މަޖިލީހުގެ ރައީސް، ރައީސް މުހައްމަދު ނަޝީދު މަޤާމުން ވަކިކުރުމުގެ ޤަރާރު، ރައްޔިތުންގެ މަޖިލީހުގެ ގަވާއިދުގެ ތެރެއިން ކުރިއަށް ނުގެންދެވޭނެ ކަމަށް މަޖިލީހުގެ ރިޔާސަތު ބަލަހައްޓާ ފަރާތުން ނިންމާފައިވަނީ މަޖިލީހުގެ ގަވާއިދާ ޚިލާފަށް ކަމަށް ބަންޑާރަ ނައިބު އިބްރާހީމް ރިފްއަތު ވިދާޅުވެއްޖެއެވެ.

ބަންޑާރަ ނައިބު މިހެން ވިދާޅުވެފައިވަނީ ރޭ ކުރެއްވި ޓުވިޓެއްގައެވެ.

މަޖިލީހުގެ ރައީސްކަމުން ރައީސް ނަޝީދު ވަކިކުރެއްވުމަށް އެމްޑީޕީގެ 49 މެންބަރުން ސޮއިކުރައްވާ ހުށައަޅުއްވާފައިވާ މައްސަލައިގެ 14 ދުވަހުގެ ނޯޓިސް ހަމަވެ، ކޮންމެ ދުވަހެއްގެ ޖަލްސާއަށް އެޖެންޑާ ކުރި ނަމަވެސް އީވާ ސަލާމުގައި ހުންނެވުުމުން މިޖަލްސާ ބޭއްވޭ ގޮތެއްވަނީ ނުވެފައެވެ. އިވާ ސަލާމުގައި ހުންނެވުމުން ޖަލްސާ ކުރިޔަށް ނުގެންދެވިވާތީ މަޖިލީހުގެ ޤަވާއިދު މާނަކުރަން އެމްޑީޕީން ސުޕްރީމް ކޯޓަށް ހުށައެޅުމުން އެކޯޓުންވަނީ މަޖިލީހުގެ ރައީސް މަޤާމުން ވަކިކުރަން ހުށައަޅާފައިވާ ޤަރާރުގެ މައްސަލަ ކުރިޔަށްދާ ޖަލްސާގެ ރިޔާސަތު މަޖިލީހުގެ ނައިބު ރައީސް ނޫން މެމްބަރުންނަށް ވެސް ބެލެހެއްޓޭނެކަމަށް ޙުކުމްކުރައްވާފައެވެ.

އެޙުކުމަށްފަހު އެންމެ ފުރަތަމަ މަޖިލީހުގައި ބޭއްވި އިއްޔެގެ ޖަލްސާއަށްވަނީ މިމައްސަލަ ތާވަލުކޮށްފައެވެ. އެހެންނަމަވެސް މަޖިލީހުގެ ހެނދުނު ކުރިއަށްދިޔަ ޖަލްސާގައިވަނީ ނަޝީދުގެ މައްސަލަ ހުށައަޅާފައިވަނީ މަޖިލީހުގެ ގަވާއިދާ ޚިލާފަށްކަމަށް ކަނޑައަޅައި މަޖިލީސް ނިންމަވާފައެވެ. އޭގެފަހުން މެންދުރުކުރި 11:30ގައި އެޖެންޑާކުރި 2 ވަނަ ޖަލްސާއަށް މިމައްސަލަ ކުރިއަށްގެންދިޔުމަށް މަސައްކަތްކުރުމުން މަޖިލީސް ނައިބު ރައީސްވަނީ އެމައްސަލައަކީ ހެނދުނުގެ ޖަލްސާއިން ބޭރުކޮށްފައިވާ ޤަރާރެއްކަމަށް ވިދާޅުވެ ގިނައިރުތަކެއްނުވެ އެޖަލްސާވެސް ނިންމާލާފައެވެ.

މިއާއެކު މަޖިލީހުގެ އާންމު ކޮމިޓީންވަނީ މިކަމާ ގުޅިގެން ބަންޑާރަ ނައިބުގެ ލަފާއެއް ހޯދަންވެސް ވަނީ ނިންމާފައެވެ.

ބަންޑާރަ ނައިބު އިބްރާހީމް ރިފްއަތު ކުރެއްވި ޓުވިޓެއްގައިވަނީ މެންބަރަކު ޖަލްސާގައި ހުށަހެޅި ނިޒާމީ މައްސަލައަކާ ގުޅިގެން، މަޖިލީހުގެ ރައީސް މަޤާމުން ވަކިކުރުމުގެ ޤަރާރު، ރައްޔިތުންގެ މަޖިލީހުގެ ގަވާއިދުގެ ތެރެއިން ކުރިއަށް ނުގެންދެވޭނެ ކަމަށް މަޖިލީހުގެ ރިޔާސަތު ބަލަހައްޓާ ފަރާތުން ނިންމާފައިވަނީ މަޖިލީހުގެ ގަވާއިދާ ޚިލާފަށް ކަަށެވެ. އަދި މަޖިލީހުގެ ޖަލްސާތަކަކީ ޤާނޫނުއަސާސީގެ 82 ވަނަ މާއްދާއާއި ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާގައި ބަޔާންކުރާ ގޮތުގެމަތިން ހުއްޓުމެއްނެތި ކުރިއަށް ގެންދަންޖެހޭ ޖަލްސާތަކެއް ކަމަށް ބަންޑާރަ ނައިބު ވިދާޅުވެފައިވެއެވެ.

ރައްޔިތުންގެ މަޖިލީހުގެ ރައީސް ވަކިކުރުމުގެ ޤަރާރު ހުށަހެޅުމަށް އެޖެންޑާ ކުރެވޭ ޖަލްސާއެއްގެ ރިޔާސަތު މަޖިލީހުގެ ރައީސްގެ ނުފޫޒު އޮތް މެންބަރަކު ބެލެހެއްޓުމަކީ މަޖިލީހުގެ ގަވާއިދުގެ 205 ވަނަ މާއްދާގެ (ބ) ގައި ބުނާ މަސްލަޙަތު ފުށުއެރުމުގެ އުޞޫލާ ދިމާ އިދިކޮޅު މާނަކުރުމެއް ކަމަށާއި، ރައްޔިތުންގެ މަޖިލީހުގެ ރައީސް މަޤާމުން ވަކިކުރުމުގެ މައްސަލައެއް ބެލުމުގައި، ރިޔާސަތު ބެލެއްޓުމަށް ދެކޮޅު ހަދައި ނުވަތަ އުޒުރުވެރިވާ މެންބަރުންނާއި އަދި މަސްލަޙަތު ފުށުއަރާ އެއްވެސް ފަރާތެއް ރިޔާސަތުގައި ނުބޭންދުމުގެ މުޙިއްމުކަމަށް އިސްކަންދޭންޖެހޭ ކަމަށެވެ.

ބަންޑާރަ ނައިބު އިތުރަށް ވިދާޅުވެފައިވަނީ މަޖިލީހުގެ ގަވާއިދުގެ 44 ވަނަ މާއްދާ ބުނާގޮތަށް ރިޔާސަތު ބެލެހެއްޓުމަށް ކަނޑައެޅިފައިވާ ތަރުތީބުން އަމީންޢާންމު މަޖިލީހުގެ ޖަލްސާގެ ރިޔާސަތު ބަލަހައްޓާނެ ފަރާތެއް ކަނޑައަޅައި، ޖަލްސާތައް ކުރިއަށް ގެންދިއުމަކީ ޤާނޫނުއަސާސީއާއި މަޖިލީހުގެ ގަވާއިދު ތަޞައްވުރުކުރާ ހަމައެކަނި ގޮތް ކަމަށެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރުނެތްކަމުގެ މައްސަލަ މިއަދުގެ ޖަލްސާއަށްވެސްވަނީ އެޖެންޑާކޮށްފައެވެ.