ކްރިސްޓިއާނޯ ރޮނާލްޑޯގެ ކެރިއަރުގައި ކާމިޔާބުކުރި 900 ވަނަ ލަނޑާއެކު، ޔުއެފާ ނޭޝަންސް ލީގުގެ ފުރަތަމަ މެޗުން ޕޯޗުގަލް މޮޅުވެއްޖެއެވެ.

ކްރޮއޭޝިއާ އާއި ދެކޮޅަށް އަމިއްލަ ގައުމުގައި ކުޅުނު މި މެޗު ޕޯޗުގަލުން ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ.

ދެ ޓީމުގެ ފަރާތުންވެސް ފޯރިގަދަ ކުޅުމެއް ފެނިގެން ގޮސްފައިވާ މި މެޗުގެ ހަތްވަނަ މިނިޓްގައި ޕޯޗުގަލްގެ ޑިއޮގޯ ޑަލޮޓް ވަނީ ލަނޑެއް ކާމިޔާބުކޮށް އެ ޓީމަށް ކުރި ހޯދަދީފަ އެވެ.

Advertisement

އަދި މެޗުގެ 34 ވަނަ މިނިޓުގައި ކްރިސްޓިއާނޯ ރޮނާލްޑޯ ވަނީ އޭރިޔާ ތެރޭގައި ހުރެ ފޮނުވާލި ބާރު ހަމަލާއިން އިތުރު ލަނޑެއް ކާމިޔާބުކޮށް މެޗުގެ ނަތީޖާ 2-0 އަށް ބަދަލު ކޮށްފަ އެވެ. މިއީ ރޮނާލްޑޯ ގައުމީ ޓީމަށް ކާމިޔާބުކޮށްދިން 131 ވަނަ ގޯލެވެ. އަދި އޭނާގެ ފުޓްބޯޅަ ހަޔާތުގައި ޖެހި 900 ވަނަ ގޯލެވެ. މިއީ ފުޓްބޯޅައިގެ އެންމެ މަތީ ފަންތީގައި މި އަދަދަށް ކުޅުންތެރިއަކު ލަނޑުޖެހި ފުރަތަމަ ފަހަރެވެ.  

ފުރަތަމަ ހާފްގެ ކުޅުން ނިމެން ހަތަރު މިނިޓަށް ވެފައިވަނިކޮށް ޑަލޮޓު އަތުން ބައިކޮޅަށް ވަން ލަނޑާއެކު މެޗުގެ ނަތީޖާ ވަނީ 2-1 އަށް ބަދަލުވެފަ އެވެ.