ރަށު ކައުންސިލަރުންގެ މުސާރަ ބޮޑުކުރަން ލަފާ ދީފި އެވެ.

އެގޮތުން ރަށު ކައުންސިލަރުންގެ މުސާރަ އާއި އެލަވަންސް، 33 ޕަސެންޓް ބޮޑުކުރުމަށް ރައްޔިތުންގެ މަޖިލީހުގެ މާލިއްޔަތު ކޮމެޓީއަށާއި ބަޖެޓު ކޮމެޓީ އަށް ލަފާދިނީ ލާމަރުކަޒީ ކޮމެޓީން އިއްޔެ އެވެ.

އެ ކޮމިޓީގެ މުގައްރިރު އަދި ހުޅުމާލެ ދާއިރާގެ މެންބަރު އަލީ ނިޔާޒް ވިދާޅުވީ ކައުންސިލްތަކުގެ މުސާރައިގެ އޮނިގަނޑަށް އައިސްފައިވާ ބަދަލަށް ރިއާޔަތްކުރާ އިރު ރަށު ކައުންސިލްތަކުގެ މެންބަރުންގެ މިހާރުގެ މުސާރަ އަކީ އިދާރީ މުވައްޒަފުންގެ މުސާރައާއި ބަލާއިރު އެއްހަމަ ކުރެވިފައިވާ މުސާރަތަކެއް ނޫން ކަމަށް ވިދާޅުވެފަ އެވެ. އެހެންވެ ރަށު ކައުންސިލް މެންބަރުންގެ މުސާރަ އިދާރީ މުވައްޒަފުންގެ މުސާރަ އަށް ވުރެ ކުޑަވުމަކީ ހަމަޖެހޭ އުސޫލެއް ނޫން ކަމަށް ވިދާޅުވިއެވެ.

Advertisement

އެގޮތުން ކޮމިޓީން ވަނީ ކައުންސިލްގެ ރައީސާއި ނާއިބު ރައީސް އަދި މެންބަރުންގެ މުސާރަ އަށް ގެންނަ ބަދަލު ކަނޑައަޅައިފަ އެވެ.

ލާމަރުކަޒީ ކޮމިޓީން މާލިއްޔަތު ކޮމެޓީއަށާއި، ބަޖެޓު ކޮމެޓީއަށް ލަފާ ދިނުމަށް ނިންމީ ލޯކަލް ކައުންސިލްތަކުގެ އިދާރީ މުވައްޒަފުންގެ މުސާރަ މިދިޔަ މަހުގެ 1 ދުވަހުން ފެށިގެން 35 ޕަސެންޓަށް ބޮޑު ކުރުމުން، ކައުންސިލުގެ އިދާރީ އިސް މުވައްޒަފުންގެ މުސާރަ އާއި ރަށު ކައުންސިލަރުންގެ މުސާރަ އެއްހަމަ ނުވަތަ އެއަށް ވުރެ ބޮޑުވެފައިވާތީ އެކަމާއި ގުޅިގެން ކަންބޮޑުވުން ފާޅުކުރުމާ ގުޅިގެންނެވެ.