މިދިޔަ މަހާއި އަޅާ ބަލާއިރު މިމަހުގެ ބިލްތައް 94 އިންސައްތަ ކުޑަވެފައިވާ ކަމަށް ސްޓެލްކޯ އިން ބުނެފިއެވެ.

މިއަދު ނޫސްވެރިންނާއި ބައްދަލު ކުރައްވާ ވާހަކަ ދައްކަވަމުން ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވީ ޖުމްލަ ކޮށް އެހެން މަސްތަކާ އަޅާބަލާއިރު މި މަހު ކަރަންޓު ބިލާ ބެހޭ ގޮތުން ލިބުނު ޝަކުވާތައް މަދު ކަމަށާއި މިދިޔަ މަހާ އަޅާބަލާއިރު މި މަހު 94 އިންސައްތަ ކަރަންޓު ބިލްތައް ކުޑަވެފައިވާ ކަމަށެވެ.

އެހެންނަމަވެސް މާލެއަށް ބަލާއިރު 6 އިންސައްތަގެ ކަރަންޓު ބިލުތައް އިންތިހާއަށް ބޮޑުވެފައިވާކަމަށާއި، އެކަމުގެ ތަފްސީލެއް އެ ކުންފުނިން ބަލާ މައުލޫމާތު ހިއްސާކުރާނެ ކަމަށް ފަހުމީ ވިދާޅުވި އެވެ. އަދި ހުޅުމާލޭގެ 15 އިންސައްތަ ބިލުތައް ބޮޑުކަމަށާއި މި ކަން ބެލުމަށް ސްޓެލްކޯގެ ޓީމެއް އެ އެޕާޓްމެންޓުތަކަށް ފޮނުވާނެ ކަމަށް ވެސް އޭނާ ވިދާޅުވި އެވެ.

Advertisement

މިއަދުގެ ބައްދަލުވުމުގައި ފަހުމީ ވިދާޅުވީ ސްޓެލްކޯއިން ދޭ ހިދުމަތް ހީނަރުވެއްޖެނަމަ ދިވެހި ދައުލަތް ހީނަރުވެ ދިވެހި ދައުލަތުގެ އިގުތިސޯދީ މިނިވަންކަން ހީނަރުވާނެ ކަމަށް ފަހުމީ ވިދާޅުވި އެވެ. އަދި ކަރަންޓާއި ނުލައި ގައުމުގެ އިގުތިސޯދީ މިނިވަންކަން ޔަގީން ނުކުރެވޭނެ ކަމަށް ވެސް އޭނާ ވިދާޅުވި އެވެ.

މީގެއިތުރުން، މިހާތަނަށް ސްޓެލްކޯ އިން ހިދުމަތް ދެމުންދަނީ އަދި މުސްތަގުބަލުގައި ހިދުމަތް ކުރާނީ ދިވެހި ދައުލަތަށް ކަމަށާއި، ރައްޔިތުންނަށް ހިދުމަތް ދިނުމުގައި ސްޓެލްކޯއިން ދުވަހަކުވެސް އޮޅުވާނުލާނެ ކަމަށް އޭނާ ވިދާޅުވި އެވެ.