމެންގެ ކޯލިޝަންއަށް އިރާދަކުރެއްވިއްޔާމު ސްޕަރ މެޖޯރިޓީއޭ މިކިޔާ ގޮތައް ލިބޭވަރަށް މަސައްކަތް ކުރުން." މުއިއްޒު ވިދާޅުވިއެވެ.

އިންތިޚާބީ ރައީސް ވިދާޅުވީ، އުންމީދުކުރައްވަނީ އަލަށް ހޮވޭ މަޖިލީހުގައި ތިއްބަވާނީ ވަރަށް ބޮޑަށް ރައްޔިތުން ބަލައިގަންނަ، ތައުލީމީ ބޭފުޅުންނަށް ވުމަށްކަމަށެވެ. އަދި މަޖިލީހުގެ 3 ބައިކުޅަ 1 ބައި އަންހެން ބޭފުޅުންނަށް ވުމަކީވެސް ބޭނުންފުޅުވާ ކަމެއްކަމަށް އިންތިޚާބީ ރައީސް ވިދާޅުވިއެވެ. ޕީޕީއެމް/ޕީއެންސީގެ ޕްރައިމަރީގައިވެސް އަންހެން ބޭފުޅުން ވާދަކުރުމަށް ވަރަށް ބޮޑަށް ހިތްވަރުދެއްވާނެކަމަށް އެމަނިކުފާނު ވިދާޅުވިއެވެ.

ހިނގަމުން މިދާ 19 ވަނަ ރައްޔިތުންގެ މަޖިލީހުގެ ދައުރު ހަމަވާނީ އަންނަ އަހަރުގެ މެއި މަހަށެވެ. ރައްޔިތުންގެ މަޖިލީހުގެ އިންތިޚާބު އަންނަ އަހަރުގެ އޭޕްރީލް މަހު ބޭއްވުމަށް އިލެކްޝަންސް ކޮމިޝަނުން އަންނަނީ މަސައްކަތް ކުރައްވަމުންނެވެ.