އިނގިރޭސި ފުޓްބޯޅަ ސީޒަން ހުޅުވަން ކުޅޭ މެޗުގައި މެންޗެސްޓާ ޔުނައިޓެޑް އަތުން ޕެނަލްޓީ ޖަހައިގެން 7-6 އިން މޮޅުވެ މެންޗެސްޓާ ސިޓީން އެފްއޭ ޗެރިޓީ ޝީލްޑް އުފުލާލައިފި އެވެ.

ކޮމިއުނިޓީ ޝީލްޑް މެޗު ސިޓީން 2019 ވަނަ އަހަރަށް ފަހު ކާމިޔާބުކުރި ފުރަތަމަ ފަހަރެވެ.

ވެމްބްލީ ސްޓޭޑިއަމްގައި މިރޭ ކުޅުނު މެޗުގެ ފުރަތަމަ ހާފްގައި ގޯލެއް ފެނިގެން ގޮސްފައި ނުވާއިރު، މި ހާފުގައި ދެ ޓީމުން ކުރެ ޓީމަކަށް ގޯލާ އަމާޒުކޮށް ހަމަލާއެއް ފޮނުވާލެވިފައެއް ނުވެ އެވެ. މެޗުގެ ދެވަނަ ހާފްގައި ޔުނައިޓެޑަށް ލީޑު ނަގައިދޭން މާކަސް ރަޝްފޯޑަށް ރަނގަޅު ދެ ފުރުސަތެއް ލިބުނު ނަމަވެސް، އޭގެ ބޭނުން ހިފިފައެއް ނުވެ އެވެ.

Advertisement

މި މެޗުގައި ފެނިގެންދިޔަ ފުރަތަމަ ގޯލު މެޗުގެ 82 ވަނަ މިނެޓްގައި ޔުނައިޓެޑަށް ކާމިޔާބުކޮށްދިނީ އެލެހެންޑްރޯ ގަނާޗޯ އެވެ. މިއީ ސިޓީގެ ޕެނަލްޓީއޭރިއާ ތެރެއަށް ވަދެ ފޮނުވާލި ހަމަލާއަކުން ގަނާޗޯ ކާމިޔާބު ކުރި ގޯލެކެވެ. މި ގޯލާއެކު ޔުނައިޓެޑް މެޗުން މޮޅުވާން ދަނިކޮށް، މެޗުގެ 89 ވަނަ މިނެޓްގައި ބަނާޑޯ ސިލްވާ ވަނީ ސިޓީ އަށް ނަތީޖާ އެއްވަރުކޮށްދީފަ އެވެ. ސިޓީގެ އޮސްކާ ބޮބް ނަގައިދިން ހުރަހަކުން ސިލްވާ މި ގޯލު ކާމިޔާބު ކުރީ ބޮލުން ފޮނުވާލި ހަމަލާއަކުންނެވެ.

މެޗުގެ 90 މިނެޓްގެ ކުޅުން ހަމަވިއިރު ދެ ޓީމު ވެސް އެއްވަރުވެފައި އޮތުމުން ނަތީޖާ ނެރުނީ ޕެނަލްޓީންނެވެ.

ސިޓީން ޖެހި 8 ޕެނަލްޓީގެ ތެރެއިން ހަތް ޕެނަލްޓީ އެ ޓީމުން ވަނީ ކާމިޔާބުކޮށްފަ އެވެ. ސިޓީގެ ޕެނަލްޓީތައް ކާމިޔާބުކޮށްދިނީ ކެވިން ޑި ބްރޭނާ އާއި އާލިން ހާލަންޑް އާއި ސަވީނޯ އާއި ގޯލްކީޕަރު އެޑަސަން އާއި ނުނޭސް އާއި ރުބެން ޑިއާސްގެ އިތުރުން މަނުއަލް އަކަންޖީ އެވެ. ސިޓީން ޖެހި ޕެނަލްޓީތަކުގެ ތެރެއިން ކާމިޔާބު ނުކުރެވުނީ ސިލްވާ ޖެހި ޕެނަލްޓީ އެވެ.

ޔުނައިޓެޑުން ޖެހި ޕެނަލްޓީތައް ކާމިޔާބުކޮށްދިނީ ބްރޫނޯ ފެނާންޑޭސް އާއި ޑިއޯގޯ ޑަލޮޓް އާއި ކަސެމީރޯ އާއި ސްކޮޓް މެކްޓޮމިނޭ އާއި ލިސަންޑްރޯ މާޓިނޭޒް އެވެ. ޔުނައިޓެޑްގެ ޖޭޑަން ސަންޗޯ ފޮނުވާލި ޕެނަލްޓީ ސިޓީގެ ކީޕަރު އެޑަސަން މަތަކުރިއިރު، ޖޮނީ އެވަންސް ފޮނުވާލި ޕެނަލްޓީ ދިޔައީ ދަނޑިމަތިން ބޭރަށެވެ.