ޕީޕީއެމް/ޕީއެންސީގެ ލީޑަރަކަށް މީގެ ކުރިން ހުންނެވި ކުރީގެ ރައީސް ޔާމީން ޕާޓީން ވަކިވެވަޑައިގަތުމާއި ގުޅިގެން އެ ކޯލިޝަންގެ ލީޑަރަކަށް، ރައީސް، މުހައްމަދު މުއިއްޒު އިންތިހާބުކޮށްފިއެވެ.

ރައީސް މުއިއްޒު ކޯލިޝަންގެ ލީޑަރަކަށް އިންތިހާބު ކުރައްވާފައިވަނީ މިރޭ ބޭއްވި ޕްރޮގްރެސިވް ކޮންގްރެސް ކޯލިޝަންގެ ޖޮއިންޓް ސެނެޓްގެ 6 ވަނަ ބައްދަލުވުމުގައި ބައިވެރިވި 103 ސެނެޓަރުންގެ އިއްތިފާގުންނެވެ. އެމަނިކުފާނު ކޯލިޝަންގެ ލީޑަރަކަށް އިންތިހާބު ކުރައްވާފައިވާއިރު، އެމަނިކުފާނަކީ ޕީއެންސީގެ ރައީސް ވެސް މެއެވެ.

ޕީޕީއެމް/ޕީއެންސީގެ ލީޑަރަކަށް މީގެ ކުރިން ހުންނެވީ ކުރީގެ ރައީސް ޔާމީންއެވެ. ނަމަވެސް އެމަނިކުފާނު ވަނީ އެޕާޓީން ވަކިވެވަޑައިގެން ޕީޕަލްސް ނެޝަނަލް ފްރޮންޓް (ޕީއެންއެފް)ގެ ނަމުގައި އުފައްދަވާފައެވެ.

Advertisement

ޕީއެންއެފް އުފައްދަވާފައިވާއިރު، އެޕާޓީ ރަޖިސްޓްރީ ކުރުމަށް މާދަމާ އިލެކްޝަންސް ކޮމިޝަންސް (އީސީ) އަށް ހުށަހެޅުމުގެ މަސައްކަތް ޕާޓީގެ އިސްބޭފުޅުން އަންނަނީ ކުރައްވަމުންނެވެ.

ޕީއެންއެފް އުފެއްދެވުމުގެ ހުއްދަ އީސީން ދީފައިވަނީ މިދިޔަ މަހުގެ 29 ވަނަ ދުވަހުއެވެ. މި ހުއްދަ ދިނުމާއި އެކީ 3،000 މެމްބަރުން ހަމަކޮށް، އިލެކްޝަނަށް ހުށަހެޅުމުން އެއީ ސައްހަ މައުލޫމާތުތޯ ބެލުމަށްފަހު ޕާޓީއެއްގެ ގޮތުގައި ރަޖިސްޓްރީ ކުރެވޭނެއެވެ.