އިނގިރޭސި ޕްރޮފެޝަނަލް ފުޓްބޯޅަ ކުޅުންތެރިންގެ އެސޯސިއޭޝަން (ޕީއެފްއޭ) އިން ހޮވާ އަހަރުގެ މޮޅު ކުޅުންތެރިޔާގެ އެވޯޑު މެންޗެސްޓާ ސިޓީގެ ފިލް ފޮޑެން ހޯދައިފި އެވެ.

ފޮޑެން މި އެވޯޑު ހޯދީ ސިޓީގެ ފޯވާޑް އާލިން ބްރައުޓް ހާލަންޑް އާއި ސިޓީގެ މިޑްފީލްޑަރު ރޮޑްރީ އާއި ޗެލްސީގެ ކޯލް ޕާމާ އާއި އާސެނަލްގެ މާޓިން އޮޑެގާޑްގެ އިތުރުން އެސްޓަންވިލާގެ އޮލީ ވޮޓްކިންސްއާ ވާދަކޮށެވެ.

މިދިޔަ ސީޒަނުގައި ސިޓީން ޖެހިޖެހިގެން ހަތަރުވަނަ ފަހަރަށް ޕްރިމިއާ ލީގު ހޯދިއިރު، ފޮޑެން ވަނީ މިދިޔަ ސީޒަނުގައި ސިޓީ އަށް ކުޅެދިން 35 މެޗުގައި 19 ގޯލު ކާމިޔާބުކޮށްދީ، ސިޓީ އަށް ލީގު ހޯދައިދިނުމުގައި މުހިއްމު ދައުރެއް އަދާކޮށްފަ އެވެ.

Advertisement

ޕީއެފްއޭ މޮޅު ކުޅުންތެރިއާގެ އެވޯޑު ފޮޑެން ހޯދިއިރު އަހަރުގެ އެންމެ މޮޅު ޒުވާން ކުޅުންތެރިއާގެ މަގާމު ހޯދީ ޗެލްސީ އަށް ކުޅެމުން އަންނަ އުމުރުން 22 އަހަރުގެ ކޯލް ޕާމާ އެވެ. ޕާމާ ވަނީ ލީގުގައި މިދިޔަ ސީޒަނުގައި ކުޅެދިން 34 މެޗުގައި 22 ގޯލު ކާމިޔާބުކޮށްދީފަ އެވެ. ޕީއެފްއޭ އެންމެ މޮޅު އަންހެން ކުޅުންތެރިއާގެ މަގާމު ހޯދީ މެންޗެސްޓާ ސިޓީގެ އަންހެން ޓީމަށް ކުޅެމުން އަންނަ ޖެމެއިކާގެ ފޯވާޑް ހަދީޖާ ޝޯ އެވެ.