އަދަބު ލުއިކޮށް ދިނުމާއި މާފުކޮށް ދިނުމުގެ އެއްވެސް މަރުހަލާއެއްގައި ޕްރޮސެކިއުޓަ ޖެނެރަލްގެ ދައުރެއް ނޯންނަ ކަމަށް ޕީޖީ ހުސައިން ޝަމީމު ވިދާޅުވެއްޖެ އެވެ.

ރާއްޖޭގައި މިހާތަނަށް ހިންގި އެންމެ ބޮޑު ހިޔާނާތް ކަމަށްވާ އެމްއެމްޕީއާރްސީގެ މައްސަލައިގެ ބޮޑުންތައް ކަމަށްވާ ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތަށް މިދިޔަ ހޯމަ ދުވަހު ރައީސް ސޯލިހު މާފު ދެއްވުމާ ގުޅިގެން އުފެދިފައިވާ ނުތަނަވަސްކަމުގެ ތެރޭގައި ޕީޖީ ޝަމީމު އޭނަގެ އަމިއްލަ ބްލޮގްގައި ވިދާޅުވީ އެކަމާ އޭނަގެ ވެސް ކަންބޮޑުވުން އޮތް ކަމަށެވެ.

ނަމަވެސް އެ މައްސަލާގައި ޕީޖީގެ ހައިސިއްޔަތުން އަދާކުރެއްވޭނެ ވަކި ދައުރެއް ނެތް ކަމަށް ވިދާޅުވި އެވެ.

"ކްލެމެންސީ ބޯޑުގައި ޕްރޮސިކިއުޓާ ޖެނެރަލް ތަމްސީލުކުރާ މީހަކު ނުވެސް އިނދޭ. މައްސަލައެއްގައި ހުކުމެއް ކުރުމަށް ފަހު، އެ ހުކުމަށް ދެން ހަދާ ގޮތަކީ، ޕީޖީ އޮފީހުގެ ދައުރެއް އޮންނަ ކަމެއް ނޫން،" ޝަމީމު ވިދާޅުވި އެވެ. "އެ މީހާ ހުކުމް ތަންފީޒު ކުރަނީ ޖަލުގައިތޯ، ގޭގައިތޯ އެއީ ޕީޖީ އޮފީހުގެ ބަހެއް ހޯދަން ޖެހޭ ކަމެއް ނޫން. އެކަން ކުރައްވަނީ މޯލްޑިވްސް ކަރެކްޝަނަލް ސާވިސްއިން. އެކަމާ ގުޅިގެން އުފެދޭ ސުވާލުތަކަށް ޖަވާބު ދެވޭނީ ވެސް އެ ސާވިސް އަށް."

އޭނަ ވިދާޅުވީ އަދީބާއި ޒިޔަތަށް މާފު ވެސް ޕީޖީ އޮފީހުގެ ލަފައެއް ވެސް ހޯދައިގެން ނޫން ކަމަށާއި ގާނޫނީ ނިޒާމު މިހާރު އޮތް ގޮތުން، މާފު ދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ރައީސަށް ފުޅާ ބާރުތަކެއް ލިބިގެންވާ ކަމަށެވެ. އެހެންވެ އެ ބާރު ބޭނުންކުރައްވާ ގޮތާ މެދު ސުވާލު އުފެއްދުމަކީ ޕީޖީގެ ޒިންމާތަކުގެ ތެރޭގައި ހިމެނޭ ކަމެއް ނޫން ކަމަށް ވެސް ވިދާޅުވި އެވެ.

"އަމިއްލަ ފަރުދެއްގެ ހައިސިއްޔަތުންނާއި ގާނޫނު ތަންފީޒުކުރުމުގެ ދާއިރާގައި ހަރަކާތްތެރިވާ މީހެއްގެ ހައިސިއްޔަތުން، ދެރަ އާއި ހިތްހަމަނުޖެހުމާއި، ފްރަސްޓްރޭޝަނާއި ކަންބޮޑުވުން ކުޑައެއް ނޫން،" ޝަމީމު ވިދާޅުވި އެވެ. "ނަމަވެސް، ޕްރޮސިކިއުޓާ ޖެނެރަލަށް ކަމަކާ ބެހެވޭނީ ވެސް، ކަންބޮޑު ވެވޭނީވެސް، ރުޅިއާދެވޭނީވެސް، ރުހެވޭނީވެސް، އުފާ ވެވޭނީވެސް ގާނޫނުގައި ބެހޭށާއި ކަންބޮޑުވާށާއި ރުޅި އަންނާށާއި ރުހޭށާއި އުފާވާން ފުރުސަތު ދީފައި އޮތް ނަމަ."

އޭނަ ފާހަގަކުރެއްވި ގޮތުގައި މައާފު ދިނުމާއި އަދަބު ލުއިކޮށް ދިނުމުގެ ގާނޫނު މެދު މިހާރު އޮތް ނުތަނަވަސްކަމަށް އޮތް ހައްލަކީ، ރައްޔިތުންގެ މަޖިލީހުން ގެނެސްދެވޭނެ ހައްލެއް ކަމަށެވެ..

"އާންމުންގެ ހިޔާލާއި ފިކުރާ އެއްގޮތަށް، ރައްޔިތުންގެ މަޖިލީހުން ގާނޫނުތައް އިސްލާހުކުރާނެކަމީ އެއްވެސް ޝައްކެއް އޮތް ކަމެއް ނޫން. ޝަމީމް ވިދާޅުވި އެވެ.

އޭނަ ވިދާޅުވި ގޮތުގައި އެންމެ ރަނގަޅު ގޮތަކީ ކްލެމެންސީގެ އުސޫލު އުވާލުމެވެ.