އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާއަށް މެދުކެނޑުމެއް ނެތި ބޮން އަޅަން ފެށި ފަހުން، މި ހަފްތާ ބަންދުގައި ޣައްޒާއަށް އެހީގެ ދެ ޝިޕްމަންޓެއް ވަނީ އައިސްފައެވެ.

2.3މިލިއަން މީހުން ދިރިއުޅޭ ޣައްޒާގައި އިންސާނީ އެހީތެރިކަން ވަރަށް ބޮޑަށް ބޭނުންވެފައި ވަނީ ޔަހޫދީން ބޮންއެޅުމުގެ ކުރިން ކާބޯތަކެއްޗާއި ތެލާއި ކަރަންޓް ކަނޑާލުމުންނެވެ.

ޔަހޫދީން ދިން ބޮމުގެ ހަމަލާތަކުގައި ފަލަސްތީނުގެ 5،000 އަށް ވުރެ ގިނަ މީހުން ޝަހީދުވެފައި ވާއިރު، އޭގެ ތެރެއިން ތިންބައިކުޅަ އެއްބަޔަކީ ކުޑަކުދިންނެވެ.

ޣައްޒާއަށް ފޮނުވަމުންދާ އިންސާނީ އެހީތަކާ ބެހޭގޮތުން ބޭރުގެ މީޑިއާތަކުން ރިޕޯރޓްކޮށްފައިވާ ބައެއް މަޢުލޫމާތު މިވަނީއެވެ. 

ޣައްޒާއަށް އެހީ ފޮނުވީ ކޮން ޤައުމުތަކެއް ހެއްޔެވެ؟

· މިސްރުގެ ސިނާއީ ޕެނިންސުލާގެ އެލް އަރީޝް އިންޓަނޭޝަނަލް އެއާޕޯޓަށް ތުރުކީ، ޔުނައިޓެޑް އަރަބް އެމިރޭޓްސް، ގަތަރު، އުރުދުން އަދި ޓިއުނީޝިއާގެ އެހީ ހިފައިގެން މަދުވެގެން އަށް ބޯޓު ޖައްސާފައި ވެއެވެ.

· އިންޑިއާއިން ވަނީ އާދީއްތަ ދުވަހު އެލް އަރިޝްއަށް މެޑިކަލް އަދި ޑިޒާސްޓާ ރިލީފް ފޮނުވައިފަ އެވެ.

· ރުވާންޑާއިން ޣައްޒާއަށް 16 ޓަނުގެ އިންސާނީ އެހީ ފޮނުވައިފިއެވެ.

· ޔޫރަޕިއަން ޔޫނިއަން އިން ވައިގެ ބްރިޖެއް ފަށައި، އެ ސަރަހައްދަށް ދޭ އެހީ ތިންގުނައަށް އިތުރުކޮށްފިއެވެ.

· ނަމަވެސް އީޔޫގެ ބައެއް ގައުމުތަކުން - ޖަރުމަނާއި ޑެންމާކާއި ސްވިޑެން ހިމެނޭ ގޮތަށް ހަމާސްގެ ހަމަލާތަކަށް ރައްދު ދިނުމުގެ ގޮތުން ޣައްޒާއަށް ދޭ އެހީ ވަގުތީ ގޮތުން މެދުކަނޑާލައިފި އެވެ.

މިހާތަނަށް ޣައްޒާއަށް ވަދެފައިވަނީ ކިތައް ޓްރަކް ހެއްޔެވެ؟

· 20 ޓްރަކްގެ ފުރަތަމަ ކޮންވޯއީ ހޮނިހިރު ދުވަހު މިސްރުން ޣައްޒާއަށް ހުރަސްކޮށް، ދެވަނަ ކޮންވޯއީ އައީ އާދީއްތަ ދުވަހު އެވެ.

· ގާތްގަނޑަކަށް 3،000 ޓަނުގެ އެހީ އުފުލާ 200 އަށް ވުރެ ގިނަ ޓްރަކް އިސްރާއީލުގެ ހުއްދައަކަށް މިސްރުން ޣައްޒާއަށް ހުރަސްކުރާ ސަރަހައްދުގައި މަޑުކޮށްފައިވެއެވެ.

· މިސްރުގައި ހުންނަވާ ޔުނިސެފްގެ މަންދޫބު ޖެރެމީ ހޮޕްކިންސް ވިދާޅުވީ މިއީ ޣައްޒާގެ ރައްޔިތުންގެ ބޭނުންތައް ފުއްދައިދިނުމަށް ފުދޭ މިންވަރެއް ނޫން ކަމަށާއި އޭގެ ބަދަލުގައި "ދުވާލަކު މަދުވެގެން 100، 200 ޓްރަކް ވަންނަ" ޖެހޭކަމަށެވެ.

· މިލިއަނަކަށްވުރެ ގިނަ މީހުން ގެދޮރު ދޫކޮށް، ދިހަހާސް މީހުން ޒަޚަމްވެ، ކާބޯތަކެއްޗާއި އެހެނިހެން އަސާސީ ބޭނުންތަކަށް ބޭނުންވާ މީހުންގެ އިތުރުން އަވަސް ބޭސްފަރުވާއެއް ބޭނުންވާ މީހުންވަނީ އިތުރުވެފައެވެ.

ޣައްޒާއަށް ފޮނުވަނީ ކޮން އެހީއެއް ހެއްޔެވެ؟

· އެހީގެ ކޮންވޯއީތަކުގައި ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ ސިއްހީ ސާމާނު، ޑްރެސިން، އެނެސްތެޓިކްސް އަދި ތަދުކެނޑޭ ބޭސް ފަދަ ތަކެތި ވަނީ އުފުލާފައެވެ.

· އެ ޓްރަކްތަކުގައި ކާބޯތަކެތި ވެސް ހިމެނޭއިރު، މަސް ދަޅާއި ޓޮމާޓޯ ޕޭސްޓާއި ހަނޑުލުގެ ފުށް ވެސް ހިމެނެ އެވެ.

· އަދި ބޯފެން ފުޅި ވެސް ވަނީ ގެންގޮސްފަ އެވެ. ފުރަތަމަ ކޮންވޯއީގައި އެއް ދުވަހަށް 27،000 މީހުންނަށް ފުދޭވަރުގެ ފެން ހުރިއިރު، ދެވަނަ ކޮންވޯއީގައި އެއް ދުވަހަށް 22،000 މީހުންނަށް ފުދޭވަރުގެ ފެން ހުއްޓެވެ.

ޣައްޒާއަށް ބޭނުންވަނީ އިތުރު ކޮން އެހީއެއް ހެއްޔެވެ؟

· އދގެ އިންސާނީ އެހީތެރިކަމުގެ އޮފީހުން ބުނީ ކާނާއާއި ފެނާއި ބޭހާއި ތެލުގެ ސްޓޮކް ހުސްވުމުން މިހާތަނަށް ވަންނަ އެހީ އަކީ ހަނގުރާމަ ފެށުމުގެ ކުރިން ދުވާލަކު އެވްރެޖްކޮށް ބޭނުންވާ މިންވަރުގެ އެންމެ 4 އިންސައްތަ ކަމަށެވެ.

· ޣައްޒާއަށް ފޮނުވާ އެހީގެ ތެރޭގައި ތެޔޮ ނުހިމެނޭ ކަމަށާއި އެއީ ވަރަށް މުހިންމު ކަމެއް ކަމަށް އެހީދޭ ޖަމާއަތްތަކުން ބުނެ އެވެ.

· ޣައްޒާގެ ހަމައެކަނި ކެންސަރު ހޮސްޕިޓަލުގެ ޑޮކްޓަރުން ވަނީ އެ ހޮސްޕިޓަލުގެ ތެޔޮ މަދުވެ، ބަންދުކުރަން މަޖުބޫރުވެދާނެ ކަމުގެ އިންޒާރު ދީފަ އެވެ.

ޣައްޒާއާއި މިޞްރުގެ ބޯޑަރު ހުޅުވިފައިވޭތޯ؟

· މިހާރު ދީފައިވާ އެހީތައް ވަދެފައި ވަނީ މިސްރާއި ޣައްޒާއާ ދެމެދު އޮންނަ ރަފާ ބޯޑަރު ހުރަސްކޮށެވެ.

· ރަފާ މެދުވެރިކޮށް ޣައްޒާއަށް އަންނަ ސަޕްލައިތަކަށް އިސްރާއީލުގެ ރުހުން ހޯދަން ޖެހެ އެވެ.

· އިސްރާއީލުން ބުނީ ފަލަސްތީނުގެ ސަރަހައްދުގައި 10 ދުވަހުގެ ވަށާލުން ލުއިކުރުމަށް ބައިނަލްއަގްވާމީ އެކުވެރިންގެ ޕްރެޝަރަށް ފަހު މިސްރު މެދުވެރިކޮށް ޣައްޒާއަށް އިންސާނީ އެހީތައް އެތެރެވުމަށް ހުރަހެއް ނާޅާނެ ކަމަށެވެ.

· ބޯޑަރު ހުޅުވޭނެ ގަޑިއެއްގެ އިންތިޒާރުގައި ބޯޑަރުގެ ބޭރުގައި ޓްރަކްތައް އޮތީ މަޑުކޮށްގެންނެވެ.

· ހޮޕްކިންސް ވިދާޅުވީ ބޯޑަރު މެދުނުކެނޑި ހުޅުވާލަން ޖެހޭ ކަމަށެވެ.