ކޭ ޕާކް ރެސިޑެންސްގެ މެނޭޖިން ޑިރެކްޓަރު ހަސަން މަމްދޫހު (މަންޑޭ) ދިރިއުޅޭ އެޕާޓުމަންޓު ކޯޓު އަމުރެއްގެ ދަށުން ބަލައި ފާސްކޮށް ފުލުހުންގެ ބެލުމުގެ ދަށަށް ގެންދިޔަ އަގުބޮޑު މުދާ އަނބުރާ ހޯދަން އޭނާގެ ފަރާތުން ހައިކޯޓަށް ހުށަހެޅި އިސްތިއުނާފު މައްސަލަ ބަލައި ނުގަނެ ބޭރުކޮށްލައިފިއެވެ.

ކޭ ޕާކް ރެސިޑެންސްގެ މައްސަލައިގައި ތުހުމަތު ކުރެވޭ މަންޑޭ ދިރިއުޅޭގެ ކޯޓު އަމުރެއްގެ ދަށުން އިއްޔެ ބަލާ ފާސްކޮށް މުދާތައް ގެންގޮސްފައިވަނީ މިދިޔަ މަހުގެ 19 ވަނަ ދުވަހުއެވެ. އެމައްސަލައާއި ގުޅިގެން މަންޑޭގެ ފަރާތުން އެއަމުރު ހައިކޯޓަށް ހުށަހެޅީ މިދިޔަ ހަފްތާގެ ހޯމަ ދުވަހުއެވެ. ނަމަވެސް އިއްޔެ ހައިކޯޓުން ވަނީ މައްސަލަ ބަލައި ނުގަންނަން ނިންމައި، އިސްތިއުނާފު މައްސަލަ ބޭރުކޮށްލާފައެވެ.

ހައިކޯޓުން އެ މައްސަލަ ބަލައި ނުގަންނަން ނިންމާފައިވަނީ އެ އަމުރު އިސްތިއުނާފު ކުރަން ޖެހޭ ގާނޫނީ ސަބަބެއް މަންޑޭގެ ފަރާތުން ހުށަހަޅާފައިނުވާތީއެވެ.

އޮޅުވާލައިގެން ގިނަ ފައިސާތަކަކަށް ހިޔާނާތްތެރިވެފައިވާ މަންޑޭ ދިރިއުޅެމުން ދިޔަ ޕެންޓް ހައުސްގެ އަގަކީ 7.8 މިލިއަން ރުފިޔާއެވެ. ފުލުހުން އެގެ ބަލައި ފާސްކޮށްފައިވާއިރު، ދާދިފަހުން ޕްރޮސެކިއުޓަރ ޖެނެރަލް އޮފީހުން ބޭއްވި ނޫސްވެރިންގެ ބައްދަލުވުމެއްގައި ވަނީ މަންޑޭ ދިރިއުޅެމުން ދިޔަ އަގުބޮޑު ދިރިއުޅުމުގެ މައުލޫމާތު ހިއްސާކޮށްފައެވެ.

އެގޮތުން އެ އެޕާޓްމެންޓް ފުލުހުންގެ ބެލުމުގެ ދަަށަށް ގެނެސް، އެތަނުގައި ހުރި މުދާ ބަލާ ފާސްކުރިއިރު، ގާތް ގަނޑަކަށް 7 މިލިއަން ރުފިޔާގެ މުދާ އެތަނުގައި ހުރި ކަމަށް ޕީޖީ އޮފީހުން ވަނީ ބުނެފައެވެ.

ޕީޖީން އާންމު ކުރި ބައެއް މައުލޫމާތު:

• ގާތްގަނޑަކަށް ނުކަނޑާ ހުރި 200 ވަރަކަށް ސެންޓުފުޅި

• ގާތްގަނޑަކަށް 90،000 ރުފިޔާގެ ދަބަސް

• 40،000ރ، 50،000ރ ގެ ހަތް ދަބަސް

• 10،000 ޑޮލަރު އަދި، 25،000 ޑޮލަރުގެ ގަހަނާ

މަންޑޭގެ މައްޗަށް ކުރަން ނިންމާފައިވަނީ މަނީ ލޯންޑަރިން އާއި ޓެރަރިޒަމް ފައިނޭންސް ކުރުމުގެ ގާނޫނުގެ ދަށުން މަނީ ލޯންޑަރިންގެ ދައުވާއެވެ. އަދި ސައްހަ ނޫން ލިޔުމުގެ ދައުވާއާއި އޮޅުވާލުމުގެ ކުށުގެ ދައުވާއާއި ޓެކުގެ ދައުވާ ކުރަން ޕީޖީގެ ވިސްނުން އެބަހުއްޓެވެ. މި ހުރިހާ ދައުވާތަކެއް ކުރަން ނިންމާފައިވަނީ ކޮންމެ ހާދިސާއަކަށް ވަކިވަކިން ކަމަށް ވާތީ، މަންޑޭގެ މައްޗަށް 225 އެއްހާ ދައުވާ ކުރާނެ ކަމަށް ބެލެވޭ ކަމަށް އޭނާ ވިދާޅުވިއެވެ.