ލެޕްރަސީ ނުވަތަ ޖުޒާމް ބަލި ނެތް ގައުމެއްގެ ގޮތުގައި ރާއްޖެ ކަނޑައެޅުމަށް ބޭނުންވާ ޝަރުތު ރާއްޖޭން ފުރިހަމަކޮށްފިއެވެ.

ލެޕްރަސީ ނުވަތަ ޖުޒާމް ބަލި ނެތް ގައުމެއްކަން ކަނޑައެޅުމަށް ރާއްޖެއަށް ބޭނުންވާ އެންމެ މުހިންމު އެއް ޝަރުތަކީ 100 ރަށުގައި ޖުޒާމް ބަލި ނެތްކަން ކަށަވަރުކުރުމެވެ. ހެލްތު މިނިސްޓްރީން ވިދާޅުވިގޮތުގައި ރާއްޖޭގެ 178 ރަށެއް، ލެޕްރަސީ ނެތް ރަށްތަކުގެ ގޮތުގައި ކަނޑައެޅުމަށް ވަނީ ޝަރުތު ހަމަ ވެފައެެވެ.

ހެލްތް މިނިސްޓްރީން ވަނީ 2023 ވަނަ އަހަރުގެ ނިޔަލަށް ރާއްޖޭގައި މަދުވެގެން 100 ރަށެއްގައި ލެޕްރަސީ ނެތްކަން ކަނޑައެޅުމަށް "ފްރޭމްވޯކް ފޯރ ޒީރޯ ލެޕްރަސީ" ގެ ނަމުގައި 2019 ވަނަ އަހަރު ފްރޭމްވޯކެއް ވަނީ ތައާރަފްކޮށްފައެވެ.

Advertisement

އެގޮތުން ސިއްޙީ ޚިދުމަތްތެރިންނަށް މިކަމާއި ގުޅޭ މަޢުލޫމާތު ފޯރުކޮށްދީ، ރަށްރަށުން ސްކްރީންކޮށް ބަލި ރާއްޖޭގައި އުޅޭތޯ ދެނެގަތުމުގެ މަސައްކަތް ވަނީ ފަށައިފައެވެ. އެގޮތުން މިއަހަރުގެ ނިޔަލަށް މި 100 ރަށަކީ ލެޕްރަސީ ނެތް ރަށްތަކެއްގެ ގޮތުގައި ކަނޑައެޅުމަކީ، ރާއްޖެ "ޒީރޯ ލެޕްރަސީ" ލަނޑުދަނޑު ހާސިލު ކުރުމަށް ކުރެވޭ ބޮޑު މަސައްކަތެއް ކަމަށް ވިދާޅުވެއެވެ.

ހެލްތް މިނިސްޓްރީން ވިދާޅުވީ ލެޕްރަސީ ނެތް ގައުމެއް ގޮތުގައި ރާއްޖެ ކަނޑައެޅުމަށް ބޭނުންވާ އިންޓާރނަލް އަދި އެކްސްޓާރނަލް ވެރިފިކޭޝަންގެ މަސައްކަތް ނިމި، މިއަހަރުގެ ނިޔަލަށް ރާއްޖޭއިން މަދުވެގެން 100 ރަށުގައި ލެޕްރަސީ ނެތްކަން ކަނޑައެޅުމަށް ދުނިޔޭގެ ސިއްހަތު ޖަމިއްޔާގެ އެހީގައި އެކުލަވާލާފައިވާ "ޒީރޯ ލެޕްރަސީ ފްރޭމްވޯރކް" ހިމަނާފައިވާ ގިނަ ލަނޑުދަނޑިތަކެއް ހާސިލްކުރެވިފައިވާ ކަމަށެވެ.

މި ފްރޭމްވޯކްގެ މަސައްކަތްތައް ކުރިއަށް ގެންދިއުމަށާއި މި ފްރޭމްވޯކްގެ ލަނޑުތަނޑިތައް ހާސިލް ވަމުންދާ މިންވަރު ބެލުމަށް ދުނިޔޭގެ ސިއްހަތު ޖަމިއްޔާގެ ޓީމެއް ވަނީ ރާއްޖެ އައިސްފައެވެ. އަދި "ޒީރޯ ލެޕްރަސީ ފްރޭމްވޯރކް" ގެ ލަނޑުދަނޑިތައް ހާސިލް ކުރެވުނު މިންވަރާ ގުޅޭގޮތުން ދުނިޔޭގެ ސިއްޙަތު ޖަމިއްޔާގެ ފަރާތުން ވަޑައިގެންނެވި އެކްސްޕާރޓް ޓީމާއެކު މަޝްވަރާކުރައްވާފައިވާކަމަށް ހެލްތު މިނިސްޓްރީން ވިދާޅުވެއެވެ.

ޖުޒާމް ބަލި ފެތުރެނީ ބެލިޖެހިފައި ހުރިކަން ނޭނގިހުރެ އަދި ފަރުވާ ނުކޮށް ހުންނަ މީހަކާއެކު ގިނަ ދުވަހު އުޅުމުންނެވެ.