ކުޅުދުއްފުށީ އެއަރޕޯޓްގައި، އެއަރޕޯޓް ފަޔަރ ޓްރެއިނިންގައި ބޭނުންކުރާ ސިލިންޑަރެއް ގޮވާ، އެކަކަށް ސީރިއަސް އަނިޔާތަކެއް ވެއްޖެއެވެ. މި ހާދިސާގައި 4 މީހަކަށް އަނިޔާވެފައިވެއެވެ.

ފުލުހުން ވިދާޅުވީ ސިލިންޑަރު ރީފިލްކުރުމުގެ ތެރޭގައި އެ ގޮވާފައިވަނީ 11:45 ހާއިރުކަމަށެވެ. މި ހާދިސާގައި އަނިޔާވި މީހުންނަށް ކުޅުދުއްފުށީ ރީޖަނަލް ހޮސްޕިޓަލްގައި މިހާރު އަންނަނީ ފަރުވާދެމުންނެވެ.

ކުޅުދުއްފުށީ ހޮސްޕިޓަލްގެ ސީއީއޯ އަޙުމަދު ދާޢޫދު ޕީއެސްއެމް ނިއުސްއަށް މަޢުލޫމާތުދެއްވަމުން ވިދާޅުވީ، މީގެތެރެއިން އެކަކުގެ އަތަށް ވަރަށް ބޮޑަށް އަނިޔާވެފައިވާކަމަށެވެ. އެމީހާގެ އަތަށް ލިބުނު ގެއްލުންތަކަށް ފަރުވާ ދިނުމަށް އޮޕަރޭޝަނެއް ކުރަމުން އަންނަކަމަށްވެސް ދަޢޫދު ވިދާޅުވިއެވެ. ސީރިއަސް އަނިޔާތަކެއް ވެފައިވަނީ އުމުރުން 31 އަހަރުގެ ފިރިހެނެކަށެވެ.

Advertisement

މީގެއިތުން ދެން ފަރުވާ ދެމުންދަނީ، 25އަހަރުގެ އަންހެނަކާއި، 28 އަދި 29 އަހަރުގެ ފިރިހެނަކަށެވެ. މި މީހުންނަށް ލިބިފައިވަނީ ކުދިކުދި އަނިޔާކަމަށާއި، އެމީހުންނަށްވެސް ދޭންޖެހޭ ފަރުވާ ދެމުންދާކަމަށްވެސް ކުޅުދުއްފުށީ ރީޖަނަލް ހޮސްޕިޓަލުން ވިދާޅުވިއެވެ.

އަނިޔާވެފައިވަނީ މުޅިންވެސް އެއަރޕޯޓުގެ މުވައްޒަފުންނަށެވެ.