މޫސުމީ ސަލާމަތް ނުވަތަ ކްލައިމެޓް ސެކިއުރިޓީއަކީ މޫސުމަށް އަންނަ ބަދަލުތަކުގެ ސަބަބުން ސަލާމަތަށް ކުރާ އަސަރުތައް ތަހުލީލުކުރާ ސިޔާސީ އަދި ސިޔާސަތުގެ އޮނިގަނޑެކެވެ. މޫސުމީ ސަލާމަތް ގުޅިފައިވަނީ ގްރީންހައުސް ގޭސް ބޭރުވާ މިންވަރު އިތުރުވުމުގެ ސަބަބުން މޫސުމަށް އަންނަ ބަދަލުތަކާއެކު ކުރިމަތިވާ ނުރައްކާތެރި ހާދިސާތަކާއި މޫސުމީ ނުތަނަވަސްކަމުގެ ސަބަބުން އިޤްތިޞާދީ، އިޖުތިމާޢީ އަދި ތިމާވެށީގެ ނިޒާމުތަކަށް ބުރޫއަރާނެ ކަމަށް ލަފާކުރެވޭ ނުރައްކާތަކާއެވެ.

މޫސުމީ ސަލާމަތަށް ހުރި ނުރައްކާތަކާއި ގޮންޖެހުންތައް އަންނަނީ އެއް ދުވަހުން އަނެއް ދުވަހަށް އިތުރުވަމުންނެވެ. މިކަންކަމާ ގުޅިގެން ކުރިމަތިލާންޖެހޭ ކަންތައްތަކަށް ކުރަންޖެހޭ ހޭދައާއި ހޯދަންޖެހޭ ވަސީލަތްތަކާއި ކުރަންޖެހޭ މަސައްކަތަށް ބަލާއިރު ޤައުމީ ސަލާމަތާއި އަސްކަރީ ވަސީލަތަކާއި ސިފައިންނަށް ޤައުމު ގޮވާލާ ހާލަތްތައް ކުރިއަށް އޮތްތާ ދާނީ އިތުރުވަމުންނެވެ. މާނައަކީ ޤައުމީ ސަލާމަތުގައި ސަލާމަތީ ޚިދުމަތްތަކުން މިހާރު އަދާކުރާ ދައުރުގެ އިތުރުން އާ މައިދާނެއްގައި ހަނގުރާމަކުރަން ޖެހުމެވެ. މިއިން ކޮންމެ ކަމަކީ މީހުންނާއި ވަސީލަތާ ގުޅިފައިވާ ކަމަކަށްވާތީ މޫސުމީ ސަލާމަތަކީ އަސާސީ ގޮތުން ޤައުމެއްގެ އިޤްތިޞާދީ އަދި ސިޔާސީ ބާރަށް އިޝާރާތްކުރާ ހުރިހާ ކަމެއް ހިމެނޭ ލަފުޒެކެވެ.

މޫސުމީ ސަލާމަތް ފުރޮޅިގެންދާ ގޮތަކުން ޤައުމީ ސަލާމަތީ ޚިދުމަތްތަކަށް ކުރިމަތިވާ ސީދާ ނުރައްކާތަކަކާއި ނުސީދާ ނުރައްކާތަކެއް ހުންނާނެވެ. މިގޮތުން ބަލާއިރު ކަނޑުގެ ލޮނުގަނޑު އުފުލުމުންނާއި ހޫނުގަދަވުމުން އަސްކަރީ މަރުކަޒުތަކަށާއި ސިފައިން ބޭނުންކުރާ ވަސީލަތްތަކަށް ސީދާކުރާ އަސަރުތަކުގެ އިތުރުން ސިފައިން ހިންގާ އަސްކަރީ، ސަލާމަތީ، އިންސާނީ، އަދި އިޖުތިމާޢީ އޮޕަރޭޝަންތަކަށް ވެސް އަސަރުކުރާނެއެވެ.

Advertisement

މޫސުމަށް އަންނަ ބަދަލުތަކާއެކު ދުނިޔޭގެ ސުލުހައަށް ވެސް ނުރައްކާ ކުރިމަތިވާނެއެވެ. މިގޮތުން ހަނގުރާމައިގެ އާ ތިއޭޓަރުތައް އުފެދިދާނެ ކަމަށް ސްޓްރެޓެޖިސްޓުން ލަފާކުރައްވައެވެ. ހޫނު ގަދަވުމުން ގިރާލަމުންދާ އައިސްތަކުގެ ސަބަބުން އާ މަޢުދަނީ ވަސީލަތްތައް ހުޅުވިގެންދާ ސަރަހައްދުތަކަށް އަތްގަދަކުރުމަށް ދުނިޔޭގެ ބޮޑެތި ބާރުތަކުން މަސައްކަތް ކުރުމަކީ އެކަށީގެން ނުވާކަމެއް ނޫނެވެ. މިހެންކަމުން މޫސުމަށް އަންނަ ބަދަލުތައް މާނަކުރެވެނީ "ތްރެޓް މަލްޓިޕްލައިއާ" ނުވަތަ "ކެޓަލައިސްޓް ޓު ކޮންފްލިކްޓް" ގެ ގޮތުގައެވެ. މޫސުމީ ސަލާމަތާ ބެހޭ ވާހަކަތަކުން އާންމުކޮށް ލަފާކުރެވެނީ ދެމެހެއްޓެނިވި ކޯޅުންތަކެއްގެ ޒަމާނެކެވެ. ދުނިޔޭގެ ފިނި ހަނގުރާމައިގެ ދުވަސްވަރު ކުރިމަތިވި ވަރަށް ވުރެ މާ ބޮޑަށް ވާނުވާ ނޭނގޭ އަދި ލަފާނުކުރެވޭ ސަލާމަތީ މާހައުލެކެވެ.

ޤައުމީ ސަލާމަތުގެ ސްޓްރެޓެޖީތަކުގެ ތެރެއަށް މޫސުމީ ސަލާމަތް ނުވަތަ މޫސުމީ ރައްކާތެރިކަން ޤައުމުތަކުން ދަނީ އިތުރުކުރަމުންނެވެ. އަދި މިކަމަށް އެކްޝަން ޕްލޭންތައް ދަނީ އެކުލަވާލަމުންނެވެ. މޫސުމަށް ތައްޔާރުވެފައިވާ ދިފާޢީ ނިޒާމުތައް ދަނީ އެކުލަވާލަމުންނެވެ. މޫސުމީ ގޮންޖެހުންތައް ސަލާމަތީ މައްސަލައެއްގެ ގޮތުގައި ބަލައިގަތުން ނޫންގޮތެއް ދުނިޔެއަށް ދަނީ މަޖުބޫރުވަމުންނެވެ. ޝައްކެއްނެތް ކަމަކީ މޫސުމީ ނުރައްކާތަކުން އިޤްތިޞާދީ، އިޖުތިމާޢީ، ސިޔާސީ ނިޒާމުތަކަށް ބޮޑެތި ބަދަލުތަކެއް އަންނާނެކަމެވެ.

އެކުލަވާލަމުންނެވެ. މޫސުމީ ގޮންޖެހުންތައް ސަލާމަތީ މައްސަލައެއްގެ ގޮތުގައި ބަލައިގަތުން ނޫންގޮތެއް ދުނިޔެއަށް ދަނީ މަޖުބޫރުވަމުންނެވެ. ޝައްކެއްނެތް ކަމަކީ މޫސުމީ ނުރައްކާތަކުން އިޤްތިޞާދީ، އިޖުތިމާޢީ، ސިޔާސީ ނިޒާމުތަކަށް ބޮޑެތި ބަދަލުތަކެއް އަންނާނެކަމެވެ.

ދުނިޔެއަށް ބަލާއިރު ހަމަނުޖެހުންތަކާއި ހަނގުރާމަތަކާއި ކޯޅުންތައް ދިގުދެމިގެން ދަނީއެވެ. ލަފާކުރެވޭ ގޮތުގައި މިއަދު ދެބިލިއަން މީހުން ދިރިއުޅެނީ ނާޒުކު އަދި ހަމަނުޖެހުންތަކުގެ އަސަރު ކުރާ ސަރަހައްދުތަކުގައެވެ. މިހެން މިކަން އޮއްވައި، ތިމާވެށްޓަށް ކުރާ ނޭދެވޭ އަސަރުތަކުގެ ސަބަބުން އެ އަދަދު އިތުރަށް ގުނަވަމުންދާނެއެވެ. ތިމާވެށީގެ ނުވަތަ މޫސުމީ ރެފިއުޖީންގެ މައްސަލަ ބޮޑުވާނެއެވެ. ދިރިއުޅުމުގެ އަގުތަކާއި ކާބޯތަކެތީގެ އަގު އުފުލި، ގުދުރަތީ ވަސީލަތްތަކަށް ވާދަވެރިކަން އިތުރުވެ، ގެދޮރުނެތް މީހުންނާއި ކާބޯތަކެއްޗަށް ޖެހިފައިވާ މީހުން އިތުރުވާނެއެވެ. މޫސުމަށް އަންނަ ބަދަލުތަކަކީ ބައިނަލްއަގްވާމީ އަދި ޤައުމީ ސުލްހައާއި ސަލާމަތަށް އޮތް ނުރައްކަލަކަށް ވަނީ މިހެންވީމައެވެ.