އައްޑޫގައި މިފަކަށް އައިސް ސިލްސިލާ މާރާމާރީތަކެއް އިތުރުވެފައިވާތީ މިހާރު ފުލުހުންގެ ހާއްސަ އޮޕަރޭޝަނެއް ފަށާފައިވާ ކަމަަށް އައްޑޫ ސިޓީ ފޮލިސް އިން ބުނެފިއެވެ.

މައުލޫމާތު ލިބިފައިވާ ގޮތުގައި މާރަމާރީތައް އިތުރުވެފައި މިވަނީ، ކުރީއްސުރެ ހިތަދޫ އަށް ނިސްބަތްވާ ދެ ގްރޫޕެއް ދެމެދުގައި އޮތް މައްސަލައަކާއި ގުޅިގެންނެވެ. ނަމަވެސް ފަހަކަށް އައިސް މާރާމާރީ އިތުރުވެފައިވާއިރު، ބައެއް ތަންތަނަށްވެސް ވަނީ ގެއްލުން ދީފައެވެ. އަދި މި މާރާމާރީތަކުގައި ތޫނު ހަތިޔާރު ދަނީ ބޭނުން ކުރަމުންނެވެ.

މިގޮތަށް ހިނގި މާރާމާރީގައި ރޭ ވެސް އެކަކަށް އަނިޔާވެ އޭނާ އަށް އައްޑޫ އެކުއެޓޯރިއަލް ހޮސްޕިޓަލުގައި ދަނީ ފަރުވާ ދެމުންނެވެ. އަދި އޭނާގެ ހާލަތު ސީރިއަސް ކަމަށް ހޮސްޕިޓަލުން ބުނެއެވެ.

Advertisement

އައްޑޫގައި މިފަހަކަށް ކުށުގެ މައްސަތައް އިތުރުވަމުންދާތީ، އައްޑޫސިޓީ ކައުންސިލުން ވެސް ވަނީ ކަންބޮޑުވުން ފާޅުކޮށްފައެވެ. އަދި މިކަމާއި ގުޅިގެން ފުލުހުންނާއި ބައްދަލުކޮށް އެކަންކަމަށް ހައްލެއް ގެނެސްދީ އައްޑޫ އަމާން އޮމާންތަނަކަށް ހަދައި ދިނުމަށް ވަނީ އެދިފައެވެ.

އައްޑޫގައި މިފަހަކަށް އައިސް ކުށްކުރުން އިތުރުވެފައިވާއިރު، މައްސަލަތައް ބޮޑަށް އިތުރުވެފައިވަނީ އައްޑޫސިޓީ ހިތަދޫ އަދި ފޭދޫގައި ކަމަށް ފުލުހުން މައުލޫމާތު ދެއެވެ.