ދައުލަަތަށް ހިދުމަތްކުރި ޝަރަފާއި މެޑަލް ސްޓެލްކޯގެ 16 މުވައްޒަފުންނަށް މިއަހަރު ލިބިފައިވާތީ އެކަން ސްޓެލްކޯ އިން ފާހަގަކޮށްފިއެވެ.

އެގޮތުން ސްޓެލްކޯ އިން ވަނީ އެ ފަރާތްތަކުޔގެ ޝަރަފްގައި އާދީއްތަ ދުވަހު ސްޓެލްކޯގެ ހެޑް އޮފީހުގައި ޚާއްސަ ޙަފްލާއެއް ބާއްވާފައެވެ.

މި ހަފުލާގައި ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ ސްޓެލްކޯއިން ދޭ ޚިދުމަތް ހީނަރުވެއްޖެނަމަ ދިވެހި ދަޢުލަތް ހީނަރުވެ، ދިވެހި ދަޢުލަތުގެ އިޤުތިޞާދީ މިނިވަންކަން ހީނަރުވާނެ ކަމަށެވެ. އަދި ކަރަންޓާއި ނުލައި ޤައުމުގެ އިޤުތިޞާދީ މިނިވަންކަން ޔަޤީން ނުކުރެވޭނެ ކަމަށެވެ.

Advertisement

މީގެ އިތުރުން ކުންފުނީގެ ޚިދުމަތް އިތުރަށް ފުޅާކޮށް، އިތުރު ފުރިހަމަ ކަމާއިއެކު ރައްޔިތުންނަށް ޚިދުމަތް ފޯރުކޮށްދިނުމަށް ހުރިހާ މުވައްޒަފުން ވެސް އެއްވެސް ހީނަރުކަމެއް ނެތި މަސައްކަތް ކުރުމަށް މެނޭޖިންގ ޑިރެކްޓަރ އިލްތިމާސް ކުރެއްވިއެވެ.

ހުސައިން ފަހުމީ ވިދާޅުވި އަޅުގަނޑުމެން ޚިދުމަތް ކުރަނީ، އަދި މިހާތަނަށް ޚިދުމަތް ކުރަމުން މި ދަނީ، އަދި މުސްތަޤުބަލްގައި ޚިދުމަތް ކުރާނީ ދިވެހި ދަޢުލަތަށް ކަމަށެވެ. އެހެންކަމުން ދިވެހި ދަޢުލަތަށް ޚިދުމަތްކޮށްދިނުމުގައި އަޅުގަނޑުމެން ތިބެންވާނީ ފިސާރި ކެރިގެން ކަމަށެވެ.

މެނޭޖިންގ ޑިރެކްޓަރ ވިދާޅުވި އެކަމުގައި ހީނަރުކަމެއް އައިސްގެން ނުވާނެ ކަމަށާއި ޚިދުމަތް ކުރަނީ ސްޓެލްކޯ އަށް ކަމުގައި ބައެއްފަހަރަށް ހީވެދާނެ ކަމަށެވެ. އެހެންނަމަވެސް ސްޓެލްކޯއަށް ޚިދުމަތްކުރުމަކީ ދިވެހި ދަޢުލަތަށް ޚިދުމަތް ކުރުން ކަމަށް ވިދާޅުވިއެވެ.

އެހެންކަމުން އަޅުގަނޑުމެން މި ދޭ ޚިދުމަތުގައި ނުވަތަ ރައްޔިތުންނަށް މި ދޭ ޚިދުމަތުގައި އަޅުގަނޑުމެން ހީނަރުވެއްޖެޔާ ދިވެހި ދަޢުލަތް ހީނަރުވާނެ ކަަމަށް ވިދާޅުވިއެވެ. އަދި ދިވެހި ދަޢުލަތުގެ އިޤުތިޞާދީ މިނިވަންކަން ހީނަރުވާނެކަމީ ޔަޤީންކަމެއް ކަމުގައި ވެސް ފަހުމީ  ވިދާޅުވިއެވެ.