ސަރުކާރު ބަދަލުވުމުގެ އިންތީޤާލީ މަރުހަލާގެ މަސައްކަތްކުރުމަށް އެކުލަވާލާފައިވާ ކޮމިޓީތަކުގެ މަސައްކަތްތައް މާދަމާގެ ނިޔަލަށް ނިންމާލެވޭނެކަމަށް ޑިރެކްޓަރ ޖެނެރަލް އޮފް ޓްރާންސިޝަން އަބްދުއްރަޙީމް ޢަބްދުﷲ ވިދާޅުވެއްޖެއެވެ.

ސަރުކާރު ބަދަލުވުމުގެ މަރުހަލާގެ ކަންކަން ކުރިއަށް ގެންދިއުމަށް އުފައްދާފައިވާ ޓްރާންސިޝަނަލް ކޮމިޓީން ވަނީ ސަރުކާރު ވުޒާރާތަކުންނާއި އޮފީސްތަކުން މައުލޫމާތު އެއްކުރުމުގެ މަސައްކަތަށް ޖުމްލަ 15 ޓީމެއް އެކުލަވާލާފައެވެ. މީގެތެރެއިން 7 ޓީމަކުން ސަރުކާރު ހިއްސާވާ ކުންފުނިތަކުން މަޢުލޫމާތު އެއްކުރަމުންދާއިރު، 8 ޓީމަކުން ސަރުކާރުގެ އެހެނިހެން މުވައްސަސާތަކުން މަޢުލޫމާތު އެއްކުރުމުގެ މަސައްކަތް ދަނީ ކުރަމުންނެވެ.

މި މަސައްކަތް ކުރިއަށްދާގޮތާއި ގުޅޭގޮތުން ސަރުކާރު ބަދަލުވުމުގެ މަރުހަލާގައި އެންމެ އިސްކޮށް މަސައްކަތްކުރައްވާ ޑިރެކްޓަރ ޖެނެރަލް އޮފް ޓްރާންސިޝަން އަބްދުއްރަޙީމް ޢަބްދުﷲ ވިދާޅުވީ، މި މަސައްކަތް ނިންމުމަށް ފުރަތަމަ ކަނޑައެޅުއްވީ މި ހަފްތާގެ އާދިއްތަ ދުވަހަށްކަމަށެވެ. ނަމަވެސް ބައެއް ކުންފުނިތަކުން ހޯދަންޖެހޭ މަޢުލޫމާތުތައް ލިބުމުގައި ލަސްތަކެއް އުޅުމުގެ ސަބަބުން އެތާރީޚަށް މަސައްކަތް ނުނިމުނީކަމަށް ޢަބްދުއްރަޙީމް ވިދާޅުވިއެވެ. އެހެންކަމުން މިހާރުގެ ޢަމާޒަކީ، މި މަސައްކަތް މާދަމާގެ ނިޔަލަށް ނިންމުމަށްކަމަށްވެސްޑިރެކްޓަރ ޖެނެރަލް އޮފް ޓްރާންސިޝަން އަބްދުއްރަޙީމް ޢަބްދުﷲ ވިދާޅުވިއެވެ.

Advertisement

ޢަބްދުއްރަޙީމް ވިދާޅުވީ މަޢުލޫމާތު އެއްކުރުމަށް އެކަށައަޅާފައިވާ ކޮމިޓީތަކުގެ މަސައްކަތްތައް ވަރަށް ބާރަށް، ފުރިހަމައަށް ކުރިއަށްދާކަމަށެވެ. މިކަމުގައި ގިނަ މުއައްސަސާރަކުން ފުރިހަމައަށް އެއްބާރުލުން ލިބެމުންދާކަމަށް ޢަބްދުއްރަހީމް ވިދާޅުވިއެވެ.

ނަމަވެސް މަޢުލޫމާތުތައް ހޯދާ އެއްކުރުރުމުގައި ބައެއް ކުންފުނިތަކާއި މުއައްސަސާތަކުން، އެންމެ އެކަށީގެންވާގޮތެއްގައި އެއްބާރުލުން ލިބެމުން ނުދާކަން ފާހަގަކުރެއްވިއެވެ. އަބްދުއްރަޙީމް ވިދާޅުވި މިހާރު މަޢުލޫމާތުތައް އެއްކުރުމުގެ މަސައްކަތްތައް ނިމި، ކުރިއަށްދަނީ ރިޕޯޓްތައް އެކުލަވާލުމުގެ މަސައްކަތްކަމަށެވެ.

"މަޢުލޫމާތު ފޯރުކޮށްދިނުމުގައި ބައެއް ތަންތަނުން ވަރަށް ލަސްވޭ. އެހެންވީމަ ފުރަތަމަ ބުނި ތާރީޚް، މިމަހުގެ 15އަށް ނުނިމުނު. މިހާރު މިބަލަނީ މާދަމާގެ ނިޔަލަށް ނިންމަން." އަބްދުއްރަޙީމް އަބްދުﷲ ވިދާޅުވިއެއެވެ.

ޢަބްދުއްރަޙީމް ވިދާޅުވީ ފައިނަލް ރިޕޯޓްތައް އެކުލަވާލުމުގެ މަސައްކަތްތައް ނިމުމާއެކު ޕްރެސް ކޮންފަރެންސްއެއް ބާއްވާ، އެ މަޢުލޫމާތު ހާމަކުރައްވާނެކަމަށެވެ. މި ރިޕޯޓްގައި، ކުންފުނިތަކުގެ މާލީ ޙާލަތާއި، ކުންފުނިތަކުން ހިންގަމުންދާ މަޝްރޫޢުތަކުގެ މަޢުލޫމާތުތަކާއި، އެސެޓްގެ މަޢުލޫމާތާއި އަދި ސިޔާސީ މުވައްޒަފުންނާއި ގުޅޭ މަޢުލޫމާތުތައް އެކުލެވިގެންވާނެކަމަށްވެސް އަބްދުއްރަހީމް ވިދާޅުވިއެވެ.

ޢަބްދުއްރަޙީމް ވިދާޅުވީ ފެނަކަފަދަ ސަރުކާރު ހިއްސާވާ ބައެއް ކުންފުނިތަކުގެ ޙާލަތު ވަރަށް ގޯސްކަން ފާހަގަކުރެވިފައިވާކަމަށެވެ. މާލީ ވަރަށް ބޮޑު ބުރައެއް ގިނަ ކުންފުނިތަކުގައި އޮތް އިރު، ސިޔާސީ ބޭނުމަށްޓާކައި އެއްވެސް ބެލުމެއްނެތި ވަޒީފާ ދިނުމުގެ ސަބަބުން ކުންފުނިތަކަށް އޭގެ ނޭދެވޭ އަސަރު ވަރަށް ބޮޑަށް ކޮށްފައިވާކަމަށާއި، އެކަމުގެ ތަފްސީލީ މަޢުލޫމާތުތައްވެސް ހާމަކުރައްވާނެކަމަށް ޑިރެކްޓަރ ޖެނެރަލް އޮފް ޓްރާންސިޝަން އަބްދުއްރަޙީމް ޢަބްދުﷲ ވިދާޅުވިއެވެ.