އިސްރާއީލުން ޣައްޒާއަށް ދެމުން އަންނަ ހަމަލާތައް ހުއްޓުވަން އދ.ގެ ސަލާމަތީ މަޖިލީހުން ހުށަހެޅި ގަރާރު އެމެރިކާއިން ވީޓޯ ކުރުމުން ދިވެހި ސަރުކާރުން ކަންބޮޑުވުން ފާޅުކޮށްފިއެވެ.

ރާއްޖޭން އެކަމުގެ ކަންބޮޑުވުން ފާޅުކޮށްފައިވަނީ ޚާރިޖީ ވަޒީރު މޫސާ ޒަމީރު އެމެރިކާގެ ސަފީރު، ހޫގޯ ޔޮން އާ އެކީ ބޭއްވި މަޝްވަރާ ބައްދަލުވުމެއްގެ ތެރެއިންނެވެ.

މި ބައްދަލުވުމުގެ މައުލޫމާތު ހިއްސާ ކުރައްވަމުން މިނިސްޓަރ ޒަމީރު ވިދާޅުވީ، ދިފާއީ ދާއިރާއާއި، ވިޔަފާރީގެ ދާއިރާގެ އިތުރުން ރައްޔިތުންގެ މެދުގައި އޮންނަ ގުޅުންފަދަ ދާއިރާތަކުން އެއްބާރުލުން ދިނުމާ ބެހޭގޮތުން މަޝްވަރާ ކުރައްވާފައިވާ ކަމަށެވެ.

Advertisement

މީގެ އިތުރުން ވެސް އދ. ގެ ސަލާމަތީ މަޖިލީހުން ހުށަހެޅި ގަރާރު އެމެރިކާއިން ވީޓޯ ކުރި މައްސަލައިގައި ކަންބޮޑުވުން ފާޅުކޮށްފައިވާނެ ކަމަށާއި ޣައްޒާއަށް އިންސާނީ އެހީ ވެއްދޭނެ މަގު ވަގުތުން ތަނަވަސްކޮށްދިނުމާއި ބެހޭ ގޮތުން މަޝްވަރާ ކުރެވުނު ކަމަށް ވެސް މިނިސްޓަރު ވިދާޅުވިއެވެ.

އެމެރިކާއަކީ ރާއްޖެއާއެކު ގާތްގުޅުމެއް ބާއްވާ އެހީތެރިކަން ފޯރުކޮށްދެމުން އަންނަ ޤައުމެކެވެ.

އެމެރިކާގެ ސަފީރު ވަނީ އެކި ވަޒީރުންނާއި ބައްދަލުކޮށް އެދާއިރާތަކުން ރާއްޖެއަށް ބޭނުންވާ ކަންތައްތަކުގައި އެމެރިކާއިން އެހީތެރިކަން ފޯރުކޮށްދެއްވާނެ ކަމަށް ވިދާޅުވެފައެވެ. އެގޮތުން ޓޫރިޒަމް މިނިސްޓަރ ފައިސަލް އާ ބައްދަލުކޮށް ހޫގޯ ޔޮން ވިދާޅުވީ، ފަތުރުވެރިކަމުގެ ދާއިރާ ކުރިއެރުވުމަށް ކެޕޭސިޓީ އިތުރުކުރުމާއި ދެގައުމުން ފަތުރުވެރިކަމުގެ އެއްބާރުލުންދޭ ދާއިރާތަކުގެ މައްޗަށްވެސް މަޝްވަރާ ކުރެވުނެވެ.