ކާޓިލޭޖަކީ ހަށިގަނޑުގެ އެކި ގުނަވަންތަކުން ފެންނަން ހުންނަ އެއްޗެކެވެ. ކަންފަތް ފަހަތަށް ކުރިއަށް ތަޅުވާލައިފިނަމަ ކަންފަތުގައި ހުންނަ ކާޓިލޭޖްތައް އިހުސާސުވާނެއެވެ.

ކޮންޑްރޮސައިޓްސް ނަމަކަށް ކިޔޭ ސެލްސްތަކަކުން އުފެދިފައިވާ ކާޓިލޭޖަކީ، ކޮލާޖެންގެ ފައިބަރ އެކުލެވޭ، ޖެލީ ފާޑުގެ ގްރައުންޑް ސަބްސްޓެންސްއަކާ އެކުވެފައި ހުންނަ އެއްޗެކެވެ. އަދި، މި ހުރިހާ އެއްޗެއް ހުންނަނީ ވަރުގަދަ ފައިބަރގެ ބާވަތަކުން ވަށާލެވިފައެވެ. ކާޓިލޭޖަކީ އޭގެ ތިން ތަފާތު ބާވަތެއް ހުންނަ އެއްޗެކެވެ. މި ބާވަތްތަކަކީ ހަޔަލިން، ފައިބްރަސް، އަދި އިލާސްޓިކް ކާޓިލޭޖެވެ.

މީގެތެރެއިން ހަޔަލިން ކާޓިލޭޖަކީ އިންސާނާގެ ހަށިގަނޑުގައި އެންމެ ބޮޑަށް ފެތުރިފައިވާ ކާޓިލޭޖުގެ ބާވަތެވެ. ހަޔަލިން ކާޓިލޭޖަކީ އޭގެ ޒާތުގައި ހަރުކަމެއް ލިބިފައިވާ، ހުދުކޮށް ސާފުކޮށް ހުންނަ އެއްޗެކެވެ. ހަމައެއާއެކު ކާޓިލޭޖުގެ މި ބާވަތަކީ އިންސާނާގެ ހުޅުތަކާއި ކަށިތަކާ ދެމެދު ފެންނަން ހުންނަ، ޖެހޭޖެހުމުން މި ތަންތަނަށް ކުޝަނިންގ ފޯރުކޮށްދޭ އެއްޗެކެވެ.

Advertisement

ފައިބްރަސް ކާޓިލޭޖަކީ ނުހަނު ވަރުގަދަ ކާޓިލޭޖުގެ ބާވަތެކެވެ. މިއީ ސްޕައިންއާއި ކަކުލުގެ ކަށިތަކުގެ ދެމެދުގައި ހުންނަ ކާޓިލޭކެވެ. ކަކުލުގައި ހުންނަ ކާޓިލޭޖުން، ތައި ބޯން އަދި ޝިން ބޯންއާ ދެމެދު "މެނިސްކީ" އޭ ކިޔޭ އެއްޗެއް އުފައްދައެވެ. ފުޓުބޯޅަ ކުޅުންތެރިންގެ މި ކާޓީލޭޖް ވަރަށް ގިނައިން ހަލާކުވެއެވެ.

އިލާސްޓިކް ކާޓިލޭޖަކީ ވަރަށް ފްލެކްސިބަލް އެއްޗެކެވެ. މިއީ އާންމުކޮށް ނޭވާލާ ނިޒާމުގައާއި، ކަންފަތާއި ނޭފަތުން ފެންނަން ހުންނަ ކާޓިލޭޖުގެ ބާވަތެކެވެ. ނޭފަތުގައި ހުންނަ ކާތިލޭޖަކީ ނޭފަތުގައި ޖަހާލާ އެންމެ އެތިފަހަރަކުން ހަލާކުވެގެންދާ އެއްޗެކެވެ.

ކާޓިލޭޖަކީ ކައްޓަށް ވުރެ އަވަހަށް ހެދޭ އެއްޗެކެވެ. ރަހިމުގައި އޮންނަ ކުއްޖާގެ ކަށިތަކަކީ މުޅިންހެން ކާޓިލޭޖެވެ. ނަމަވެސް އެ ކުއްޖާ ހެދި ބޮޑުވާ ވަރަކަށް މި ކާޓިލޭޖު ހަރުވެ، ކަށްޓަށް ބަދަލުވެއެވެ.

ކާޓިލޭޖަށް ލިބޭ ގެއްލުންތަކާއެކު "އޮސްޓިއޮއާތުރައިޓިސް" ގެ އަސަރުތައް ކުރިމަތިކުރުވައެވެ. އޮސްޓިއޮއާތުރައިޓިސްގެ ސަބަބުން ބައެއް ހަރަކާތްތަކާ އެކު ތަދުވުން ކުރިމަތިކުރުވައެވެ.