އިއްޔެ މާލެއަށް ބޯކޮށް ވެހުނު ވާރޭގައި ގެއްލުން ލިބުނު ގެތަކުގެ ތެރެއިން 54 މީހަކު ވަގުތީ ހިޔާއަށް ބަދަލުކޮށްފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް ސެންޓާ (އެންޑީއެމްއޭ) އިން ބުނެފިއެވެ.

ރޭ އެންޑީއެމްއޭއިން ބޭއްވި ނޫސްވެރިންގެ ބައްދަލުވުމުގައި އެންޑީއެމްއޭގެ ޗީފް އެކްޒެކްޓިވް ހިސާން ހަސަން ވިދާޅުވީ، ވިއްސާރާގައި 140 ގެއަކަށް ފެންވަދެ ގެއްލުންތައް ލިބިފައިވާ ކަމަށެވެ.

ހިސާން ވިދާޅުވީ އެ ގެތަކުގެ ބިމު އަޑިންނާއި އެކި ތަންތަނުން ލީކުވެގެން ރިޕޯޓްކޮށްފައިވާ ކަމަށެވެ.

Advertisement

އެހެންވެ ކަމާއި ފުލުހުންނާއި އެމްއެންޑީއެފްގެ އިތުރުން ރެޑްކްރެސެންޓުން ހެދި އެސެސްމެންޓްތަކަށް އެގާރަގެއްގެ 54 މީހަކު ގެސްޓު ހައުސްތަކަށް ރޭ ބަދަލުވެފައިވާ ކަމަށް ހިސާން ވިދާޅުވިއެވެ. 

އެ މީހުންނަށް ތިން ދުވަހު ގެސްޓުހައުސްގައި ތިބުމުގެ ހިދުމާތާއި ކެވޭނެ އިންތިޒާމު އެންޑީއެމްއޭ އިން ހަމަޖައްސާނެއެވެ.

އަދި ތިން ދުވަހަށްވުރެ މުއްދަތު އިތުރުކުރަން ޖެހިއްޖެނަމަ އެކަންވެސް ކުރާނެ ކަމަށް ހިސާން ވިދާޅުވިއެވެ.

އެންޑީއެމްއޭ އިން ބުނެފައިވާ ގޮތުން ހޮނިހިރު ދުވަހުގެ ދަންވަރުން ފެށިގެން ރާއްޖެއަށް ކުރި ވިއްސާރާގައި ހަތް ރަށަކުން އެކި ގެއްލުންތައް ލިބިގެން ރިޕޯޓްކޮށްފައިވެއެވެ. އޭގެ ތެރެއިން ބައެއް ރަށްރަށުގެ ގެތަކަށް ފެންވަދެ ބޮޑެތި ގެއްލުންތަކެއް ލިބުނެވެ. އެންމެ ބޮޑު ގެއްލުނެއް ލިބުނީ ކ. ގުރައިދޫގެ އިތުރުން ކ. ހުރައަށެވެ.