އިނގިރޭސި ޕްރިމިއާ ލީގުގައި ރޭ މެންޗެސްޓަރ ޔުނައިޓެޑާއި ދެކޮޅަށް އާސެނަލް ކުޅުނު މެޗު 2-0 ގެ ނަތީޖާއަކުން އާސެނަލް ކާމިޔާބުކޮށްފި އެވެ.

ލަންޑަނުގެ އެމިރޭޓްސް ސްޓޭޑިއަމްގައި ފަސްދޮޅަށް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗު އާސެނަލްއިން ކާމިޔާބުކުރިއިރު މިއީ ޔުނައިޓެޑްގެ ކޯޗު ކަމާއި އަލަށް ހަވާލުވި ރުބެން އަމޮރިމްގެ އިރުޝާދުގެ ދަށުން އެ ޓީމު ބަލިވި ފުރަތަމަ މެޗެވެ.

މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވާއިރު ދެ ޓީމަށްވެސް ވަނީ ލަނޑު ޖަހަން ރަގަޅު ފުރުސަތުތަކެއް ލިބިފަ އެވެ. އެގޮތުން ޔުނައިޓެޑްގެ ޑިއޮގޯ ޑަލޮޓް އަށް ލިބުނު ފުރުސަތު ފާހަގަކޮށްލެވެ އެވެ.

Advertisement

އާސެނަލް އިން މި މެޗުގައި ލަނޑު ޖަހާ ލީޑު ނަގާފައިވަނީ މެޗުގެ 54 ވަނަ މިނިޓުގައި ޑިފެންޑަރ ޖުރިއެން ޓިމްބަރ ކާމިޔާބުކޮށްދިން ލަނޑުންނެވެ. މި ލަނޑަކީ ޑެކްލަން ރައިސް ނެގި ކޯނަރު ބޮލުން ޖަހާ ގޯލުގެ ތެރެއަށް ފޮނުވާލައިގެން ޓިމްބަރ ކާމިޔާބުކޮށްފައިވާ ލަނޑެކެވެ.

އަދި މެޗުގެ 73 ވަނަ މިނިޓުގައި ތޯމަސް ޕާޓޭ ނަގައިދިން ކޯނަރުން ވިލިއަމް ސަލީބާ ވަނީ އިތުރު ލަނޑެއް ޖަހާ މެޗުގެ ނަތީޖާ 2-0 އަށް ބަދަލުކޮށްފަ އެވެ.

މިއީ މިދިޔަ ސީޒަން ފެށުނު ފަހުން އާސެނަލްއިން ކޯނަރުން ޖެހި 22 ވަނަ ގޯލެވެ. މި އަދަދަށް ޕްރިމިއާ ލީގުގެ އެއްވެސް ކްލަބަކަށް ކޯނަރުން ލަނޑު ޖެހިފައެއް ނުވެއެވެ.

މި މެޗުން އާސެނަލް މޮޅުވުމާއެކު އެ ޓީމަށް ވަނީ 28 ޕޮއިންޓާއެކު ތާވަލުގެ ތިންވަނަ ލިބިފަ އެވެ. އެއްވަނައިގައި އޮތް ލިވަޕޫލް އަށް 35 ޕޮއިންޓް ލިބިފައިވާއިރު ދެ ޓީމުގެ ދެމެދުގައިވާ ފަރަގު ވަނީ 7 ޕޮއިންޓަށް ކުޑަވެފަ އެވެ.