ޕާޓީގައި ޒުވާނުން ސިޔާސީ ދާއިރާއިން ކުރިއަށް ދެވޭނެ މަގުތައް ދައްކައިދިނުމަށް "ޓްރެއިނިންގ އެކެޑަމީއެއް" ހެދުމަކީ ވިސްނުމެއް ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ އަދި ދަ ޑިމޮކްރެޓްސްގެ ރައީސް ކަމަށް ވާދަކުރައްވާ ހުސައިން އަމްރު ވިދާޅުވެއްޖެއެވެ.

ދަ ޑިމޮކްރެޓްސްގެ އެތެރޭގެ އިންތިހާބު މާދަމާ އޮންނާނެއެވެ.އަމްރު ވިދާޅުވީ، އޭނާ އެ ޕާޓީގެ ރައިސްކަން ލިބިއްޖެނަމަ ޒުވާނުންނަށް ހާއްސަ ޓްރެއިނިންގ އެކަޑަމީއެއް ހެދުމަކީ ވިސްނުމެއް ކަމަށާއި، އެ އެކަޑަމީގައި ޒުވާނުންނަށްވެސް އަންހެނުންނަށްވެސް މިކަމުގެ ތެރޭގައި ކުރިއަށްދާނެ ބައިވަރު ޕްރޮގްރާމްތަކާއި، ތަމްރީނުތައް ހިންގާނެ ކަމަށެވެ.

"ސިޔާސީ ޕާޓީއަކީ ހަމައެކަނި ޕޯޑީއަމަކަށް އަރާ ވާހަކަދެއްކުމެއް ނޫން، އެބަހުރި ވަރަށް ބައިވަރު ޓްކްނިކަލް ކަންތައްވެސް ޕާޓީން ކުރާނެ، ކޮމެޓީތައްވެސް އެބަހުރި ބައިވަރު ހަދަން ޖެހޭ، އެ ކޮމެޓީތަކުގައި ގިނަ މަސައްކަތްތަކެއް އެބަ ހުރި ކުރަން. އެހެންވީމަ އަޅުގަނޑުގެ ވިސްނުން ހުރީ އެގޮތަށް ޓްރެއިން ކޮށްގެން 2028 ވަނަ އަހަރު އަންނަންވާއިރަށް ވަރުގަދަ ޔަންގގ އަދި ހަމަ އަންހެނުންވެސް ފިސާރި ކެރޭ ވަރުގަދަ އަންހެން ލީޑަރުންތަކެއް މި ޕާޓީއާއި އެކީގައި މަސައްކަތުގެ ތެރެއަށް ނުކުތުން".

އަމްރު އޭނާގެ ތަޖްރިބާ ހިއްސާ ކުރައްވަމުން ވިދާޅުވީ، ޒުވާނުންނަށް އަދި ފުރުސަތު އެބަ އޮތް ކަމަށް ބުނެ ހުޅުވާލުމުން، އެ ހިސާބަކުން ނުނިމޭ ކަމަށާއި، އެއިރު ޒުވާނުން ޕާޓީއަށް ވަދެ ޓަސްލާފައި ބައިވަރު މަސައްކަތް ކުރަނީ ނޫން ކަމަށެވެ.

"އެހެނެއް ނޫން އެކަން ވަނީ. އަޅުގަނޑުގެ އެކްސްޕީރިއަންސްއަކީ އަޅުގަނޑު 2008 ވަނަ އަހަރުވެސް އަދި އޭގެ މާ ކުރީއްސުރެވެސް، އަޅުގަނޑު ގެ ހުންނަނީ ކެނެރީގެ ކުރީމަތީގައި. އެހެންވީމަ ވަރަށް ގިނައިން ރައީސް ނަޝީދު ލިޔުއްވާ ލީފްލެޓްސްތަކާއި އެއްޗެހި /ވޯލްޑް ރައިޓް ޑޭ" އެއިރު ފާހަގަ ކުރާނެ، އެ އެއްޗެހި ބަހަން 13،14 އަހަރުގައިވެސް ބައިސްކަލުގައި ނުކުމެ ގްރޫޕަކުގައި އެކަން ކޮށް އުޅުނިން.".

އަދި 2008 ވަނަ އަހަރު ރައީސް ނަޝީދަށް ކާމިޔާބު ލިބިވަޑައިގަތުމާއި އެކު ރައީސް އޮފީހަށް ވަޑައިގަތުމަށް އެންގި ކަމަށާއި، އޭނާ ރައީސް އޮފީހަށް ދިޔައީ ނޮވެމްބަރު 12 ވަނަ ދުވަހު ކަމަށް ވިދާޅުވިއެވެ.

"އެ މަސް ތެރޭގައި އިންޑިއާގެ ވަރަށް ބޮޑު ޑެލެގޭޝަނެއް އައިސް 16 އެމްއޯޔޫއެއްގައި ސޮއިކުރި، ސޮއިކޮށްފައި ހަމަ އެ ދުވަހު ހަވީރު ރައިސް ނަޝީދު ވިދާޅުވީ، ޓީވީއަށް އަރާށޭ މި ވާހަކަ ދައްކަން. ދެން އަޅުގަނޑު ވަރަށް ޅަ ވާނެ. އެއިރު 24 ވަރަކަށް އަހަރު. އަޅުގަނޑު ބުނީ އާނއެކޭ. އެކަމަކު އަޅުގަނޑު ދުވަހަކުވެސް ޓީވީއަކަށް ނާރަން، ދުވަހަކުވެސް ޕޯޑިއަމްގައި އެގޮތަށް ވާހަކަދައްކާ އެކަހަލަ އެއްވެސް ކަމެއް ނުކުރަން،".

މިގޮތުން އޭނާ އެރީ ޓީވީއެމްގެ ރާއްޖެ މިއަދު ޕްރޮގްރާމަށް ކަން ފާހަގަކުރެއްވިއެވެ. އަދި އެތާ އިން އިރުވެސް ހީވަނީ "ގަނޑުފެންކޮޅެއް"ހެން ކަމަށްވެސް ވިދާޅުވިއެވެ.

އެއީ އޭނާއަށް ލިބުނު ތަޖުރިބާ ކަމަށާއި، އެއީ ބައިވަރު ޒުވާނުންނަށް ލިބޭނެ ތަޖުރިބާއެއް ނޫން ކަމަށް އޭނާ ވިދާޅުވިއެވެ.

އަމްރު ވިދާޅުވީ، އެ ޕާޓީ މެދުވެރިކޮށް އޭނާ ބޭނުންވަނީ، އޭނާއަށް ލިބުނު ކަހަލަ ތަޖުރިބާއެއް ގިނަބަޔަކަށް ލިބިގެން ދިއުން ކަމަށެވެ.