އަންނަ އަހަރު ރޯދަ މަހު ގިނަ މިސްކިތްތަކުގައި ތަރާވީސް ކުރާނީ ދިވެހި ހާފިޒުން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ވިދާޅުވެއްޖެ އެވެ.

މިނިސްޓަރު ޝަހީމު ފޭސްބުކްގައި ކުރެއްވި ޕޯސްޓެއްގައި ވިދާޅުވީ މިފަހަރު ރޯދަ މަހުގައި އިސްލާމީ މަރުކަޒާއި ސަލްމާން މިސްކިތުގައި އިމާމްވެ ތަރާވީސް ކުރާނީ ރީތިކޮށް ޤުރުއާން ކިޔަވާ އިލްމީ ދިވެހި ޒުވާން ޙާފިޒުން ކަމަށެވެ. އަދި ގިނަ މިސްކިތްތަކެއްގައި ދިވެހި ޙާފިޒުން ރޯދަ މަހު އިމާމުކަން ކުރާނެ ކަމަށްވެސް ޝަހީމު ވިދާޅުވި އެވެ.

ކޮންމެ އަހަރެއްގެ ރޯދަ މަހު މިސްކިތްތަކުގައި އިމާމުވެ ހިފްޒުކޮށް ތަރާވީހު ނަމާދު ކުރަން ގިނަ އަދަދަކަށް ބޭރުން ހާފިޒުން ގެންނަކަން ފާހަގަކޮށްލެވެ އެވެ.

Advertisement

ޝަހީމު މިހެން ވިދާޅުވި އިރު ގްރޭޑް 10 އިން މަތީގެ ދަރިވަރުންނަށް އިމާމުވެ ހުކުރު ކުރުމުގެ ހުއްދަ ދިނުމަށް ވެސް އިސްލާމިކް މިނިސްޓްރީން މިހާރު ވަނީ ނިންމާފަ އެވެ. މި ފުރުސަތު ދޭން ހަމަޖެހިފައި ވަނީ ގްރޭޑް 10، 11 އަދި 12 ގައި ކިޔަވަމުން އަންނަ ނުވަތަ ކިޔެވުން ނިންމާފައިވާ ދަރިވަރުންނަށެވެ.

ސާނަވީ ފެންވަރުގެ ދަރިވަރުންނަށް އިމާމުވެ ހުކުރު ކުރުމުގެ ހުއްދަ ދޭން ނިންމީ އިމާމުންނާއި ޚަތީބުންގެ ޒުވާން ޖީލެއް ބިނާކުރަން މަގުފަހި ކުރުމުގެ ގޮތުންނެވެ. އެގޮތުން މި ފުރުސަތު ދިނުމުގައި ތަޖުވީދުގެ މަގަށް ރީތިކޮށް، ޤުރުއާން ކިޔަވައި ނަމާދުގެ ފިގުހު ބައިތަކަށް އަހުލުވެރި ދަރިވަރުންނަށް އިސްކަން ދޭނެ އެވެ.