އެއް އަކުރާއި ދެއަކުރުގެ ޑޮމެއިން ވިއްކުމަށް ތައްޔާރުވަމުންދާކަމުގައި ޓްރާންސްޕޯޓް އެންޑް ސިވިލްއޭވިއޭޝަން މިނިސްޓްރީން ހާމަކޮށްފިއެވެ.

ޓްރާންސްޕޯޓް މިނިސްޓަރީން މިފަދައިން ހާމަކުރެއްވީ މިއަދު ބޭއްވި ނޫސްވެރިންގެ ބައްދަލުވުމެއްގައެވެ.

މިނިސްޓްރީގެ މަސައްކަތްތަކާއިބެހޭގޮތުން މަޢުލޫމާތުދެއްވަމުން މިނިސްޓަރ މުޙައްމަދު އަމީން ވިދާޅުވީ ރާއްޖޭގައި މިހާތަނަށް ސަރުކާރުން ދޫކުރަމުން ގޮސްފައިވަނީ 4 އަކުރާއި 3 އަކުރުގެ ޑޮމެއިން ކަމަށާއި މިނިސްޓްރީގައި އަލަށް ޤާއިމުކުރާ ޑޮމެއިން ސިސްޓަމުގެ ތެރޭގައި 1 އަކުރު އަދި 2 ޑިޖިޓުގެ ޑޮމެއިން ވިއްކުމަށް ހުޅުވާލާނެކަމަށެވެ.

Advertisement

މިނިސްޓަރުގެ ވާހަކަފުޅުގައި ޑޮމެއިންގެ މައްސަލައިގެ ހާލަތަށް އަލިއަޅުވާލައްވަމުން ވިދާޅުވީ ރާއްޖޭގައި ބޭނުންކުރާ ޑޮމެއިންގެ %50 އިންސައްތައަކީ ސައްޚަނޫން ޑޮމެއިންކަމަށެވެ. މިގޮތުން ރާއްޖޭގައި ގާތްގަނޑަކަށް 1،400 ޑޮމެއިން ގެންގުޅޭ ކަމަށާއި އޭގެ ތެރޭގައި ސައްހަ ނޫން 700 އެއްހާ ޑޮމެއިން ހިމެނޭކަން މިނިސްޓަރ ފާހަގަކުރެއްވިއެވެ.

މީގެ އިތުރުން ޓްރާންސްޕޯޓް މިނިސްޓްރީގައި ޑޮމެއިންގެ ޚިދުމަތްދިނުމަށް ހަރުދަނާ އުސޫލެއް ނެތް ކަމަށާއި މިނިސްޓްރީގައި ބޭނުންކުރާ ސިސްޓަމުގައި ގިނަ ޑޮމެއިންތަކުގެ މައުލޫމާތު ފެންނަން ނެތް ކަމަށްވެސް މިނިސްޓަރ ފާހަގަކުރެއްވިއެވެ.

އަލަށް ވިއްކަން ފެށުމަށް ތައްޔާރުވަމުންދާ ޑޮމެއިންގެ ފެށޭ އަގުތަކަށް ބަދަލު ގެންނަވާނެ ކަމުގެ އިޝާރާތެއް މިނިސްޓަރ ކުރެއްވިއެވެ. މިނިސްޓަރ ވިދާޅުވީ އަލަށް ވިއްކާ ޑޮމެއިންގެ ބީލަން ފެށޭ އަގަށް ބަދަލުތަކެއް އަންނާނެ ކަމަށާއި މިހާރު ހުރި އަގުތަކަށްވުރެ ބޮޑުވާނެ ކަމަށެވެ. މިހާރު ސައިކަލުގެ ޑޮމެއިން އެއްގެ ފެށޭ އަގަކީ 50,000ރ އެވެ. އަދި ހަތަރު ފުރޮޅުލީ އުޅނަދުގެ ޑޮމެއިންގެ ފެށޭ އަގަކީ 100,000ރ އެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ވެރިކަމާއި ހަވާލުވިއިރު ޑޮމެއިންގެ މައްސަލަ އޮތީ ބޮއްސުންލާފައެވެ. އަދި ކުރީ ސަރުކާރުން ވަނީ ޑޮމެއިންގެ ޚިދުމަތް ދިނުންވެސް ހުއްޓާލާފައި ކަަމުގައި ޓްރާންސްޕޯޓް މިނިސްޓްރީން ވަނީ ކުރިން ހާމަކޮށްފައެވެ.