ފްރާންސުގެ މަޝްހޫރު ކުޅިވަރު މަޖައްލާ، ފްރާންސް ފުޓްބޯލް އިން ދެމުން އަންނަ ބެލޮންޑިއޯ އެވޯޑަށް އާޖެންޓީނާގެ ކެޕްޓަން ލިއޮނަލް މެސީ އަދި ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ވެސް މިފަހަރު ނޮމިނޭޓް ނުވި އެވެ.

ބެލޮންޑިއޯ އެވޯޑަށް ވާދަކުރާ 30 ކުޅުންތެރިންގެ ލިސްޓު ރޭ އިއުލާންކޮށްފައިވާއިރު، މިއީ 2003 ވަނަ އަހަރަށްފަހު މި އެވޯޑަށް މެސީ އަދި ރޮނާލްޑޯ ނޮމިނޭޓް ނުވި ފުރަތަމަ ފަހަރެވެ. މެސީ ވަނީ މި އެވޯޑް މީގެކުރިން އަށް ފަހަރު ހޯދާފަ އެވެ. އޭނާ އަކީ މި އެވޯޑް އެންމެ ގިނަ ފަހަރު ހޯދި ކުޅުންތެރިޔާ ވެސް މެ އެވެ. ރޮނާލްޑޯ ވަނީ މި އެވޯޑު ފަސް ފަހަރެއްގެ މަތިން ހޯދާފަ އެވެ.

މެސީ އާއި ރޮނާލްޑޯ ވެސް ޔޫރަޕްގެ ފުޓްބޯޅަ ދޫކޮށްލާފައިިވާއިރު، މެސީ މިހާރު ކުޅެމުން އަންނަނީ އެމެރިކާގެ އިންޓަ މަޔާމީ އަށެވެ. ރޮނާލްޑޯ ކުޅެމުން އަންނަނީ ސައުދީ ލީގުގެ އަލް ނަސްރަށެެވެ.

Advertisement

ބެލޮންޑިއޯ އެވޯޑަށް ވާދަކުރާ 30 ކުޅުންތެރިންގެ ތެރެއިން 10 ކުޅުންތެރިން ނިސްބަތްވަނީ ޕްރިމިއާ ލީގަށެވެ. ސްޕެނިޝް ލީގަށް ނިސްބަތްވާ 9 ކުޅުންތެރިން ހިމެނޭއިރު ޖަރުމަނު ލީގަށް ނިސްބަތްވާ ހަތަރު ކުޅުންތެރިން، އިޓަލީ ލީގަށް ނިސްބަތްވާ ހަތަރު ކުޅުންތެރިން އަދި ފްރެންޗް ލީގަށް ނިސްބަތްވާ އެއް ކުޅުންތެރިއަކު ހިމެނެ އެވެ.

މި އެވޯޑު ލިބޭ ކުޅުންތެރިއަކު އިއުލާން ކުރާނީ އޮކްޓޫބަރު މަހުގެ 28 ވަނަ ދުވަހު އެވެ.