އެމްޑީޕީގެ ފަރާތުން މާލޭގެ މޭޔަރުކަމަށް ވާދަކުރެއްވުމަށް ޕްރައިމަރީއަކާ ނުލާ އެމްޓީސީސީގެ ކުރީގެ ސީއީއޯ އާދަމް އާޒިމަށް ޓިކެޓް ލިބިއްޖެ އެވެ.

އެމްޑީޕީން ބުނީ މާލޭ ސިޓީ ކައުންސިލްގެ ހުސްވެފައިވާ މަގާމުތަކަށް ޝައުގުވެރިކަން ފާޅުކުރަން ހުޅުވާލި މުއްދަތުގައި ކުރިމަތިލާފައި ވަނީ ކޮންމެ ދާއިރާކުން އެއް ކެންޑިޑޭޓް ކަމަށެވެ. އެގޮތުން ޕްރައިމަރީއަކާ ނުލާ އެ ފަރާތްތަކަށް ވަނީ ޓިކެޓު ކަށަވަރުވެފަ އެވެ.

ޕްރައިމަރީއަކާ ނުލާ ޓިކެޓް ލިބުނު ފަރާތްތައް:

– މާލޭގެ މޭޔަރު ކަމަށް ވާދަކުރަން: އާދަމް އާޒިމް/ސީނުކަރަންކާގެ، މާލެ

– މެދު ހެންވޭރު ދާއިރާ – އަހުމަދު ރިޝްވާން ރަޝީދު – ހ. ވޭމައުތު / މާލެ

– ހެންވޭރު ދެކުނު ދާއިރާ – ހައްވާ ނިޙްލާ – ހ. ތަރަބޫޒުގެ / މާލެ

– މާފަންނު ދެކުނު ދާއިރާ – އަހުމަދު އިމްރާން – މ. ފަޅުމަތީގެ / މާލެ

މާލޭގެ މޭޔަރުގެ މަގާމު ހުސްވީ އެ މަގާމުގައި ހުންނެވި ރައީސް ޑރ. މުހައްމަދު މުއިއްޒު ރައީސުލްޖުމްހޫރިއްޔާގެ މަސްއޫލިއްޔަތުތަކާ ހަވާލުވެވަޑައިގަތުމާ ގުޅިގެންނެވެ. އަދި އެމަނިކުފާނުގެ ސަރުކާރުގެ މަގާމުތަކާއި ބައެއް ކައުންސިލަރުން ހަވާލުވެވަޑައިގަތުމާ ގުޅިގެން އެ މަގާމުތައް ވެސް ވަނީ ހުސްވެފަ އެވެ.

އެގޮތުން, މާފަންނު ދެކުނު ދާއިރާ، މެދު ހެންވޭރު ދާއިރާ، އަދި ހެންވޭރު ދެކުނު ދާއިރާގެ ކައުންސިލް މެންބަރުން އިންތިހާބު ކުރަން ވަނީ ހަމަޖެހިފަ އެވެ. އެ އިންތިހާބު އޮންނާނީ ޖެނުއަރީ 13 ގަ އެވެ.