މަސްތުވާތަކެތީގެ މައްސަލައެއްގައި ދިވެހި ފުލުހުންގެ ބެލުމުގެ ދަށަށް ގެނެސްފައިވާ މަޝްހޫރު ރެޕް އާޓިސްޓް އިސްމާއިލް އިފްހާމް (ޕެސްޓް)ގެ މައްސަލަ ދައުލަތުން އިސްތިއުނާފަށް ހުށަހަޅައިފިއެވެ.

ދައުލަތުން އެމައްސަލަ ހައިކޯޓުގައި އިސްތިއުނާފު ކޮށްފައިވަނީ އޭނާގެ މައްޗަށް އުފުލި ދައުވާތައް ސާބިތުނުވާކަމަށް ކްރިމިނަލް ކޯޓުން ނިންމި ނިންމުމާއި ގުޅިގެންނެވެ.

ޕެސްޓުގެ މައްޗަށް ދައުލަތުން އުފުލާފައިވަނީ ރާއްޖެއަށް މަސްތުވާތަކެތި އެތެރެކުރުމަށްފަހު އެ ތަކެތި ބޭނުންކޮށް ގެންގުޅެ އަދި އެ ތަކެތި ވިޔަފާރި ކުރާކަމަށް ތުހުމަތުކުރެވޭ މައްސަލައަކާ ގުޅިގެން ކެނެބިސް ޓްރެފިކް ކުރުމާއި ޑައިމޯފިން ޓްރެފިކް ކުރުމުގެ ދައުވާއާއި ޖަދުވަލު އެކެއްގައިވާ މަސްތުވާއެއްޗެއް ޓްރެފިކް ކުރުމުގެ ކުށުގެ ދައުވާ އާއި ކެނެބިސް ބޭނުންކުރުމުގެ ކުށުގެ ދައުވާއާއި ކުށް ކޮށްގެން ހޯދާ މުދަލާއި ފައިސާ ބޭނުންކުރުމާއި އަތުގައި ބެހެއްޓުމާއި ސިއްރުކުރުމުގެ ކުށުގެ ދައުވާއެވެ.

މަސްތުވާތަކެއްޗާއި ގުޅޭ ގޮތުން ފުލުހުން ހިންގި އޮޕަރޭޝަނެއްގައި ޕެސްޓް ހައްޔަރުކޮށްފައިވަނީ 2021 ވަނަ އަހަރު ފެބްރުއަރީ މަހުގެ 13 ވަނަ ދުވަހުއެވެ. އޭރު އޭނާގެ މައްޗަށް ދައުލަތުން ވަނީ ބޮޑެތި ދައުވާތަކެއް އުފުލާފައެވެ. ޕެސްޓުގެ މައްޗަށް އުފުލި ފަސް ދައުވާގެ ތެރެއިން ތިން ދައުވާއަކީ އުމުރު ދުވަހުގެ ޖަލު ހުކުމެއް އަންނަ މަސްތުވާތަކެތި ޓްރެފިކިންގެ ދައުވާތަކެވެ.

އެކަށީގެންވާ ބޭސްފަރުވާ ނުލިބޭ ކަމަށް ބުނެ ޕެސްޓް ޝަކުވާ ކުރުމުން މިދިޔަ އަހަރު މާރޗް މަހު ޝަރުތުތަކާ އެކު ކްރިމިނަލް ކޯޓުން އޭނާ ގޭބަންދަށް ބަދަލުކުރަން ނިންމީ ދެ މަސް ދުވަހަށެވެ. އެހެންނަމަވެސް ދައުލަތުން ވަނީ އެމައްސަލަ ހައި ކޯޓުގައި އިސްތިއުނާފުކޮށްފައެވެ. މިގޮތުން ބޭސްފަރުވާއާ ގުޅޭ ގޮތުން ކުރި ޝަކުވާތަކަށް ބެލި ކަމަށް ދަށު ކޯޓުގެ އަމުރުގައި އޮތް ކަމުގައި ވިޔަސް, އެ ކަންކަމުގެ ތަފްސީލު އެ ނިންމުމުން އެނގެން ނެތުމުގެ ސަބަބުން މިއަދު ހައިކޯޓުން ނިންމާފައިވަނީ އޭނާ އަނބުރާ ޖަލަށް ބަދަލު ކުރުމަށެވެ.

އެ މައްސަލައިގައި ކްރިމިނަލް ކޯޓުން އޭނާ ދޫކޮށްލުމަށް ހުކުމްކޮށްފައިވަނީ މިދިޔަ އޮގަސްޓު މަހުގެ 24 ގައެވެ. މި މައްސަލައިގައި ކްރިމިނަލް ކޯޓުން ކުރި ހުކުމުގައި ވިދާޅުވެފައިވަނީ އެ ދައުވާތައް ސާބިތުވާ ވަރަށް ދައުލަތުން ހެކި ހުށަހެޅިފައި ނުވާ ކަމަށެވެ. އަދި އެ މައްސަލައިގައި ދައުލަތުން ހުށައަޅާފައިވާ ހެކިތަކަކީ ޝައްކެއް ނެތް މިންވަރަށް މީހެއް މައްޗަށް ކުށް ސާބިތުކުރުމަށް އެކަށީގެންވާ ހެކިތަކެއް ނޫންކަން ފާހަގަކުރައްވާ ގާޒީ ވަނީ އެ މީހުންގެ މައްޗަށް ކުށް ސާބިތުނުވާކަމަށް ކަނޑައަޅާފައެވެ.

އެހެން ނަމަވެސް ދައުލަތުން ވަނީ މިދިޔަ ނޮވެމްބަރު މަހުގެ 27 ގައި ވަނީ އެ މައްސަލަ ހައިކޯޓުގައި އިސްތިއުނާފު ކޮށްފައެވެ.

ދައުލަތުން ޕެސްޓުގެ މައްޗަށް އުފުލި ދައުވާތައް ސާބިތުވި ނަމަ އޭނާގެ މައްޗަށް އުމުރު ދުވަހުގެ ޖަލު ހުކުމެއް އަންނާނެއެވެ. އަދި އެއް މިލިއަނާއި 10 މިލިއަނާއި ދެމެދުގެ އަދަދަކުން ޖޫރިމަނާ ކުރާނެ އެވެ.

އެ މައްސަލައިގައި ޕެސްޓުގެ އިތުރުން ލ. ގަން/ ތުނޑި، އަބަދަށް އުފާ، މުހައްމަދު ސުއައިދާއި، ލ. ގަން/ ތުނޑި، ހަނދުވަރީހިޔާ، އަހުމަދު ޝަމްއޫންގެ މައްޗަށް ވެސް ވަނީ ދައުވާ އުފުލާފައެވެ.