އ.ދގެ ކާނާއާއި ދަނޑުވެރިކަމާއި ބެހޭ ޖަމްޢިއްޔާ (އެފްއޭއޯ)ގެ ޤާނޫނީ ލަފާ އާއިއެކު ކަނޑުގެ ވަސީލަތްތައް ހިމާޔަތްކޮށް ބޭނުން ކުރުމަށް ޚާއްސަ ޤާނޫނެއް އެކުލަވާލުމަށް އެދިވަޑައިގެންފިއެވެ.

މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް އެފްއޭއޯގެ ކޮމެޓީ އޮން ފިޝަރީޒްގެ ބައްދަލުވުމުގައި ބައިވެރިވެވަޑައިގަތުމަށް އިޓަލީވިލާތައް ކުރައްވަމުން ގެންދަވާ ދަތުރުފުޅުގައި އެފްއޭއޯގެ ގާނޫނީ ލަފާގެ މަތިން ކަނޑުގެ ވަސީލަތްތައް ހިމާޔަތްކޮށް ބޭނުން ކުރުމަށް ޚާއްސަ ޤާނޫނެއް އެކުލަވާލުމަށް ޝިޔާމް ވަނީ އެފްއޭއޯގައި އެދިވަޑައިގެންފައެވެ.

މީގެ 40 އަހަރު ކުރިން އެފްއޭއޯގެ އެހީއާއެކު ތަރައްޤީ ކުރެވުނު ފިޝް އެގްރިގޭޓިން ޑިވައިސްތައް ނުވަތަ އޭއެފްއޭޑީ ތަކުގެ ބޭނުންކުރެވޭ މުއްދަތު އިތުރުކުރުމަށް ކުރެވޭ މަސައްކަތަށް ޝިޔާމް ވަނީ އަލިއަޅުވާލާފައެވެ.

މިއާއިއެކު، މިއަހަރުތެރޭ މެރިކަލްޗަރ ދާއިރާގެ ބޮޑު މަޝްރޫޢެއް ކުރިއަށް ގެންދަން ރާވާފައިވާތީ ގުޅިގެން މަސައްކަތް ކުރުމަށް ވެސް އެފްއޭއޯގެ އެސިސްޓެންޓް ޑިރެކްޓަރ ޖެނެރަލް މެނުއެލް ބަރަންޖާއެކު ބޭއްވި ބައްދަލުވުމުގައި ޝިޔާމް ވަނީ މަޝްވަރާ ކުރައްވާފައެވެ.

މިއާއިއެކު، މިއަހަރުތެރޭ މެރިކަލްޗަރ ދާއިރާގެ ބޮޑު މަޝްރޫޢެއް ކުރިއަށް ގެންދަން ރާވާފައިވާތީ ގުޅިގެން މަސައްކަތް ކުރުމަށް ވެސް އެފްއޭއޯގެ އެސިސްޓެންޓް ޑިރެކްޓަރ ޖެނެރަލް މެނުއެލް ބަރަންޖާއެކު ބޭއްވި ބައްދަލުވުމުގައި ޝިޔާމް ވަނީ މަޝްވަރާ ކުރައްވާފައެވެ.

ކަނޑުގެ ވަސީލަތްތައް ހިމާޔަތްކޮށް ބޭނުން ކުރުމުގެ ޤާނޫނެއް އެކުލަވާލުމަށް އެފްއޭއޯގެ ޤާނޫނީ ލަފައަށް ވަޒީރު ޝިޔާމް އެދިވަޑައިގެންފައިވާއިރު، އިންޑިއަން އޯޝަން ޓޫނާ ކޮމިޝަންގައި އެފްއޭއޯއިން އަދާކުރާ ދައުރު ފާހަގަ ކުރައްވާ، ހިޖުރަ ކުރާ ކަނޑުގެ ވަސީލަތްތައް މެނޭޖް ކުރުމަށް ގުޅިގެން މަސައްކަތް ކުރުމަށްވެސް ޝިޔާމް އެދިވަޑައިގެންނެވިއެވެ.

މި ބައްދަލުވުމުގައި، އެފްއޭއޯއިން ވެސް ވަނީ ރާއްޖޭއިން އިންޑިއާ ކަނޑުގެ މަސްވެރިކަމުގައި އަދާ ކުރާ ދައުރު ފާހަގަކޮށް ދެފަރާތް ގުޅިގެން މަސައްކަތް ކުރަން ޝައުޤުވެރިކަމާއި ގްލޯބަލް އެންވައިރަންމަންޓަލް ފެސިލިޓީ މެދުވެރިކޮށް ބަޔޯޑައިވަރސިޓީ ބިއޯންޑް ނޭޝަނަލް ޖުރިސްޑިކްޝަން ތަންފީޒު ކުރުމަށް ފަންނީ އެހީ ދިނުމަށް ތައްޔާރަށް އޮތްކަން ހާމަކޮށްފައެވެ.

މިމަހުގެ 7 އިން 13 އަށް އިޓަލީވިލާތައް އ.ދގެ ފުޑް އެންޑް އެގްރިކަލްޗަރ އޯގަނައިޒޭޝަން ކޮމިޓީ އޮން ފިޝަރީޒްގެ 36 ވަނަ ސެޝަންގައި ބައިވެރިވެވަޑައިގަތުމަށް ވަޒީރު ކުރައްވާ މިފަދަތުރުފުޅުގައި ޝިޔާމް ވަނީ އިޓަލީވިލާތުގެ ޤާނޫނު ހަދާ މަޖިލީހުގެ މަތިގޭގެ ނައިބު ރައީސް ޖަންމާރކޯ ޗެންޓިނާއިއޯއާ ވެސް ބައްދަލު ކުރައްވާ ދެ ޤައުމު ދެމެދު ފަތުރުވެރިކަމުގެ ދާއިރާއިން އޮތް ވަރުގަދަ ގުޅުމަށް އަލިއަޅުއްވާލައްވާފައެވެ.

މީގެއިތުރުން، ގާނޫނު ހަދާ މަޖިލީހުގެ ނައިބު ރައީސްއަށް މަސްވެރިކަމުގެ ދާއިރާގައި ރާއްޖޭގައި ހުރި ބައެއް އިންވެސްޓްމަންޓް ފުރުސަތުތަކުގެ މައުލޫމާތު ވެސް މި ބައްދަލުވުމުގައި ހިއްސާކޮށްފައިވެއެވެ. އެގޮތުން ސްޕޯޓްސް ފިޝިންގް މެރީނާތަކާއި މެރިކަލްޗަރގެ ތެރެއިން މަސްވެރިކަމުގެ ސިނާޢަތް ސިންދަފާތު ކުރުމަށް އިންވެސްޓް ކުރެވިދާނެ ކަންކަމުގެ މަޢުލޫމާތާއި ރާއްޖޭގެ މަހަށް ޔޫރަޕިއަން ޔޫނިއަންގެ ޑިއުޓީ ކަނޑާލުމަށް ކުރެވޭ މަސައްކަތްތަކުގެ މަޢުލޫމާތުވެސް ވަޒީރު ވަނީ ހިއްސާކުރައްވާފައެވެ.