މިއަހަރުގެ މޯލްޑިވްސް ބޯޓިން އެވޯޑަށް ކުރިމަތިލާފައިވާ ފަރާތްތަކަށް އޮންލައިންކޮށް ވޯޓު ދިނުމުގެ ފުރުސަތު ހުޅުވާލައިފިއެވެ.

ވޯޓުލުމުގެ ފުރުސަތު މިމަހުގެ 20ވަނަ ދުވަހުގެ ނިޔަލަށްވަނީ ހުޅުވާލާފައެވެ. ނޭޝަނަލް ބޯޓިން އެސޯސިއޭޝަނުން ބުނީ އެވޯޑު ލިބޭ ފަރާތްތައް ހޮވާނީ އޮންލައިންކޮށް ލިބޭ ވޯޓުތަކާއި ޖަޖުންގެ ޕެނަލްއިން ދޭ މާރކްސްއަށް ބެލުމަށްފަހު ކަމަށެވެ.

މޯލްޑިވްސް ބޯޓިންގ އެވޯޑަކީ، ފަތުރުވެރިކަމުގެ ސިނާޢަތުގައި ހަރަކާތްތެރިވާ ސަފާރީތަކަށް ޚާއްސަކޮށް ދެވޭ އެވޯޑެކެވެ. އެވޯޑް ދިނުމުގެ މަޤްސަދަކީ އެފަރާތްތަކުން ކުރާ މަސައްކަތްތަކުގެ އަގުވަޒަންކުރުން ކަމަށް ނޭޝަނަލް ބޯޓިން އެސޯސިއޭޝަނުން ބުނެއެވެ.  

Advertisement

ބޯޓިންގ އެވޯޑް ހަފްލާ ދިނުމަށް ހަމަޖެހިފައިވަނީ އަންނަ މަހުގެތެރޭގައެވެ. މިއަހަރުގެ ބޯޓިން އެވޯޑް 33 ގިންތިއަކުން ދިނުމަށް ހަމަޖެހިފައިވާ ކަމަށް ބޯޓިން އެސޯސިއޭޝަނުން ބުނެއެވެ.

މީގެތެރޭގައި ލިވަރބޯޑްތަކާއި ސަފާރީތަކަށްދޭ އެވޯޑްގެ އިތުރުން މިދާއިރާގައި މަސައްކަތްކުރާ ފަރާތްތަކަށްދޭ އެވޯޑްވެސް ހިމެނެއެވެ. އެގޮތުން ކެޕްޓަން، ޝެފް، ކްރޫ މެންބަރ، އިންޖީނިއަރ، ކްރޫޒް މެނޭޖަރ، އޮޕަރޭޝަން ސްޓާފް ފަދަ އެވޯޑް ހިމެނެއެވެ.

ނޭޝަނަލް ބޯޓިން އެސޯސިއޭޝަނުން އިންތިޒާމްކޮށްގެން ބާއްވާ މި އެވޯޑަކީ 2016 ވަނަ އަހަރުން ފެށިގެން ދެމުންއަންނަ އެވޯޑެކެވެ.