އެމެރިކާގައި ހިމަބިހި ބަލި ހަލުވިކަމާއެކު ފެތުރެމުންދާއިރު، މިއަހަރު މި ބަލީގެ ސަބަބުން ހަ މީހަކު މަރުވެފައިވާކަން އެމެރިކާގެ ބަލިތައް ކޮންޓްރޯލުކުރުމާއި ރައްކާތެރިކުރުމާބެހޭ މަރުކަޒު (ސީޑީސީ) އިން ކަށަވަރުކޮށްފިއެވެ.

ސީޑީސީން ބުރާސްފަތި ދުވަހު އާންމުކުރި މަޢުލޫމާތުން ދެނެގަނެވެނީ، މިއަހަރު ހިމަބިހީން މަރުވި މީހުންގެ އަދަދަކީ 2025 ވަނަ އަހަރު މި ބަލީގެ ސަބަބުން މަރުވި މީހުންގެ ދެގުނަ އަދަދެކެވެ. މިއީ 2000 ވަނަ އަހަރު އެމެރިކާގައި ހިމަބިހި ބަލި ދާއިމީކޮށް ފެތުރުން ނައްތާލެވުނުކަމަށް އިޢުލާނުކުރި ފަހުން، މި ބަލި އަލުން ބޮޑު މިންވަރަކަށް ފެތުރެމުންދާކަން ދައްކުވައިދޭ ހާދިސާއެކެވެ.

އެމެރިކާގައި މިއަހަރު ހިމަބިހި ޖެހުނު މީހުންގެ އަދަދު 5,000 އަށްވުރެ މައްޗަށް އަރާފައިވެއެވެ. މިފަދަ އަދަދަކަށް ހިމަބިހި ބަލި ޖެހުނު މީހުންގެ އަދަދު މަތިވެފައިވަނީ 1991 ވަނަ އަހަރުގެ ފަހުން ފުރަތަމަ ފަހަރަށެވެ. މި ހާލަތާއެކު، ހިމަބިހި ބަލި ނައްތާލެވިފައިވާ ޤައުމެއްގެ ދަރަޖަ އެމެރިކާއަށް ދެމެހެއްޓޭނެތޯ ޕޭން އެމެރިކަން ހެލްތް އޯގަނައިޒޭޝަންގެ ތަޖުރިބާކާރުންގެ ކޮމިޝަނުން ކުރިއަށް އޮތް ދުވަސްތަކުގައި ނިންމާނެކަމަށް ބެލެވެއެވެ.

Advertisement

ހިމަބިހީގެ އަސަރު އެންމެ ބޮޑަށް ފޯރާފައިވާ ސްޓޭޓްތަކުގެ ތެރެއިން ޕެންސިލްވޭނިއާއިން ނޮވެންބަރު 4 ވަނަ ދުވަހާ ހަމައަށް ހިމަބިހީގެ ސަބަބުން ހަ މަރެއް ރިޕޯޓުކޮށްފައިވެއެވެ. މީގެ އިތުރުން، ވިސްކޮންސިން ސްޓޭޓުގެ ސިއްހީ އިދާރާއިން ވަނީ މި ބަލީގެ ސަބަބުން ތުއްތު ކުއްޖަކު މަރުވިކަން ހާމަކޮށްފައެވެ. އަދި ނިއުޔޯކުންވެސް ހިމަބިހީގެ ސަބަބުން މީހަކު މަރުވިކަން ރިޕޯޓުކޮށްފައިވާއިރު، މިއީ އެ ސްޓޭޓުން 30 އަހަރަށްވުރެ ގިނަ ދުވަސް ފަހުން މި ބަލިން މީހަކު މަރުވިކަމުގެ ފުރަތަމަ ހާދިސާއެވެ.

ނަމަވެސް، ސީޑީސީން ކަށަވަރުކޮށްދިން ހަ މަރު ހިނގި ސްޓޭޓްތަކުގެ ނަންތައް އެ އިދާރާއިން ހާމަކޮށްފައެއް ނުވެއެވެ. ސްޓޭޓްތަކުން ރިޕޯޓުކުރާ މަރުގެ އަދަދާއި ސީޑީސީން ހާމަކުރި އަދަދު ތަފާތުވުން ފާހަގަކުރެވެއެވެ.

މި ތަފާތު އުފެދުނީ، އެމެރިކާގެ ސިއްހަތާބެހޭ ވަޒީރު ރޮބަރޓް އެފް. ކެނެޑީ ޖޫނިއަރގެ ބެއްލެވުމުގެ ދަށުން ހިމަބިހީގެ ސަބަބުން ހިނގާ މަރުތައް ހިސާބުކުރުމުގެ އުސޫލު ސީޑީސީން ބަދަލުކުރުމުންނެވެ. އެގޮތުން، ސްޓޭޓްތަކުގެ ސިއްހީ އިދާރާތަކުން ހާމަކުރާ އަދަދުތަކުގެ ބަދަލުގައި، ނޭޝަނަލް ސެންޓަރ ފޯ ހެލްތް ސްޓެޓިސްޓިކްސްގެ މަރުގެ ރެކޯޑުތައް ބޭނުންކޮށް މަރުގެ އަދަދު ހިސާބުކުރަން ފަށާފައިވެއެވެ.

މި ކަމާގުޅިގެން މީޑިއާއިން ހުށަހެޅި ސުވާލަށް، އެމެރިކާގެ ސިއްހަތާއި އިންސާނީ ޚިދުމަތްތަކާބެހޭ އިދާރާއިން އެވަގުތު ޖަވާބެއް ދީފައެއް ނުވެއެވެ.

ހިމަބިހި ބަލިން ރައްކާތެރިވުމަށް އެންމެ ފުރިހަމަ ފަރުވާއަކީ ވެކްސިން ނެގުމެވެ. ހިމަބިއްސާއި، ކޯފުއްޕިއާއި، ރުބެއްލާގެ އެމްއެމްއާރު ވެކްސިންގެ ދެ ޑޯޒް ފުރިހަމަކުރުމުން، ހިމަބިހި ބަލި ޖެހުމުން ގާތްގަނޑަކަށް 97 އިންސައްތަ ރައްކާތެރިކަން ލިބޭކަމަށް ސީޑީސީން ބުނެއެވެ.