މާލޭ ސިޓީގެ ދެ ކައުންސިލަރަކު ކުރީގެ ރައީސް ޔާމީން އިސްވެ ހުންނަވައިގެން އުފައްދަވާ ޕީޕަލްސް ނެޝަނަލް ފްރޮންޓް (ޕީއެންއެފް) އަށް ސޮއިކުރައްވައިފި އެވެ.

ޕީއެންއެފްގައި އިސްކޮށް އުޅުއްވާ ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވީ ޕީއެންއެފް އަށް ސޮއިކުރެއްވީ މާފަންނު ހުޅަނގު ދާއިރާގެ ކައުންސިލަރު އިބްރާހިމް އަބޫބަކުރު އާއި މައްޗަންގޯޅި ދެކުނު ދާއިރާގެ ކައުންސިލަރު އައިޝަތު ނާޒިމާ ކަމަށެވެ. މީގެކުރިން މި ދެ ކައުންސިލަރުން ވެސް ތިއްބެވީ ޕީޕީއެމްގަ އެވެ.

ޕީޕީއެމް ދޫކޮށްލި ސަބަބާއި ގުޅޭގޮތުން "ޗެނަލް13"ގައި ވާހަކަދައްކަމުން އިބްރާހިމް ވިދާޅުވީ ވެރިކަމަށް އައުމަށްފަހު ސަރުކާރުން ޕީޕީއެމް ހަލާކުކޮށްލާފައިވާ ކަމަށާއި އަދި ޔާމީންގެ ފޮޓޯ ބޭނުންކޮށްގެން ވެރިކަމަށް އައުމަށްފަހު އެމަނިކުފާނު ވެސް މިނިވަންކޮށްފައި ނުވާ ކަމަށެވެ. އަދި ސިޓީ ކައުންސިލްގެ ތެރޭގައި ކަންކަން ހިނގަމުންދަނީ ކައުންސިލުން ބޭނުންވާ ގޮތަކަށް ނޫން ކަމަށާއި ސިޓީ ކައުންސިލަށް ސަރުކާރުން ނުފޫޒު ފޯރުވަމުންދާ ކަމަށްވެސް ވިދާޅުވި އެވެ.

Advertisement

"އަޅުގަނޑު މިއަދުން ފެށިގެން މަސައްކަތް ކުރަމުންދާނީ ޕީއެންއެފްގައި،" އޭނާ ވިދާޅުވި އެވެ.

ސިޓީ ކައުންސިލްގެ ދެ މެމްބަރަކު ޕީޕީއެމުން ވަކިވިއިރު، ސިޓީ ކައުންސިލްގައި ތިއްބެވި ދެ ކައުންސިލަރަކު ދާދިފަހުން ވަނީ ވެރިކަން ކުރާ ޕީއެންސީއާ ގުޅިފަ އެވެ. ޕީއެންސީއާ ގުޅުނީ ގަލޮޅު މެދު ދާއިރާގެ ކައުންސިލަރު މަރިޔަމް ރީހާން ނާޒިމް އާއި ހެންވޭރު އުތުރު ދާއިރާގެ ކައުންސިލަރު އައިޝަތު ނިޒްލީ ރަޝީދު އެވެ. ރީހާން ކުރިން ހުންނެވީ ދަ ޑިމޮކްރެޓްސްގަ އެވެ. ރީހާން ކައުންސިލަށް އިންތިހާބުވީ އެމްޑީޕީގެ ޓިކެޓުގަ އެވެ. އަދި ނިޒްލީ ކުރިން ހުންނެވީ އެމްޑީޕީގަ އެވެ.