ފައިނަލުގައި 2-0 އިން ބްރޫޝިއާ ޑޯޓްމަންޑް ބަލިކޮށް ރެއާލް މެޑްރިޑުން 15 ވަނަ ފަހަރަށް ޔުއެފާ ޗެމްޕިއަންސް ލީގު ކާމިޔާބުކޮށްފި އެވެ.

ރެއާލުން މިހާރު ވަނީ ޗެމްޕިއަންސް ލީގުގެ ފައިނަލުގައި ކުޅުނު 18 ފަހަރުގެ ތެރެއިން 15 ފަހަރު ތަށި ހޯދައިފަ އެވެ. ރެއާލްގެ ކޯޗު ކާލޯ އަންޗެލޮޓީ އަށް ވަނީ ޗެމްޕިއަންސް ލީގު ފަސް ފަހަރު ހޯދި ފުރަތަމަ ކޯޗުގެ ޝަރަފް ވެސް ލިބިފަ އެވެ.

އިނގިރޭސިވިލާތުގެ ވެމްބްލީ ސްޓޭޑިއަމްގައި މިރޭ ކުޅުނު ފައިނަލް މެޗުގެ ފުރަތަމަ ހާފުގައި ގޯލެއް ފެނިގެން ގޮސްފައި ނުވާއިރު، މި ހާފުގައި ލީޑު ނަގަން ޑޯޓްމަންޑަށް ރަނގަޅު ފުރުސަތުތަކެއް ލިބިގެން ގޮސްފަ އެވެ. އެގޮތުން ޑޯޓްމަންޑުން ފޮނުވާލި ހަމަލާތައް ދިފާއުކުރުމުގައި ރެއާލްގެ ގޯލްކީޕަރު ތިބޯ ކޯޓުއާގެ ހުޝިޔާރުކަން ފެނިގެން ގޮސްފައިވާއިރު، ޑޯޓްމަންޑްގެ ފޯވާޑް ނިކޮލަސް ފުލްކްރުގް ފޮނުވާލި ހަމަލާއެއް ގޯލުގެ ދަނޑި އަށް ވެސް އަމާޒުވި އެވެ.

Advertisement

މި މެޗުގައި ފެނިގެންދިޔަ ފުރަތަމަ ގޯލު ރެއާލަށް މެޗުގެ 74 ވަނަ މިނެޓްގައި ކާމިޔާބުކޮށްދިނީ އެޓީމުގެ ތަޖުރިބާކާރު ފުލްބެކް ޑެނީ ކަވަހާލް އެވެ. ޑޯޓްމަންޑްގެ ޕެނަލްޓީއޭރިއާ ތެރެއަށް ހުރަސްކޮށްލި ބޯޅަ ކަވަހާލް ގޯލަށް ވައްދާލީ ބޮލުން ފޮނުވާލި ހަމަލާއަކުންނެވެ. މި ގޯލަށްފަހު ވެސް ރެއާލުން ދިޔައީ ޑޯޓްމަންޑްގެ ގޯލަށް ނުރައްކާ ކުރަމުންނެވެ. އޭގެ ނަތީޖާއެއްގެ ގޮތުން ޖޫޑް ބެލިންހަމް ދިން ޕާހަކުން މެޗުގެ 83 ވަނަ މިނެޓްގައި ވިނީޝަސް ޖޫނިއާ ވަނީ ރެއާލްގެ ދެވަނަ ގޯލު ކާމިޔާބުކޮށްދީފަ އެވެ.

ރެއާލުން މިފަހަރުގެ ސީޒަން ނިންމާލީ ތިން ތައްޓާއެކު އެވެ. ޗެމްޕިއަންސް ލީގުގެ އިތުރުން ރެއާލުން ވަނީ މި ސީޒަނުގެ ސްޕެނިޝް ލީގު އަދި ސްޕެނިޝް ސުޕަ ކަޕް ކާމިޔާބުކޮށްފަ އެވެ.