މާފުށި ޖަލުގައި ތިބި ގައިދީން ބަނޑުހައި ހޫނުކަމުގެ ހަޅުތާލެއް ކުރަމުންދާ ކަމުގެ މައުލޫމާތު ލިބިފައިވާ ކަަމަށް މޯލްޑިވްސް ހިއުމަން ރައިޓްސް އެންޑް ޑިޓައިނީސް ވޮޗް އިން ބުނެފިއެވެ.

އެ ޖަމިއްޔާއިން ނެރުނު ބަޔާނެއްްގައި ބުނެފައި ވަނީ ގައިދީންގެ އާއިލާއިން ތުހުމަތު ކުރާގޮތުގައި މި ހަޅުތާލު ފެށިފައި ވަނީ މާފުށި ޖަލު ޔުނިޓް 10ގެ ފަސް ގައިދީއަކާއި މެދު ކަރެކްޝަނަލް ސާވިސް އިން ގެންގުޅެމުންދާ ތަފާތުކުރުންތަކެއްގެ ސަބަބުންނެވެ. އަދި އުސޫލުތަކެއްގެ ދަށުން އެހެން ގައިދީން ގޮޅިން ބޭރަށް ނެރޭ ގޮތަށް، މި ގައިދީންނަށް ކަނޑައެޅިފައިވާ ވަގުތުތަކުގައި ގޮޅިން ބޭރަށް ނުނެރުމާއި، އަދި އުސޫލުތަކާއި ހިލާފަށް އެކަހެރި ވަކިވަކި ގޮޅިތަކެއްގައި މި ގައިދީން ދިގު މުއްދަތަކަށް ބަންދުކޮށްފައި ބައިތިއްބާފައިވާ ކަމަށްވެސް ފާހަގަކޮށްފައި ވެއެވެ.

އޭގެ އިތުރުން ހުކުމްގައި ތިބޭ އެހެން ގައިދީންނަށްވެސް ލިބިދޭ ރިހެބިލިޓޭޝަން ޕްރޮގްރާމްތަކުގައި ބައިވެރިވުމުގެ ފުރުސަރު މި ގައިދީންނަށް ނުދޭކަންވެސް އެ ބަޔާނުގައި ފާހަގަކޮށްފައި ވެއެވެ.

Advertisement

މިކަމާއި ގުޅިގެން ކަރެކްޝަނަލް ސާވިސްގެ މީޑިއާ އޮފިޝަލް ވިދާޅުވީ، އެ ގައިދީންގެ ހުރި ކަންބޮޑުވުންތައް ހައްލު ކުރުމަށް މަސައްކަތް ކުރަމުންދާ ކަމަށެވެ.