ކަރަންޓު ބޭނުން ކުރާ މިންވަރު ދެނަގަތުމުގެ އިތުރުން ކަރަންޓު އިގްތިސޯދު ކުރުމަށް ކުރެވިދާނެ ކަންކަމާ ގުޅޭ އިލްމީ ދިރާސާއެއް ހެދުމަށް ސްޓެލްކޯ އާއި މޯލްޑިވްސް ނެޝަނަލް ޔުނިވަސިޓީ (އެމްއެންޔޫ) އިން ފަހުމުނާމާއެއްގައި ސޮއިކޮށްފިއެވެ.

މި އެއްބަސްވުމުގެ މައިގަނޑު ދާއިރާއަކީ، ބިލްކުރުމުގައި ދިމާވާ އެކި މައްސަލަތަކުގެ އަސްލު ސަބަބުތައް ދިރާސާކޮށް، ކަރަންޓު ބޭނުންކުރާ ވައްޓަފާޅި (ކޮންސިއުމަންޓް ޕެޓާންސް) ދެނެގަތުމުގެ އިތުރުން މޫސުމީ ބަދަލުގެ ސަބަބުން އެކަމަށް ކުރާ އަސަރު ދެނެގަނެ، ބިލްކުރުމުގެ ނިޒާމުގައި ހާމަކަން ބޮޑުކަމާއި، ސައްހަ ކަމާއި، ކަސްޓަމަރުންގެ ހިތްހަމަޖެހުން އިތުރުކުރުމަށް އިސްތިރާޖުތައް އެކުލަވާލުން ސްޓެލްކޯ އިން ހާމަކުރެއެވެ.

މި ދިރާސާގައި ވޭތުވެދިޔަ 10 އަހަރު (2014 އިން 2024 އަށް) ގެ ޑޭޓާ އިވެލުއޭޓް ކުރާނެ ކަމަށާއި މި ދިރާސާގެ އަސާސީ މަޤްޞަދަކީ ކަރަންޓު ބޭނުންކުރާ ވައްޓަފާޅި، ބިލްކުރުމުގެ ސައްހަކަން ވަޒަންކުރުން، ހަކަތައިގެ ކުރުންތެރިކަން އިތުރުކުރުމަށް ހުރި ފުރުސަތުތައް ދެނެގަތުން، ކަސްޓަމަރުންގެ ހިތްހަމަޖެހުންގެ ހިތްހަމަޖެހުމުގެ އިތުރުން މާލީ ގޮތުން މަސައްކަތް ކުރެވޭ ފެންވަރު ހާސިލުކުރުމަށް ސްޓެލްކޯގެ ކަރަންޓް ބިލްތަކުގެ ފުރިހަމަ ދިރާސާއެއް ކުރުން ކަމަށް ސްޓެލްކޯއިން ބުނެފައިވެއެވެ.

އެ ކުންފުނިން ވަނީ މި ދިރާސާއިން ހާސިލްކުރުމަށް ބޭނުންވާ ކަންކަން ހާމަކޮށްފައެވެ.

އެކުންފުނިން ހާމަކޮށްފައިވާ ކަންތައްތަކަކީ:

- ކަސްޓަމަރުންގެ އެކި ކެޓަގަރީތަކުގެ (ރެސިޑެންޝަލް، ކޮމާޝަލް، އިންޑަސްޓްރިއަލް) ކަރަންޓު ބޭނުންކުރާ ވައްޓަފާޅި ދެނެގަތުން.

- އެންމެ ގިނައިން ކަރަންޓު ބޭނުންކުރާ ވަގުތުތަކާއި، މޫސުމީ ބަދަލުގެ ސަބަބުން ކަރަންޓު ބޭނުންކުރާ ވައްޓަފާޅިއަށް ކުރާ އަސަރު ދެނެގަތުން.

- މީޓަރ ކުރެވިފައިވާ ޔޫސޭޖް ޑޭޓާ އާއި ބިލްކުރެވޭ އަދަދުތަކާ އަޅާކިޔައިގެން ކަރަންޓް ބިލްތަކުގެ ސައްހަކަން ކަށަވަރު ކުރުން.

- ބިލްކުރުމުގައި ގޯސްތަކެއް ހުރިނަމަ، ހުރި ގޯސްތަކާއި ހުރި މިންވަރު ދެނެގަނެ އަދަދުކުރުން.- ކަސްޓަމަރުންނަށް ކަރަންޓް ބޭނުންކުރުމަށް މަދުކޮށް، ހަރަދު ކުޑަކުރެވޭނެ ދާއިރާތައް ދެނެގަތުން.

- ކަރަންޓް ބިލާ ގުޅޭގޮތުން ކަސްޓަމަރުންގެ ޝަކުވާތަކާއި ހިޔާލު ދެނެގަތުން.

- ކުންފުނީގެ އިސްތިރާޖު ކަނޑައެޅުމާއު ގޮތް ނިންމުމުގެ މަރުހަލާތަކަށް އެހީތެރިވުމަށްޓަކައި ހިޔާލުދީ، ތަފާސް ހިސާބާއި ދިރާސާގެ މައްޗަށް ބިނާކުރާ މަޝްވަރާ ފޯރުކޮށްދިނުން

ކަރަންޓު ބިލުތައް އާދަޔާ ހިލާފަށް ބޮޑުވާ މައްސަލައަކީ ވަރަށް ގިނަ ދުވަސްވީ ބޮޑު މައްސަލައެކެވެ. މި މައްލައަކީ އާންމުން އަބަދުވެސް ޝަކުވާ ކުރާ މައްސަލައެކެވެ.