ރާއްޖެއިން ނައްތާލާފައިވާ ފައިލޭރިއާއަށް، ކުޅުދުއްފުށީ ސިޓީއިން އިތުރު 6 މީހަކު ޕޮޒިޓިވްވެ، ޕޮޒިޓިވްވި މީހުންގެ ޖުމްލަ އަދަދު 25 އަށް އަރާފައިވާ ކަމަށް، ހެލްތް ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފިއެވެ.

ހެލްތް ޕްރޮޓެކްޝަން އެޖެންސީ، (އެޗްޕީއޭ) އިން ބުނީ ފައިލޭރިއާއަށް ޕޮޒިޓިވްވެފައިވާ ކޭސްތަކެއް ފެނުނީ ކުޅުދުއްފުށީގައި ޑިސެމްބަރު 1 އިން 19އަށް އެއިޑްސް ދުވަހާއި ގުޅުވައިގެން އެރަށުގައި ތިބި ބިދޭސީ މަސައްކަތްތެރިންނަށް ހާއްސަކޮށް ކުރިއަށް ގެންދިޔަ ހެލްތު ސްކްރީނިން ކޭމްޕުގެ ތެރެއިންކަމަށެވެ.

މީގެ އިތުރުން އެޗްޕީއޭއިން ބުނީ ފައިލޭރިއާއަށް ޕޮޒިޓިވްވި ބިދޭސީން ރާއްޖެއަށް އެތެރެވެފައިވަނީ ފައިލޭރިއާ އާންމުކޮށް ފެންނަ ޤައުމުތަކުންކަމަށެވެ. އަދި ފައިލޭރިއާ ފެތުރުން ކޮންޓްރޯލް ކުރުމުގެ މަސައްކަތް ކުރަމުންދާކަމަށް އެޗްޕީއޭއިން ވަނީ ބުނެފައެވެ.

Advertisement

ކުޅުދުއްފުށިން ފައިލޭރިއާއަށް ޕޮޒިޓިވެފައިވާ ބަޔަކު ފެނުމާއެކު އިތުރު ބިދޭސީން ސްކްރީން ކުރުމުގެ މަސައްކަތް، އެޗްޕީއޭގެ ލަފާގެ މަތިން ކުޅުދުއްފުށީ ރީޖަނަލް ހޮސްޕިޓަލުން އަންނަނީ ކުރިއަށް ގެންދަމުންނެވެ.

މި ބައްޔަކީ 1968 ވަނަ އަހަރުން ފެށިގެން މިބަލި ކޮންޓްރޯލް ކުރުމަށް ފެއްޓެވި މަސައްކަތުން 2007 ވަނަ އަހަރު ރާއްޖެއިން އެއްކޮން ނައްތާލެވިފައިވާ ބައްޔެކެވެ.