މިހާރު ކުރިއަށްދާ ކޮޕާ އެމެރިކާ ފުޓްބޯޅަ މުބާރާތުގެ ކުއާޓާ ފައިނަލްގައި ޕެނަލްޓީ ޖަހައިގެން އެކުއޭޑޯ ބަލިކޮށް އެންމެ ފަހުގެ ޗެމްޕިއަން، އާޖެންޓީނާ އިން ސެމީ ފައިނަލަށް ދަތުރުކޮށްފިއެވެ.

މިއީ އާޖެންޓީނާ އިން މުބާރާތުގެ ސެމީ ފައިނަލަށް ޖެހިޖެހިގެން ދަތުރުކުރި ފަސްވަނަ ފަހަރެވެ. ސެމީގައި އެ ޓީމު ކުޅެން ޖެހޭނީ ވެނެޒުއެލާއާ ކެނެޑާ ކުރެން މޮޅުވާ ޓީމަކާ ދެކޮޅަށެވެ.

މި މެޗުގެ ފުރިހަމަވަގުތު ހަމަވިއިރު ދެ ޓީމު 1-1 އިން އެއްވަރުވުމުން، ޕެނަލްޓީ ޝޫޓްއައުޓްގައި އާޖެންޓީނާ ކުރިހޯދީ 4-2 އިންނެވެ.

Advertisement

މިއަދު ހެނދުނު ކުޅުނު މި މެޗުގައި ކުރީން ލީޑްނެގީ ވެސް އާޖެންޓީނާ އިންނެވެ. މެޗުގެ 35 ވަނަ މިނެޓުގައި އެ ޓީމަށް މި ލަނޑުޖަހައިދިނީ ޑިފެންޑަރު، ލިސަންދްރޯ މާޓިނޭޒް އެވެ.

މެޗުގެ 62 ވަނަ މިނެޓުގައި އެކުއޭޑޯ އަށް އެއްވަރުކޮށްދޭން ރަނުގެ ފުރުޞަތެއްލިބި އެ ޓީމުގެ ކެޕްޓަން، އެނާ ވެލެންސިއާ އަތުން ވަނީ ޕެނަލްޓީއެއް ބޭކާރުވެފައެވެ.

މެޗު ނިމެންދަނިކޮށް، އެކުއޭޑޯ އިން އެއްވަރުކުރީ އިތުރު ވަގުތުގެ ފުރަތަމަ މިނެޓުގެ ތެރޭގައި ކެވިން ރޮޑްރިގޭޒް ކާމިޔާބުކުރި ގޯލުންނެވެ.

މި މުބާރާތުގައި ދެން ކުޅޭ މެޗުގައި ވެނެޒުއެލާ ނިކުންނާނީ ކެނެޑާއާ ދެކޮޅަށެވެ. މި މެޗު ކުޅުމަށް ހަމަޖެހިފައިވަނީ މާދަމާ ހެނދުނު ރާއްޖޭގަޑިން 6 ޖަހާއިރު އެވެ.