އޮޅުވާލައިގެން ފައިސާ ހޯދި މައްސަލާގައި މީގެ ކުރިން ހައްޔަރުކުރި ގ. ސިނަމާލެ 01 05-13 ޒައިދާން މުހައްމަދު ހާޝިމް އިތުރު ބައެއްގެ އަތުން ފައިސާ ނެގިތޯ ފުލުހުންގެ ހިދުމަތުން ބަލަން ފަށައިފިއެވެ.

ފޭކު ކުންފުންޏެއްގެ ނަމުގައި އޮޅުވާލައިގެން މުދާ ހޯދި މައްސަލައެއްގައި، މިދިޔަ އަހަރު ޒައިދާން ހައްޔަރުކޮށް ބަންދުކުރިއެވެ. ހާޝިމް އަކީ މީގެ ކުރިން ވެސް މަކަރާއި ހީލަތް ހެދުމުގެ ކުށްތަކުގެ ރިކޯޑު އޮންނަ މީހެކެވެ. އޭރު އޭނާ ބަންދުކުރުމަށް ފުލުހުން ކޯޓަށް ހުށަހެޅި ހެކީގެ ތެރޭގައި އޭނާ ކޮށްފައިވާ މުއާމަލާތްތަކާ ގުޅޭ ރިސިޓްތަކާއި ބޭންކް އެކައުންޓް ސްޓޭޓްމަންޓްތަކާއި އޮޅުވާލައިގެން މުދާ ހޯދުމަށް ބޭނުންކުރި ކަމަށް ތުހުމަތުކުރެވޭ ބޭންކް ސްލިޕްތަކާއި ކޯޓޭޝަނާއި އަދި އިންވޮއިސްތައް ވެސް ހިމެނެއެވެ.

ފުލުހުން ކޯޓުގައި ބުނެފައިވަނީ ހުޅުމާލޭގައި ހުންނަ ހާޑްވެއާ ފިހާރައެއް ކަމަށްވާ "ހޯމްވޯކް" އިން، ހާޝިމް ބޮޑެތި އަދަދުތަކުން ގަނެވިއްކުމުގެ މުއާމަލާތް ކޮށްފައިވާއިރު އެ މުދަލުގެ އަގަށް ވަގުތުން ފައިސާ ދޭން ޖެހޭއިރު އޭނާގެ ނަމުގައި އާއި އޭނާގެ ކުންފުނީގެ ނަމުގައިވާ އެއްވެސް އެކައުންޓެއްގައި އެ މިންވަރަށް ފައިސާ ނެތް ކަމަށެވެ.

Advertisement

ފުލުހުން މިއަދު ބުނީ އޭނާ އިތުރު މީހުންގެ އަތުން ފައިސާ ނަގާފައިވޭތޯ ބެލުމަށް ބޭނުންވާ ކަމަށެވެ.އެހެންކަމުން، ޒައިދާން، މަކަރާއި ހީލަތުން އޮޅުވާލައިގެން އެއްވެސް މީހެއްގެ އަތުން ފައިސާ ނަގާފައިވާނަމަ އެ މައުލޫމާތު ފުލުހުންގެ އިކޮނޮމިކް ކްރައިމް ޑިޕާޓްމަންޓުގެ ނަންބަރު 9790048 އަށް ގުޅައި ހިއްސާކުރަން ފުލުހުން ވަނީ އެދިފައެވެ.